A concelleira popular Marisol Piñeiro saíu recentemente á palestra para asegurar a Galescola que o PP atopou contratada ao chegar ao goberno de Carnota «estaba enterrada no monte, non vale», para xustificar así o rexeitamento do novo goberno municipal ao proxecto.

Disque unha imaxe vale máis ca mil palabras, analisade logo a seguinte captura da zona prevista para a Galescola (en amarelo):


(En vermello, Centro de Saúde. En azul celeste, CEIP San Gregorio de Carnota. En violeta, Casa do Concello. En verde, pavillón polideportivo de Carnota).

Ademais, recoñeceu que «temos o compromiso do vicepresidente (Quintana) de que en canto poñamos un sitio, farán o necesario para traer a Galescola». O que o PP non parece ter tan claro é a excusa para non ter ofrecido aínda ningunha ubicación alternativa (o que é fácil de explicar, pois o propio arquitecto municipal mantivo sempre que a aprobada é única alternativa viábel). Porén o PP segue fantaseando, en palabras da propia concelleira, co seu «espazo interxeracional, para nenos e maiores, con áreas conxuntas como a cociña, nas que compartirán o espazo un escola de nenos e un centro de día. Estamos traballando para poder ubicalo no Viso, porque as cousas que se fan, hai que facelas ben feitas».

O que realmente sorprende do que dixo a sra. Piñeiro é que pouco antes desas declaracións o alcalde José Oreiro informara con todo luxo de detalles aos veciños de San Mamede sobre ese proxecto «interxeneracional» no Viso, para rematar asegurandolles que finalmente non podía facerse pois eses terreos non son de propiedade municipal.

Evitamos pronunciarnos sobre a tomadura de pelo que significa ir xunta os veciños para contarlle as marabillosas ideas que tes cando xa sabes que nunca as vas poder realizar, a nós o que realmente nos importa é saber se Carnota terá que agardar a un cambio de goberno para desbloquear dunha vez a súa gardería pública. En todo caso, o que fixo e está a facer o PP de Carnota coa Galescola constitúe con moita seguridade o maior escándalo político desta lexislatura.

* Nota: Parece ser que ao sr. alcalde lle levou 6 anos no goberno e 8 na oposición descubrir que o campo do Viso non é de titularidade municipal.

O alcalde acusou recentemente en varios medios ao BNG de crispar á poboación á raíz das numerosas queixas remitidas por veciños ao Valedor do Pobo por mor dos recibos do saneamento que levan recibindo desde fai meses sen contar en ningún caso con ese servizo.

O BNG de Carnota quere desmarcarse das acusacións sen fundamento que se emitiron desde a alcaldía, pois como formación política non participou en ningún aspecto do procesamento das ditas queixas ao Valedor, se ben varias persoas vencelladas ao BNG si apoiaron a protesta, ao igual que outras moitas afíns ao PSOE ou ao PP. Tampouco o BNG deu difusión á iniciativa na súa web, no seu voceiro nin en ningún outro medio. Por iso non son comprensíbeis os ataques directos ao BNG como única resposta a unha protesta veciñal absolutamente lexítima.

Capítulo aparte merece o feito de que algunhas das persoas que transmitiron esa queixa foran mentadas na prensa con nome e apelidos para tratar de demonizar e politizar esta protesta veciñal, polo feito de que sexan afíns ao BNG. Entendemos que para o alcalde sexa máis doado culpar da situación a unha persoa que decidiu implicarse a nivel individual contra esta soberana inxustiza, en lugar de asumir que o concello é o que está a provocar coa súa desidia que centos de veciños teñan que aboar un servizo que non están a percibir. Un destes aludidos transmitiunos a súa decepción por que a queixa fora interpretada de xeito partidista, e que membros do goberno municipal tentaran «personalizar a protesta», o que na súa opinión só se pode entender coma «unha clara intencionalidade de matar o mensaxeiro para desviar a atención do problema real».

Nun senso similar vai tamén a opinión do BNG, pois o PP parece estar tratando de desviar a atención desta inxustiza que está a consentir por activa e por pasiva, e do peor xeito posíbel: criminalizando aos veciños que protestaron, mesmo inventándose argumentos coma o de supostas suplantacións de identidade na tramitación das queixas ou que o Valedor resolviu o asunto en favor do Concello, cando na realidade limitouse a exercer de mediador e a transmitir a postura dunha parte á outra, sen formular ningunha valoración adicional e dando, a pesar de todo, o asunto por zanxado.

Sobre a acusación recurrente de que estas taxas foran implantadas polo BNG, é tan ridícula que para contestala chegaría con comprobar a data de calquera das cartas remitidas pola empresa concesionaria do saneamento aos veciños do Pindo para anunciarlles o novo imposto. Todas elas foron enviadas xa durante o novo goberno e coa súa connivencia manifesta, a pesar de non executar unha soa obra que xustifique a implantación desa taxa en varios núcleos: Algún veciño puido clausurar a foxa séptica? Selouse algunha saída directa ao mar das augas residuais? Enganchouse algunha casa do Pindo á EDAR? Se a resposta a todas esas preguntas é negativa -e o goberno sabe que asi é-, por que agora teñen que pagar polo saneamento?

O BNG quere deixar clara a súa postura, saíndo na defensa dos veciños perxudicados pola implantación de taxas do saneamento en lugares nos que o servizo non se está a prestar -non só no Pindo-. Ademais o grupo nacionalista rexeita enerxicamente o feito de que se criminalice e inxurie a veciños do noso concello polo simple feito de protestar con ferramentas lexítimas ante unha situación que consideran abusiva, pois están no seu pleno dereito de facelo. Garantimos ademais a asistencia xurídica a aqueles veciños que se poidan sentir acosados e perseguidos por ter exercido o seu dereito de protesta e libre expresión.

Pechamos este capítulo esixíndolle ao goberno municipal que cese na súa actitude agresiva e comece dunha vez a investir esa enerxía na resolución das problemáticas municipais, pois iso foi o que lle encomendou o electorado de Carnota.