BNG de Carnota

O novo alcalde de Carnota cobrará a metade que o anterior; en conxunto, os soldos políticos descenden un 82%

2011-06-29T00:32:00.007+02:00

Evolución dos salarios de carácter político en Carnota entre os anos 2007 e 2011

Só unha semana despois de acceder ao goberno municipal de Carnota o BNG puido cumprir cunha das propostas clave do seu programa e tamén dar cumprimento a unha das súas principais reivindicacións durante catro anos liderando a oposición carnotá: a redución drástica dos gastos de carácter político, que co PP só no 2010 ascenderon a case 190.000 euros incluíndo retribucións, dietas e seguridade social de dous concelleiros con dedicación exclusiva e unha liberada política.

Xa na presentación da candidatura asi como no seu programa electoral o BNG de Carnota anunciou que, no caso de obter o suficiente respaldo veciñal o 22 de maio, outorgaría unha única dedicación exclusiva, a do alcalde, nunca superior aos 2.000 euros brutos. Dito e feito: No pleno desta fin de semana, no que se trataron as dedicacións e o reparto das áreas de traballo, a corporación municipal aprobou (coa abstención do PP) unha única retribución económica de 2.000 euros mensuais brutos para o alcalde de Carnota Ramón Noceda, distribuídos en 14 pagas. En total 28.000 euros anuais que reducen á metade os case 52.000 euros percibidos polo anterior alcalde, José Oreiro, do PP.

Nin Merche Díaz, nova tenente de alcalde, nin Iván Franco e Antón Federico Beiro, membros do goberno, percibirán mensualmente retribución prefixada algunha. Asi o BNG elimina o soldo de 31.000 euros que viña percibindo o edil do PP Santiago Brea pola súa 2ª tenencia de alcaldia. O soldo de 38.000 euros de Marisol Piñeiro (1º tenente alcalde) non será necesario suprimilo, pois no 2010 pasou a cobrar directamente como deputada do PP no Parlamento Galego, para fortuna das arcas municipais de Carnota.

Os salarios políticos de Carnota descenderon asi un 82% coa entrada do BNG no goberno, pasando dos case 153 mil euros que se repartiu o PP en dedicacións exclusivas só no ano 2010 aos 28 mil euros actuais do alcalde.

Entendemos que corresponde ao Partido Popular explicar os motivos da súa abstención. O BNG de Carnota entende que esta dedicación é realista en canto á realidade poboacional, xusta e digna para o alcalde dun pobo digno, e tamén solidaria coas persoas que peor o están pasando destes tempos, para os cales o soldo de 3.600 euros que como mínimo viña percibindo mensualmente José Oreiro eran toda unha aberración e un insulto.

Novo organigrama municipal máis eficaz e realista
As novas áreas de traballo para o goberno municipal aprobadas o sábado substitúen un esquema que foi inexistente, pois nunca chegou a aclararse totalmente que edil do PP obstentaba cada responsabilidade do goberno municipal nos 4 anos que permaneceron á fronte do executivo. O BNG pretende que este novo organigrama non só sexa mostra da nova forma de traballar do goberno, senón que sexa efectivo de cara á integración veciñal na vida municipal.

Alcalde: Ramón Noceda

Tenente de Alcalde: Merche Díaz

Moncho Noceda
Participación Veciñal (Ramón Noceda)
Área transversal que abrangue todas as demais en canto a desenvolver e aplicar as fórmulas de participación veciñal máis acaídas a cada unha das áreas.

Ordenación territorial (Ramón Noceda)
Recolle todas as actuacións e iniciativas relacionadas con ordenación do territorio, PXOM, concentración parcelaria e obras e servizos.

Merche Díaz
Medio Ambiente, Rural e Mariño (Merche Díaz)
Recolle todas as actuacións e iniciativas relacionadas con agro, montes, pesca, acuicultura, medio ambiente e o Monte Pindo.

Muller e Servizos Sociais (Merche Díaz)
Recolle todas as actuacións e iniciativas relacionadas con servizos sociais, 3ª idade, muller e familia.

Comunicación (Iván Franco)
Iván Franco
Recolle todas as actuacións e iniciativas relacionadas con posicionamento municipal en Internet, revista municipal e novas tecnoloxias.

Cultura e Deporte (Iván Franco)
Recolle todas as actuacións e iniciativas relacionadas con promoción cultural, fomento da práctica deportiva, xuventude, voluntariado e memoria histórica.

Antón Federico Beiro
Turismo (Iván Franco)
Recolle todas as actuacións e iniciativas relacionadas con promoción turística, turismo mariñeiro, turismo rural e posta en valor do patrimonio.

Promoción económica (Antón Federico Beiro)
Recolle todas as actuacións e iniciativas relacionadas con promoción económica e emprego.

Os membros da candidatura do BNG de Carnota asinan un compromiso contra o transfuguismo

2011-06-20T19:22:00.001+02:00

As e os 22 membros da candidatura do BNG, no noso local

O conxunto das mulleres e os homes que participaron na candidatura do BNG de Carnota nas pasadas Eleccións Municipais rubricaron o 10 de xuño o seu compromiso por escrito de que no caso de que obteñan ou cheguen a obter a acta de edil, esta permanecerá inalterabelmente ao servizo da organización pola que foron electos, o Bloque Nacionalista Galego.

Con este xesto o conxunto da candidatura do BNG quere constatar o seu frontal rexeitamento das prácticas de transfuguismo, polas cales calquera persoa que obteña unha acta de concelleiro podería ao día seguinte obrar dunha forma distinta ou mesmo contraria ao programa e posicionamentos da opción política pola que concurriu, contrariando tamén a vontade do cidadán que dera o seu voto á dita opción.

Animamos a todas as opcións políticas a emprender o camiño de adoptar as medidas que sexan necesarias para acurralar e erradicar o transfuguismo e o chalaneo, con especial atención na política local por ser aquela máis próxima, sensíbel e por tanto máis vulnerábel onde máis pode danar os intereses do conxunto da cidadanía.

Publicamos o texto literal do documento asinado de enteira conformidade polos 22 membros da candidatura do BNG, xa arquivados no local do BNG de Carnota.

COMPROMISO PERSOAL DAS E DOS INTEGRANTES DA LISTA DO BNG DE CARNOTA

Eu, (nome da persoa candidata), con DI (documento de identidade da persoa candidata) , como persoa integrante da candidatura do BNG de Carnota que concurriu ao proceso de Eleccións Municipais do 2011, no suposto de que chegue a obstentar unha acta de edil polo feito de ter formado parte desta candidatura,

DECLARO

Primeiro: Comprométome responsabelmente a acatar as decisións que a o conxunto da Asemblea Local do BNG de Carnota adopte asi coma as tarefas que se me encomenden, e a defendelas dignamente na corporación municipal, dentro das posibilidades que a miña representatividade permita. Asi mesmo, declaro que xamais tomarei unha decisión individual contraria aos intereses e posicionamentos do conxunto da Asemblea Local do BNG de Carnota.

Segundo: Acepto que a acta de concelleira/o permanecerá vencellada incondicionalmente ás decisións orgánicas que adopte o BNG en cada momento. Baixo ningún suposto abandonarei a disciplina do BNG reservándome a acta de edil. Asi mesmo, comprométome a, no caso de que se produza o meu cese nesta organización por calquera motivo, poñer a miña acta a enteira disposición do que decida a Asemblea Local do BNG de Carnota, aceptando calquera responsabilidade derivada dunha forma de proceder distinta ao que se recolle neste compromiso personal que rubrico de enteira conformidade co exposto.

Asinado en Carnota a 10 de xuño do 2011

Moncho Noceda proclámase novo alcalde de Carnota co apoio da maioría absoluta da corporación

2011-06-11T18:15:00.006+02:00

O esperado momento da investidura do novo alcalde

Ramón Noceda Caamaño é xa o novo alcalde do Concello de Carnota, tras o impecábel desenvolvemento da sesión plenaria durante a que tomaron hoxe posesión das súas actas os 11 novos edís da corporación municipal 2011-2015.

Moncho Noceda no momento de tomar posesión

Durante un pleno caracterizado pola importantísima presenza e a normal expectación veciñal, dado que se chegou ao mesmo momento da investidura sen ningún acordo entre as forzas, finalmente os 2 concelleiros electos polo PSOE de Carnota deron o seu apoio á candidatura presentada polo BNG, que alcanzou asi os 6 edís necesarios para a proclamación do alcalde.

Moncho Noceda, durante o seu primeiro discurso como novo alcalde de Carnota, agradeceu a toda a sociedade o importante apoio recibido e animou á veciños a sumarse a traballar polo futuro dun concello que non atravesa polo seu mellor momento. Asi mesmo, e tras agradecer aos membros do PSOE a súa postura, extendeu o chamamento aos veciños tamén aos concelleiros das demais forzas políticas de Carnota.

Primeiro paso ilusionante

A pesar de que esta investidura se produciu sen un acordo de goberno entre ningunha das forzas que obtiveron representación, o BNG agradece que finalmente o PSOE cumprira coa palabra dada na campaña e anuncia que vai establecer os contactos precisos para, nas vindeiras datas, tentar achegar posicións de cara a conformar un acordo de goberno baseado en valores de transparencia, austeridade, seriedade, honradez, xustiza, solidariedade e sobre todo participación veciñal na vida municipal, superando vellos partidismos, personalismos e localismos e traballando para dar forma a un Concello de Carnota máis igualitario do que se sintan parte indivisible todos e cada un dos nosos veciños e veciñas.

Euloxio Franco, con nós

A maior ovación por parte dos veciños de Carnota produciuse durante a intervención do secretario-interventor do Concello de Carnota, Carlos Bousoño, que era o encargado de conducir e explicar o desenvolvemento da sesión. Despois de lembrar aos 6 membros da anterior corporación municipal que xa non repetirán nesta lexislatura, quixo facer unha mención especial dedicando unha poesía en homenaxe ao noso tristemente falecido compañeiro Euloxio Franco, que nos deixou poucos meses antes do inicio da campaña sendo concelleiro do BNG e tras ser elixido pola Asemblea local do BNG para repetir posición na candidatura nacionalista.

Nova corporación munipal
A corporación municipal 2011-2015 do Concello de Carnota queda como segue:
Alcalde: Moncho Noceda Caamaño (BNG)
Merche Díaz Mayán (BNG)
Iván Franco Caamaño (BNG)
Antón Federico Beiro Oreiro (BNG)
Suso Campos Díaz (PSOE)
Juan Saborido Rama (PSOE)
José Oreiro Rodríguez (PP)
Marisol Piñeiro Martínez (PP)
Santiago Brea Beiro (PP)
Chus González Senande (PP)
Ana González Louro (PP)

Asiste á investidura do novo alcalde de Carnota

2011-06-10T17:16:00.001+02:00

Casa do Concello de Carnota. Fonte: Galipedia.

Mañá sábado, 11 de xuño, ás 12:00 horas da mañá no Salón de Actos do Concello de Carnota, vai ter lugar o Pleno Constituínte da nova Corporación Municipal 2011-2015 do Concello de Carnota, sesión durante a que os candidatos electos polas distintas forzas nas pasadas Eleccións Municipais do 22 de maio tomarán posesión das súas actas de concelleiros e concelleiras, e investirán ao novo alcalde de Carnota.

A sesión é aberta ao público, polo que convidamos a todo o pobo de Carnota a que esté presente nun evento tan decisivo para o futuro do noso concello.

O alcalde de Carnota en funcións exprime ata o último minuto a maioría absoluta dilapidando recursos públicos

2011-06-08T17:59:00.004+02:00

Oreiro revela o concepto de austeridade do PP

O aínda alcalde de Carnota, José Oreiro, non parece disposto a abandonar a utilización partidista do erario público incluso despois de perder a maioría absoluta, tras sufrir o pasado día 22 unha severa perda de máis de 200 votos e dous concelleiros. Nin sequera o feito de non alcanzarse aínda un acordo entre o BNG e o PSOE para conformar un cambio de goberno serve de excusa ao señor José Oreiro para demostrar un atisbo de prudencia á hora de contratar obras, cancelar servizos e incluso emprender contratacións masivas de personal que vai ter que asumir o novo goberno que saia da sesión de investidura deste mesmo sábado.

A Escola de Música deixa de sonar anticipadamente «como castigo electoral»

A primeira cuestión que subscitou numerosas queixas dos usuarios foi o remate anticipado da Escola Municipal de Música, que os pais e nais dos alumnos interpretan como un castigo polos malos resultados obtidos polo Partido Popular nas urnas o pasado 22 de maio. Pero o máis grave non é a perda deste servizo antes de rematar o prazo que os veciños xa tiñan abonado para a formación musical dos seus cativos, senón as circunstancias deste feito. A Escola Municipal de Música viña utilizando un local privado que cedera un particular a cambio do seu arranxo a costa dos fondos públicos do Obradoiro de Emprego. Despois do 22 de maio, esa persoa impediu que se seguira desenvolvendo alí a normal actividade da escola, alegando que se Oreiro non era o alcalde xa non o deixaba usar. Descoñecemos se unha orde directa do alcalde en funcións pode estar detrás desta actitude, mais o que temos claro é que nada fixo por que a Escola de Música rematara con normalidade o curso, deixando aos veciños sen un servizo, lembramos, que xa pagaron.

A construtora «favorita» do goberno de Carnota recibe dous novos contratos por 200 mil euros

O pasado 1 de xuño o alcalde en funcións resolveu adxudicar contratos por dúas obras (1 e 2) que suman un total de 200.000 euros (32 millóns das antigas pesetas) a cargo do POL. Como non podía ser doutro xeito, a beneficiada por estes contratos foi a mesma empresa que leva recibindo durante 4 anos a inmensa maioría dos contratos de obras do goberno municipal do PP, e que ademais non é do noso concello. O BNG de Carnota non entra a valorar a legalidade ou a necesidade destas obras, que ninguén discute, máis si queremos denunciar publicamente a inmoralidade de adxudicar en funcións e de xeito directo obras millonarias por duración de 4 meses e discriminando novamente ás empresas do noso municipio.

Oreiro reparte masivamente contratos laborais dous días antes de deixar a alcaldía

Hoxe mesmo tivemos coñecemento por varios afectados dunha contratación masiva de personal por parte do goberno de Carnota en funcións. Trátase dun número elevado de novos contratos cunha duración de seis meses e un custo indeterminado que terá que asumir o novo goberno municipal. Esta contratación, descrita como "masiva" por algúns afectados, e da que faltan por coñecerse máis detalles, produciuse por medio de chamadas telefónicas ás persoas escollidas, que se especula que son moi próximas ao PP de Carnota.

O BNG recórdalle ao alcalde de Carnota que o erario público é de todos e non do PP

O Bloque Nacionalista Galego quere manifestar a súa seria preocupación por estes feitos, que foron notábeis pero que dubidamos que fosen os únicos. O alcalde de Carnota actúa como se acabara de revalidar a maioría absoluta despois de perdela dun xeito contundente.

Esta é a austeridade do PP? Queira ou non entender a mensaxe democrática que lle trasladou o pobo de Carnota nas urnas o pasado 22 de maio, o BNG esíxelle prudencia e responsabilidade á hora de manexar cartos que son de todos. E máis coñecendo a precaria situación económica que atravesa o noso concello, que esperamos poder coñecer con detalle a partir do sábado, cando esperamos que se consume por fin o cambio de goberno que a veciñanza de Carnota pediu maioritariamente nas urnas.

Resposta do BNG ao comunicado do PSOE

2011-06-07T20:01:00.003+02:00

O BNG de Carnota resposta ao comunicado publicado polo PSOE o 6 de xuño

Resultados globais do 22M no Concello de Carnota

Durante a campaña tanto BNG como PSOE comprometéronse co pobo de Carnota a impulsar un cambio de goberno sen contrapartidas, no que a forza menos votada favorecería á máis votada entre elas na investidura, e a partir dese momento acadaríase un pacto estable ou acordos puntuais. Mais unha vez que se coñeceron os resultados o PSOE incumpriu deliberadamente ese compromiso cando o seu candidato amosouse disposto a acordos con PP ou BNG indistintamente, sempre que pasaran por entregarlle a alcaldía.

Ata o 28 de maio o BNG non participou en ningún contacto para conformar o cambio de goberno municipal que Carnota votou nas urnas. Ese día, a militancia acadou un acordo unánime en Asemblea Local que trasladamos ao PSOE e á sociedade, consistente en pedirlles que cumpriran o compromiso de apoiar na investidura a forza máis votada entre elas, neste caso o BNG. A día de hoxe, ese documento non recibiu contestación.

Sen embargo temos constancia de que o PSOE xa se reuniu en varias ocasións con membros do PP, antes e despois do comunicado do BNG. Tras un cruce de posicionamentos e desmentidos confusos por parte dos membros do PSOE, e de declaracións públicas do seu cabeza de lista nas que se amosa totalmente receptivo a acordos co PP, publícase na páxina web do PSOE un comunicado no que literalmente se culpa da falta de acordo á "actitude" do BNG. Comunicado, ao noso entender, cheo de malinterpretacións, cando non de falsidades.

É imposíbel que o BNG teña responsabilidade na rolda de reunións que mantiveron PSOE e PP, ou que dificultara o diálogo co PSOE. É máis, todos os contactos co PSOE partiron da iniciativa do BNG, que sempre mantivo que é a única forza de Carnota coa que estaría disposta a dialogar para un cambio de goberno. Se aínda non se produciu ese diálogo foi polo seu desinterese. Dificilmente puido negarse o BNG a algunha proposta do PSOE, como tamén aseguran no escrito, pois ningunha proposta nos fixeron. Tamén é incorrecto aludir como motivo do suposto desencontro a proposta dunha soa dedicación exclusiva, pois tampouco se tratou este punto. Ademais ese compromiso destacouse no programa do BNG, e aparentemente compartiuno o PSOE, ou cando menos nunca o criticou.

Entendendo que os motivos que o PSOE esgrime para falar de desencontros non responden á verdade, o BNG reitera a total vontade de dialogar canto antes coa representación que o PSOE de Carnota designe, para traducir os proxectos das dúas formacións no cambio de goberno que o noso Concello precisa. De non ser asi, a veciñanza debe saber que o novo contexto debeuse exclusivamente ao cambio de postura do PSOE.

Acordo da Asemblea local do BNG de Carnota de 28/05/11

2011-05-30T14:31:00.000+02:00

Dando cumprimento ao acordado polo conxunto da Asemblea Local do BNG de Carnota o pasado sábado 28 de maio, difundimos para o coñecemento de toda a veciñanza o documento que recolle a postura do BNG de Carnota a respecto do actual panorama político post-electoral no noso concello, despois de telo posto en coñecemento dos responsábeis do PSOE no día de onte.

ACORDO DA ASEMBLEA LOCAL DO BNG DE CARNOTA

Reunido o conxunto da militancia do BNG de Carnota en Asemblea Local, organismo convocado en tempo e forma e plenamente lexitimado para adoptar o seguinte acordo, pola unanimidade dos asistentes acordamos:
Nas Eleccións Municipais do 22 de maio de 2011 o pobo de Carnota decantouse clara e maioritariamente por un cambio de goberno no Concello de Carnota.
Os candidatos á alcaldía do BNG e do PSOE manifestaron en público e en privado o compromiso de, no caso de non se producir unha maioría absoluta, outorgar o seu voto na sesión de investidura aos candidatos da lista que, entre elas, obtivera máis votos.
En función da representatividade obtida ese cambio de goberno debe ser liderado polo BNG, con Ramón Noceda Caamaño como alcalde de Carnota.
Instamos ao PSOE de Carnota a cumprir a palabra dada aos veciños dando o seu apoio ao BNG na sesión de investidura da Corporación Municipal de Carnota.
A Asemblea local do BNG de Carnota designa e faculta a Ramón Noceda Caamaño, Mª Mercedes Díaz Mayán e Mario Maceiras Saborido para trasladar este acordo aos interesados.
Como mostra de transparencia, este documento porase en coñecemento de toda a veciñanza mediante nota de prensa e na páxina web do BNG, unha vez sexa aprobado.
Ante a aprobación por unanimidade pola Asemblea local do BNG de Carnota, asino dando fe en Carnota a 28 de maio de 2011, sendo as 19:00 horas.

Belén Campos Díaz
Responsábel local
BNG de Carnota

Eleccións Municipais no Concello de Carnota - Resultados por localidade

2011-05-27T17:42:00.004+02:00

BNG 2007 BNG 2011 PSOE 2007 PSOE 2011 PP 2007 PP 2011

	CALDEBARCOS		SAN MAMEDE		CARNOTA		LIRA		LARIÑO		O PINDO		TOTAL
	2007	2011	2007	2011	2007	2011	2007	2011	2007	2011	2007	2011	2007	2011
BNG	143	115	109	182	150	173	297	273	27	169	137	131	863	1043
PSOE	93	101	115	77	124	161	155	135	223	64	101	99	811	637
PP	148	137	379	337	498	373	221	218	118	121	225	197	1589	1383

Caldebarcos
Carnota
Lariño
Lira
O Pindo
San Mamede

Carnota quere unha alternativa

2011-05-23T14:39:00.009+02:00

O PP perde a maioría absoluta tras ceder dous concelleiros, mentras o BNG medra e sitúase a 343 votos da maioría

O Bloque Nacionalista Galego rachou en Carnota coa tendencia alcista da dereita alcanzando un importante medre que o levou onte do 26 ao 33,5% dos sufraxios, obtendo un concelleiro máis que hai catro anos. O PP sufriu un severo retroceso de 203 votos, o que significa a perda de dous concelleiros con respecto ao escrutinio que lles outorgara a maioría absoluta no 2007. Outro duro pau foi para o PSOE, coa perda de case 200 apoios e un concelleiro. Polo lado máis positivo, a cita coas urnas rexistrou unha das participacións máis altas nos últimos anos, pois case 3 de cada 4 votantes quixeron exercer o seu dereito a voto.

Ramón Noceda diríxese aos veciños durante o mitin de peche de campaña en Lira

O BNG foi a primeira forza en Lira e Lariño, ficando moi poucos votos por debaixo do PP en Caldebarcos. Asi as cousas, o reparto do sistema d'Hondt arroxa unhas cifras de 5 concelleiros para os populares, 4 para os nacionalistas e 2 para os socialistas, polo que se visibiliza un claro escenario alternativo aos últimos 4 anos de mandato popular, sempre e cando o PSOE manteña o compromiso expresado na campaña de non apoiar na sesión de investidura ao PP.

O BNG de Carnota quere agradecer a todos e cada un dos seus 1.043 votantes a confianza depositada no noso proxecto e na nosa candidatura, grazas aos que superamos por primeira vez despois de moitos anos o teito dos mil votos. a pesar da perda de case mil habitantes censados con respecto ás eleccións do 2007.

Pero nomeadamente, debemos adicarlle estes formidábeis resultados a todos e cada un dos e das militantes e simpatizantes que os fixeron posíbel e converteron a nosa campaña nun debate de ideas e propostas para o futuro de Carnota.

1.043 veces grazas!

A continuación podedes atopar os resultados detallados. En vindeiros días publicaremos os datos definitivos por localidades.

Concelleiros a elixir: 11
Mesas: 6
Censo: 4.264
Participación: 3.160 (74.11%)
Abstencións: 1.104 (25.89%)
Votos en branco: 49 (1.57%)
Votos nulo: 45 (1.42%)

Resultados finais co 100% escrutado
PP: 1.386 votos (44.49%) - 5 concelleiros
BNG: 1.043 votos (33.48%) - 4 concelleiros
PSOE: 637 votos (20.45%) - 2 concelleiros

Intensa fin de semana con cheo tras cheo no Pindo, Carnota e Caldebarcos

2011-05-16T12:50:00.003+02:00

O Bloque Nacionalista Galego desenvolviu esta fin de semana unha intensa axenda de actos públicos no noso concello para explicar o programa do futuro goberno que lle vai devolver o concello aos veciños.

Máis dun cento de veciños do Pindo arrouparon ao Roxo e denunciaron o abandono municipal

O primeiro acto da fin de semana foi o mitin do BNG de Carnota no colexio do Pindo, na tardiña do venres.

Foi Consuelo Lamela, nº 18 da candidatura nacionalista, a encargada de abrir o acto. As palabras sinxelas mais convencidas de Consuelo arrancaron un dos aplausos máis fervorosos do máis dun cento de veciños que quixeron estar na escola.

Betty Riveiro, moza do Pindo que asiste no décimo posto da lista do BNG de Carnota, tomou o relevo para, dirixíndose especialmente á mocidade, esixir de todas as institucións máis oportuinidades para mozas e mozos, para que como é o seu propio caso, deixen de ter que buscarse a vida fóra de Carnota.

Merche Díaz, nº 2 da lista e actual portavoz municipal, denunciou a desaparición da Concellería de Muller, que tanto apoio viña dando aos colectivos desfavorecidos do noso concello, e tras comprometerse a recuperar este área pediu o apoio para o proxecto de goberno nacionalista, o máis realista e necesario pois precisamente pretende recoñecer como interlocutores aos diferentes colectivos do noso concello, que son precisamente os que coñecen os problemas e as necesidades.

A continuación o propio Ramón Noceda dirixiuse ao auditorio para concretar os aspectos do programa relativos ao Pindo e para darlle a palabra, tras un debate sobre as carencias e erros da acción municipal do actual goberno rematou un acto marcado pola petición de voto ao BNG como única alternativa frente ás políticas de dereita do PP e do PSOE, e polas alusións ao abandono do Pindo desde o goberno municipal, sendo os veciños os que tiveron que suplantar a acción de goberno coas súas propias iniciativas, como vén acontecendo noutros núcleos.

Cheo en Carnota con gran presenza de mocidade

Máis dun cento de veciños quixeron estar o sábado no Salón de Actos do Concello de Carnota escoitando propostas e tomando a palabra, nun dos actos máis multitudinarios que viviu nunca o BNG nesta parroquia, e cunha moi destacada presenza da mocidade.

Tono de Albela, nº 4 da lista do BNG, foi o responsábel de abrir o acto, intervención na que fixo unha sentida mención a un veciño e compañeiro que hoxe estaría ocupando o atril se seguira entre nós, Euloxio Franco, sendo este o momento máis emocionante da tarde.

Iván Franco, mozo de Carnota e nº 3 da candidatura nacionalista, estreouse como orador e incidiu na aposta do BNG pola mocidade, pois sen a mocidade Carnota nin ningún concello pode ter futuro. Chamou Iván a autoorganizarse en asociacións de todo tipo, pois despois do 22 de maio estes colectivos terán unha implicación fundamental na vida municipal se o BNG chega ao goberno, participando na priorización de proxectos e incluso dos investimentos. O BNG busca deste xeito rematar co clientelismo na vida pública de Carnota, pois o goberno municipal debe gobernar para todos e todas independentemente da súa forma de pensar.

Ramón Noceda rematou o acto expoñendo os principais puntos programáticos do proxecto nacionalista, que fuxe falar de "obras e farolas" e si fala de devolver a transparencia, austeridade e realismo á política local. Moncho Noceda rematou presentando un "invitado especial", o público, o ata agora destinatario e a partir de agora tamén artífice da acción municipal. Non rexeitou esta posibilidade unha asistencia que iniciou un intenso debate plagado de referencias ás necesidades dos veciños e tamén ao sectarismo dos actuais alcalde e tenente de alcalde de Carnota, José Oreiro e Marisol Piñeiro, que non só practicaron o clientelismo nas contratacións senón que chegaron a humillar a aspirantes que non gozaban do favor do goberno municipal.

Caldebarcos volve encher o local veciñal «privatizado»

O domingo foi o turno da xente de Caldebarcos, que abarrotaron a antiga escola e para coñecer o proxecto do BNG e transmitir as súas inquedanzas.

Neste caso foi Belén Campos, responsábel local do BNG e nº 5 da candidatura nacionalista, a encargada de abrir o encontro con máis de cincuenta veciños e veciñas reiterando o compromiso total coa veciñanza de Caldebarcos, á que se debe, dixo, antes que a ningún outro interese.

César Cambeiro, nº 13 da lista e presidente da asociación veciñal Xurde Caldebarcos, aclarou os por que da súa implicación na vida política mediante as candidaturas do BNG, pois dixo, Caldebarcos necesita máis que nunca un goberno que escoite aos veciños, e a única alternativa ante as políticas de dereitas exercidas por PP e PSOE é o BNG. Asi, dixo que o primeiro e máis importante que debería facer un alcalde con respecto a Caldebarcos é «deixarnos traballar» en vez de «tentar asfixiarnos», o que ilustrou enumerando as moitísimas ocasións en que o actual goberno municipal boicotou actividades do colectivo veciñal, polo simple feito de que o alcalde entendiu nalgún momento que non eran «da súa corda».

Moncho Noceda, candidato á alcaldía de Carnota, tras agradecer aos colectivos de Caldebarcos a súa inmensa actividade, aclarou que a prioridade do BNG é a democracia participativa dando voz a cada colectivo do noso municipio e facéndoos partícipes de toda a vida municipal. Por outra parte lamentou os ataques do actual executivo á iniciativa veciñal, cuxo caso máis sangrante é a entrega das escolas á iniciativa privada, prohibindo no mesmo a intensa axenda de cursos e actividades que viñan desenvolvendo os colectivos. Noceda comprometeuse a chegar a acordos co empresario para que volva permitir actividades, e mesmo a valorar a futura dotación dun novo local veciñal máis espazoso e equipado. Tamén anunciou exencións de impostos a todas as actividades veciñais que revirtan no ben da sociedade, caso dos arranxos de muiños polos que o actual goberno municipal lles cobrou inxentes sumas de máis de 3 mil euros en concepto de licenzas.

A continuación, a veciñanza tomou a palabra para pechar o acto, salientando novamente as críticas aos continuos atrancos postos polo PP á actividade veciñal, e negativa do goberno a acometer diversas tarefas de mantemento que se lle solicitaron tanto a nivel individual como colectivo, e novamente o sectarismo na actitude e o clientelismo nas contratacións.

Darlle a palabra á sociedade funciona

Se algo vimos detectando grazas a este novo formato de actos do BNG de Carnota, nos que a sociedade exerce de poñente, é que a xente se sentía orfa de espazos de opinión e decisión, e que está farta de supostos líderes que só acaban representándose a si mesmos.

Ademais, o BNG desbotou a posibilidade de que nesta campaña veñan poñentes de fóra de Carnota a explicarlles á xente como funciona este concello, como practican o resto das forzas. Ninguén mellor que os veciños membros da candidatura para ser interlocutores do BNG coa xente, e ninguén mellor que a xente para falar dos problemas e das urxencias do seu pobo.

Tampouco quixo o BNG caer na guerra de obras de PP e PSOE. Levando adiante a defensa da democracia participativa, no programa do BNG case non figuran actuacións concreta, que están todas recollidas nun documento aparte que os veciños axudan a completar no día a día e que servirá como guía de traballo a partir do 22 de maio. O BNG entende que esta campaña ten que servir para falar do futuro e para decidir o tipo de goberno que queremos: un que escoite as demandas da sociedade (o BNG) ou un que se saque do sombreiro proxectos extrafalarios sen consultalos con ninguén máis, chámense cidades privadas para xubilados, macropiscinas descubertas ao pe do Atlántico ou paseos marítimos de medio cento de quilómetros.

Este é o modelo de goberno que quere practicar o BNG se o 22 de maio conta co suficiente respaldo dos veciños, e ese será o auténtico cambio que se produza despois das eleccións, onde a xente non está chamada a votar un cambio de caras senón un verdadeiro cambio na forma de facer as cousas: a alternativa que representa o BNG.

O BNG suspende hoxe todos os actos electorais en solidariedade cos falecidos e damnificados polo terremoto de Lorca

2011-05-12T09:25:00.000+02:00

O Bloque Nacionalista Galego suspende por hoxe a súa campaña eleitoral para mostrar o seu pesar pola traxedia de Lorca. Por tanto non vai ter lugar o encontro previsto para este tarde entre o BNG e mariñeiros e mariscadores de Lira e O Pindo.

O BNG querse dirixir especialmente ás familias e aos achegados das vítimas producidas polo terremoto para facerlles chegar a súa solidariedade.

A formación nacionalista enviou un telegrama ao alcalde de Lorca para o facer partícipe da dor que no pobo galego ten producido este terríbel acontecimento.

Os portavoces nacional e de pesca do BNG reúnense mañá co sector mariñeiro do noso concello

2011-05-11T14:18:00.004+02:00

Bieito Lobeira e Guillerme Vázquez

Os referentes máis destacados do Bloque Nacionalista Galego non son alleos ás inquedanzas da sociedade carnotá, nin moito menos as dun colectivo tan fundamental da economía nacional e local como son as do colectivo mariñeiro e mariscador, e moi en especial os proxectos de turismo mariñeiro Pindo Mariño e Mar de Lira e sobre todo a Reserva Mariña de Lira que hai poucas semanas estivo ao borde da desaparición por culpa da falta de apoio institucional.

Por iso Guillerme Vázquez, portavoz nacional do BNG, e Bieito Lobeira, portavoz de pesca (quen elevara ao Parlamento a preocupación veciñal polo abandono da Reserva), vanse achegar mañá, xoves 11 de maio a partir das 17:00 da tarde, ao noso concello para interesarse polas problemáticas e os proxectos dos mariñeiros e mariscadores de Lira e O Pindo.

A visita comezará cunha recepción na Confraría do Pindo, desde onde partirán cara á Confraría de Lira para manter o encontro co sector, no que tamén participará Ramón Noceda, candidato á alcaldía de Carnota.

O BNG de Carnota chama a participar neste encontro a toda a veciñanza, e nomeadamente aquela que depende directa e indirectamente do noso mar, pois os ataques ao futuro deste sector están á orde do día: aeroxeradores maríños, xaulas de salmón, aumento das vedas, redución dos cupos de pesca, supresión das axudas ás mariscadoras, falta de apoio á Reserva Mariña de Lira...

Novas relacionadas
O BNG traslada ao Parlamento a preocupación de veciños e sectores polo futuro da Reserva Mariña de Lira
Hoxe remata a vixilancia na Reserva de Lira... asina para que non morra!
Quen é quen no conflito das xaulas de salmón?
O BNG esíxelle ao alcalde de Carnota que aclare se estuda instalar xaulas de salmón nas nosas costas
A Reserva é Vida! Non deixemos que morra!
O PP ameaza agora a Reserva Mariña de Lira, un exemplo para o mundo

Coa forza da mocidade hai futuro en Carnota!

2011-05-09T23:49:00.013+02:00

Galiza Nova da Costa da Morte vén de presentar en sociedade un impactante traballo audiovisual encamiñado a arengar á mocidade a implicarse nos problemas que lle afectan, comezando co seu apoio ás candidaturas do BNG o vindeiro 22 de maio pero extendendo este compromiso cun futuro mellor no día a día.

Da gusto ver que en toda a comarca hai xente nova que decide dar a cara para axudar a cambiar o mundo no que viven, combatindo todas as calamidades destes tempos como paro, emigración, falta de oportunidades e de alternativas de lecer... que en Carnota alcanzan extremos insospeitados pola ausencia de políticas propias, o dispendio de recursos e tamén o clientelismo e partidismo en todas as contratacións.

No video tivemos representación da mocidade carnotá a través de Nuria Pampín, Chema Riveiro, Iván Franco e Mario Maceiras, que nun ton constructivo chaman á xente nova a participar no deseño dun futuro mellor, con máis autoorganización, máis emprego e máis oportunidades para todos independentemente da súa forma de pensar.

Tampouco podía faltar no video a mocidade acumulada de Ramón Noceda, candidato á alcaldía de Carnota, que aproveitou para pedir a implicación da xente nova na vida local.

O video estreouse esta mesma fin de semana no marco dun intenso Encontro da Mocidade durante o que Galiza Nova quixo presentalle á mocidade da Costa da Morte os candidatos e as propostas xuvenís do BNG da comarca.

Para colaborar con Galiza Nova nesta campaña ou no futuro, podes contactalos aquí.

Gran participación veciñal en Lariño no primeiro mitin de campaña

2011-05-08T18:59:00.000+02:00

O local dos veciños de Lariño acolleu onte o primeiro acto do BNG de Carnota para darlle a coñecer á sociedade as propostas e as ideas do BNG para devolverlle o concello aos veciños o 22 de maio.

Rafa Sestaio, mozo de Lariño que participa na sétima praza da candidatura do BNG, foi o encargado de abrir o acto ante máis dun cento de veciños, e animou a todo o pobo a sumar a súa forza e ilusión á do BNG para poder comezar a revertir dunha vez por todas o abandono no que se atopa Lariño e todo o concello de Carnota.

Logo foi Ramón Noceda, candidato á alcaldía de Carnota, quen tomou a palabra para explicar as ideas forza dun programa cos pes na terra que fuxe de personalismos e proxectos faraónicos para centrarse na xente e dalle a voz aos veciños, pois é a sociedade quen coñece cales deben ser as políticas a aplicar.

Dito e feito. A veciñanza integrouse no acto como nunca, debatindo os maiores defectos da acción municipal estes catro anos, sobresaíndo o abandono de ríos, praias e o medio natural de Lariño, asi como a discriminación e falta de oportunidades e tamén o despotismo por parte do alcalde, que se negou reiteradamente a atender demandas veciñais.

Moncho Noceda recolleu o guante e comprometeuse a devolver a trasnparencia ao goberno municipal, rematando co clientelismo nas contratacións, e promovendo o asociacionismo para que toda a veciñanza se implique en asuntos de primeira orde, coma os orzamentos, as obras e mesmo na priorización dos investimentos municipais.

Por outra parte, lembrou Noceda que a situación do concello non convida á euforia pois é hoxe crítica, polo que a austeridade debe ser a pedra angular de toda a acción municipal, mais o goberno debe dar exemplo: se gaña as eleccións o BNG só terá unha única dedicación exclusiva, a do alcalde, sempre inferior a dous mil euros brutos.

Por outra parte, no debate aberto os veciños lamentaron que as demais forzas de Carnota non queiran apoiar o Parque Natural do Monte Pindo, proxecto que con Noceda será unha prioridade e converterase no piar do desenvolvemento futuro de Carnota.

Cumpriuse a intención inicial dos convocantes e o acto resultou aberto, participativo e útil para o futuro de Lariño e todo o concello. Pero ademais, sorprende a alta asistencia nun día tan triste, pola mala meteoroloxía pero tamén pola coincidencia co enterro de varios veciños, aos que Ramón Noceda fixo unha sentida mención trasladando o ánimo do BNG ás súas familias.

Coñece o noso programa de futuro para Carnota!

2011-05-05T14:05:00.001+02:00

Hoxe o BNG de Carnota presenta na rede o seu programa de futuro que, coa axuda de todas e todos os veciños, vai servir a partir do 22 de maio para restituir a transparencia e a democracia no noso concello, implicar a toda sociedade no desenvolvemento municipal e, sobre todo, encamiñar o Concello de Carnota hacia un futuro máis coidado, máis ilusionante e con máis oportunidades para toda a veciñanza, que debe volver a sentirse parte orgullosa do sitio onde vive.

Preme aquí para ver todos os contidos.

Portada do Programa de Goberno do BNG

Como exercer o teu voto se o 22 de maio estarás temporalmente fóra do estado español

2011-04-12T14:59:00.001+02:00

Continuando coa campaña informativa para facilitar a participación dos veciños que non poderán achegarse a votar en Carnota o vindeiro 22 de maio, o BNG informa agora de como deberán facer os cidadáns que, estando censados en Carnota, se atopen desprazados temporalmente fóra do estado español.

Requisitos previos
Deberás estar censado en Carnota.
Se aínda tendo a nacionalidade resides permanentemente fóra do estado español, non terás dereito ao voto nas eleccións municipais.
Ata o 22 de abril
Preséntate en calquera oficina consular co Documento de Identidade, e solicita o voto por correo. Nese momento terás que indicar o enderezo ao que che enviarán toda a documentación, polo que debes comprobar detidamente que conteña todos os datos necesarios para que a recibas sen dificultades.

Ata o 29 de abril
Unha vez cumpridos todos os requisitos e feito este trámite, recibirás no domicilio que facilitastes a seguinte documentación:
Papeletas do BNG e doutras forzas políticas que concurran en Carnota.
Sobre de votación (sen texto nin signo distintivo algún)
Enderezo da Mesa Electoral que che corresponde
Certificado de inscrición no Censo Electoral
Folla explicativa do procedemento
Unha vez recibida e comprobada toda a documentación, escolle a papeleta da túa forza política e, sen máis, introdúcea no sobre de votación, que é aquel que carece de textos e signos distintivos. Pecha ben o sobre.

Ata o 18 de maio
Introduce o teu sobre de votación e mais o certificado de inscrición noutro sobre e envíao por correo certificado e urxente ao enderezo da túa Mesa Electoral, que é aquela que che indicaron cando che enviaron a documentación.

É crucial que o fagas deste xeito. Un bo número de papeletas son habitualmente invalidadas por mandarse por correo ordinario, por ter riscados e tachados na papeleta ou no sobre, por ir a papeleta no sobre equivocado, ou por este conter outras cousas aparte da papeleta de votación. Aínda que ti poidas entender que o sentido do teu voto é evidente, é posíbel que se considere nulo e non tería ningunha repercusión no futuro de Carnota.

Outros datos de interese
Lembra que no caso da veciñanza desprazada que reside dentro do estado español, existe outro procedemento.
Unha vez completado o proceso de voto por correo, non será posíbel votar personalmente na túa mesa electoral o 22 de maio.
Para que a túa papeleta sexa válida, deberás ter dereito a sufraxio activo o propio día da votación. Calquera circunstancia que limite o dereito a voto o 22 de maio invalidará a participación, aínda que si se tivese no momento de exercer o voto por correo.
Se tes calquera dúbida, contáctanos en carnota@bng-galiza.org.

Exerce o teu voto por correo se non vas estar en Carnota o 22 de maio

2011-04-02T22:03:00.010+02:00

O BNG de Carnota informa a toda a veciñanza que se por calquera motivo non vai poder achegarse á súa mesa de votación o 22 de maio, xa pode solicitar a documentación para votar por correo. A continuación explicamos como facelo e evitar os disgustos de última hora.

Do 29 de marzo ata o 12 de maio

Persóate en calquera oficina de Correos e pide a solicitude para poder votar. Despois de cubrilo e asinalo, acude novamente a entregalo. Nese momento, o funcionario de Correos acreditará a túa identidade mediante o teu DI, pasaporte ou carné de conducir. En todo caso deben tratarse de documentos orixinais con fotografía, mesmo se están caducados: non admiten resgardos de renovación nin fotocopias. Nese momento indicarás o domicilio onde queres recibir a documentación necesaria para votar, non podendo atoparse fóra do estado español.

Do 2 de maio ata o 15 de maio
Recibirás no domicilio que indicastes na solicitude toda a documentación necesaria para votar por correo:
Papeletas do BNG e doutras forzas que se presenten en Carnota
Sobre electoral
Certificado de inscrición no Censo Electoral
Sobre co enderezo da Mesa na que che corresponde votar
Folla explicativa do procedemento
Deberás ser ti mesmo quen recolla en man toda a documentación e asine o recibín do correo certificado, non podendo deixar a ninguén ao cargo de recollela. Se non estiveras para recollela, deixarante un aviso para facelo personalmente na oficina de Correos máis próxima.

Ata o 18 de maio
Unha vez recibida e comprobada toda a documentación, escolle a papeleta da túa forza política e, sen máis, introdúcea no sobre de votación, que é aquel que carece de textos e signos distintivos. Pecha ben este sobre e introdúceo no segundo sobre, que é aquel no que figura o enderezo da túa Mesa Electoral en Carnota. Envíao por correo certificado antes do mércores 18 de maio, e xa está.

É crucial que o fagas deste xeito. Un bo número de papeletas son habitualmente invalidadas por mandarse por correo ordinario, por ter riscados e tachados na papeleta ou no sobre, por ir a papeleta no sobre equivocado, ou por este conter outras cousas aparte da papeleta de votación. Aínda que ti poidas entender que o sentido do teu voto é evidente, é posíbel que se considere nulo e non tería ningunha repercusión no futuro de Carnota.

Outros datos de interese
Unha vez completado o proceso de voto por correo, non será posíbel votar personalmente na túa mesa electoral o 22 de maio.
Para que a túa papeleta sexa válida, deberás ter dereito a sufraxio activo o propio día da votación. Calquera circunstancia que che limite o dereito a voto o 22 de maio invalidará a túa participación, aínda que si o tiveses no momento de exercer o voto por correo.
As persoas impedidas para acudir a votar ou facelo por correo poderán facelo mediante un certificado médico oficial no que se constate o motivo, e un poder notarial no que se designe unha persoa representante. Ambos documentos son de balde. A persoa representante pode solicitar o voto por correo dunha soa persoa impedida, e debe ser esta quen reciba a documentación no seu domicilio. A partir deste momento, a persoa representante continuará co procedemento do xeito normal.
Se tes calquera dúbida, contáctanos en carnota@bng-galiza.org.

O BNG de Carnota estrea a versión móbil da súa páxina

2011-03-30T20:55:00.006+02:00

O BNG de Carnota renova a súa aposta polas novas tecnoloxías e anuncia a presentación dunha versión da súa páxina web m.bng-carnota.org especialmente adaptada para os dispositivos móbiles.

Nos máis de 6 anos de esforzo por achegar as posturas do BNG de Carnota á sociedade pola rede, viñemos constatando un exponencial incremento dos accesos desde móbiles Symbian (277), iPhone (137), Android (58), BlackBerry (6) ou mesmo iPod, que nin sequera é un móbil propiamente dito.

Co gallo de facilitar o acceso desde dispositivos que en moitos casos non consiguen reproducir axeitadamente algúns os contidos, xa sexa polas súas limitacións técnicas ou pola escasa velocidade de acceso a Internet dispoñíbel en Carnota, desenvolvemos esta nova versión móbil que alixeira e simplifica extremadamente a carga e a visualización de todos os contidos, e por suposto sen cercenar as opcións máis aprezadas polos nosos usuarios, como poden ser as imaxes ou a posibilidade de comentar libremente os artigos.

O BNG de Carnota agarda que esta iniciativa contribúa a achegar os nosos posicionamentos e propostas a máis veciños aínda, na liña de ampliar o noso compromiso cunha información transparente e sen intermediarios, tamén por internet, desde sempre e non só un mes cada catro anos, como practican as demais forzas políticas do noso municipio.

Podes acceder á páxina web do BNG de Carnota dende o teu móbil con este código QR:

Novas relacionadas

A web do BNG consolídase como referente internacional sobre Carnota

O BNG traslada ao Parlamento a preocupación de veciños e sectores polo futuro da Reserva Mariña de Lira

2011-03-26T23:26:00.005+01:00

Os deputados nacionalistas Bieito Lobeira e Carlos Aymerich rexistraron esta semana no Parlamento Galego un documento en defensa da Reserva Mariña dos Miñarzos (Lira), que xa puxemos en coñecemento da Confraría de Pescadores, no cal se pregunta polos recentes acontecementos que fan sospeitar que o futuro da Reserva non está entre as preocupacións dos gobernos da Xunta de Galicia nin tampouco do concello de Carnota, ambos en mans do PP a día de hoxe.

Despois de que durante semanas vivísemos unha grave ameaza á viabilidade da Reserva de Lira por mor da supresión da súa vixilancia, grazas á presión veciñal e política conseguiuse que ese servizo siga de momento, aínda que moi mermado con respecto á súa situación anterior pola importante redución do investimento. O BNG pregunta se isto ten que ver cunha eventual retirada do apoio á Reserva por parte da Consellería do Mar, e se iso á súa vez tería algo que ver coa suposta pretensión do alcalde de Carnota de importar ás nosas augas as infames xaulas de salmón.

O BNG esixe que a Consellería do Mar garanta a estabilidade financeira da Reserva a medio e longo prazo, pois isto é nin máis nin menos o que obriga a lei, evitando dunha vez estes vaivéns que enchen de intranquilidade as traballadoras e os traballadores do noso mar.

Pregunta parlamentaria do BNG

Novas relacionadas
Hoxe remata a vixilancia na Reserva de Lira... asina para que non morra!
Quen é quen no conflito das xaulas de salmón?
O BNG esíxelle ao alcalde de Carnota que aclare se estuda instalar xaulas de salmón nas nosas costas
A Reserva é Vida! Non deixemos que morra!
O PP ameaza agora a Reserva Mariña de Lira, un exemplo para o mundo

O BNG transformará Carnota desde a sociedade e para a sociedade

2011-03-21T16:50:00.017+01:00

Máis dun cento de veciños arrouparon en Caldebarcos o equipo que vai transformar Carnota

Desbordáronse todas as previsións de asistencia á cea-presentación da candidatura do BNG de Carnota: máis dun cento de veciños achegáronse a Caldebarcos para arroupar masivamente a posta de longo de Moncho Noceda e do equipo do BNG de Carnota. Foi durante un acto que culminou en festa rachada e que foi presentado pola responsábel local, Belén Campos, no que tamén estiveron acompañados polo deputado Bieito Lobeira.

Nun ambiente cordial, alegre e sobre todo fraternal, os veciños e as veciñas coñeceron a candidatura do BNG e tamén a idea estrela: transformar Carnota desde a sociedade e para a sociedade. Como explicou Ramón Noceda, lonxe de propostas irrealizábeis, o BNG é consciente da absoluta ruina económica e social do executivo municipal en mans do PP, e sinalou que só co apoio da sociedade e para a sociedade Carnota pode aspirar a ter un futuro digno, e onde os seus fillos e fillas non se vexan abocados a gañarse a vida fóra.

Menos control político, máis futuro

Moncho Noceda explicou as liñas xerais do programa

Para iso, o BNG traballará para deixar atrás o férreo control político vixente en temas como contratación, proxectos, investimentos... e para normalizar a vida política municipal. Estes catro anos o goberno de Carnota trasladoulle á sociedade a idea de que se non es do PP, non tes nada que facer, mentras se dedicaba ao dispendio nos seus propios intereses. O BNG vai rachar esta tendencia e aspira a contar co suficiente apoio veciñal para substituir a intolerancia por participación social, normalidade democrática e priorización de investimentos e proxectos que atendan as necesidades máis apremiantes da sociedade.

En definitiva, o BNG devolverá aos veciños o control sobre os seus recursos, democratizará a vida municipal e racionalizará o gasto público. Neste sentido, Noceda tamén anunciou que o BNG só apoiará unha única dedicación no goberno municipal, a do alcalde, goberne quen goberne, e esta non excederá en ningún caso os 2.000 euros; un soldo xusto, realista e acorde coas posibilidades dun concello coma Carnota.

Propostas desde a sociedade para a sociedade
Ramón Noceda adiantou que os grandes proxectos do BNG para Carnota non serán entelequias, senón que o BNG impulsará iniciativas que xa están perfiladas grazas ao protagonismo que adquiriu a sociedade estes 4 anos para compensar a parálise municipal: creación do Consello Local de Pesca para apoiar os proxectos Mar de Lira (ameazado agora pola desidia da Xunta e do alcalde de Carnota), e Pindo Mariño, e para devolver a dignidade ao colectivo mariñeiro e marisqueiro; posta en valor do monte e do agro, recursos hoxe abandonados pero fundamentais para o desenvolvemento de Carnota; revitalización do tecido empresarial, dotando de solo empresarial o municipio; saneamento financieiro, acabando co saqueo de recursos municipais para políticos e acólitos; restitución de todos os servizos sociais suprimidos ou reducidos nesta lexislatura (axenda cultural, asistencia a domicilio, residencia da terceira idade, centro de día, gardería infantil); e, por suposto, declaración de Parque Natural no Monte Pindo, que incríbelmente non apoian PP nin PSOE.

Para facer o documento o máis representativo posíbel das demandas reais da veciñanza, o BNG pode agradecer que contou coa colaboración de ducias de colectivos e de centos de veciños de todos os lugares na redacción das súas propostas, e antes de presentar o documento definitivo vaino expor novamente a todas as entidades sociais para a súa avaliación final conxunta.

Xente real

Foto: La Voz de Galicia

Propostas reais para xente real; este é o espírito das propostas nacionalistas. Pero para desenvolvelas, tamén contarán con persoas reais, representativas dos movementos sociais, coñecidas e queridas pola veciñanza e sobre todo dispostas a traballar por e para todos e cada un dos veciños de Carnota. Nos postos de saída a lista está conformada por, ademais de Moncho Noceda, a actual concelleira Merche Díaz (O Pindo), Iván Franco (Carnota), Antón Federico Beiro (San Mamede), Belén Campos (Caldebarcos), Carme Siaba (Lira) e Rafael Sestayo (Lariño). A candidatura completa supón unha profunda renovación, unha importante presenza feminina e tamén unha xusta representación de cada localidade para que todas e todos os veciños se poidan ver reflectidos na alternativa que propón o BNG.

Bieito Lobeira arengou o cambio en Carnota e Galiza

Lobeira intervén rodeado por Moncho e Merche

O acto rematou coa intervención de Bieito Lobeira, que saudou emocionado a ilusión que percibe entre os veciños por un futuro mellor, e salientou que o BNG é a forza que encarna as esperanzas de cambio non só en Carnota, pois PP e PSOE están tan seducidos polos intereses e os poderes económicos que se esqueceron da poboación á que se deben. Neste punto, Bieito fixo unha sentida mención ao falecido compañeiro Euloxio Franco, pois ao igual que o BNG estivo sempre a carón dos veciños aos que se debía, momento que arrincou o aplauso máis afervoado e prolongado da noite.

A candidatura do BNG de Carnota

1. RAMÓN NOCEDA CAAMAÑO
2. MERCEDES DÍAZ MAYÁN (O Pindo)
3. IVÁN FRANCO CAAMAÑO (Carnota)
4. ANTÓN FEDERICO BEIRO OREIRO (Canedo)
5. BELÉN CAMPOS DÍAZ (Caldebarcos)
6. CARMEN SIABA DOSIL (Lira)
7. RAFAEL SESTAYO LOURO (Lariño)
8. JOSÉ ANTONIO DOMÍNGUEZ CAAMAÑO (Carnota)
9. JOSÉ MANUEL TRILLO SABORIDO (Maceiras)
10. BETTY RIVEIRO COSTA (O Pindo)
11. ENCARNA BEIRO GONZÁLEZ (San Mamede)
12. PEDRO BALAYO CAAMAÑO (Lira)
13. CESAR CAMBEIRO QUINTELA (Caldebarcos)
14. JOSÉ MARÍA RIVEIRO SIABA (Louredo)
15. FATIMA DOSIL CAAMAÑO (Lira)
16. MARÍA LUISA AGULLEIRO MALVÁREZ (San Mamede)
17. MARCELINO SABORIDO LAGO (Mallou)
18. CONSUELO LAMELA PIÑEIRO (O Pindo)
19. MIRTA CAMBEIRO CAAMAÑO (Vilar de Carnota)
20. RUBÉN GONZÁLEZ LAGO (Lariño)
21. JOSÉ MARÍA SILVA MARTÍNEZ (Adraño)

Hoxe remata a vixilancia na Reserva de Lira... asina para que non morra!

2011-03-17T16:00:00.008+01:00

Hoxe remata o contrato da vixilancia ao coidado da Reserva Mariña dos Miñarzos en Lira, e tal como vimos denunciando desde varias entidades non hai visos de que a Xunta estude sequera a posibilidade de manter a vixilancia.

Máis ao contrario, a Xunta pronunciouse hoxe para dicir que o control sobre a reserva está garantido co servizo de gardacostas, afirmación que só fixo alporizar máis aos afectados, por resultar claramente insuficiente. Hoxe mesmo, Xosé Antonio Insua, patrón maior da Confraría de Lira, pronunciouse nos medios de comunicación para lamentar esta decisión e para advertir que de non manterse o servizo tal e como está plantexado ás portas dunha das mellores mareas do ano (a coca de maio), a inxente produción marisqueira será completamente arrasada polo furtivismo.

O BNG de Carnota segue a apoiar a reclamación das confrarías diante da Xunta de Galiza e da conselleira do mar Rosa Quintana para que non se liquiden as reservas mariñas. Anunciamos ademais que nos uniremos a calquera mobilización ou iniciativa da veciñanza para loitar polo mantemento das Reservas.

Ti tamén podes achegar a túa reclamación. Isto temos que paralo entre todas e todos. Escríbelle á conselleira!

VIXILANZA PARA AS RESERVAS MARIÑAS PESQUEIRAS

Asina e pide á Xunta de Galicia e á Consellería do Mar que reconsidere a súa posición e que faga as xestións necesarias, pero que non permita que as reservas se queden sen vixianza, xa que o furtivismo remataría en poucos días o que os pescadores artesanais conseguiron en moitos anos.

A ATENCIÓN DA CONSELLEIRA DE MAR ROSA QUINTANA - XUNTA DE GALICIA

ASUNTO: FALTA DE VIXILANCIA NAS RESERVAS MARIÑAS DE CEDEIRA E OS MIÑARZOS

Estimada Sra Conselleira do Mar,

Quero expresarlle a miña preocupación pola situación que se aveciña en relación coa Reserva Mariña de Interese Pesqueiro " Os Miñarzos" de Lira e Ría de Cedeira. Estas reservas naceron co obxectivo de protexer e favorecer a rexeneración dos recursos pesqueiros, de impulsar a pesca e o desenvolvemento sostible e de conservar a flora e a fauna do medio mariño e a súa diversidade. De feito, estas reservas mariñas de interese pesqueiro foron noticia en todo o mundo. Os propios pescadores foron os impulsores da súa creación, os que reivindicaron o seu traballo e os seus produtos e os que crearon numerosos proxectos pioneiros en España como o de ofrecer pescado e marisco de consumo responsable a toda a Península e Baleares a través da Fundación Lonxanet.

Pero souben que o día 17 de marzo finalizará o contrato do servizo de vixianza da reserva mariña Os Miñarzos e Ría de Cedeira, e as confrarías de pescadores expresaron a súa preocupación porque, de momento, non teñen constancia de que exista unha alternativa. Ao parecer, a Consellería de Pesca decidiu non renovar o contrato coa empresa que se encarga de vixiar as reservas debido ao elevado custo do servizo.

Considero que de non se renovar, se poñerá en perigo o traballo e os esforzos realizados nos últimos anos. Abonda un período de tempo curto sen vixilancia para que este esgotamento se produza

Por este motivo, pregamos á Xunta que busque outras estratexias e medidas para a vixilancia da reserva mariña de interese pesqueiro, non só para protexer o gran valor ecolóxico que posúen, senón o interese de tantos pescadores artesanais que despois de sufrir a marea negra do Prestige, souberon reinventarse, unirse e traballar duro para escapar da crise pesqueira que afrontaba o sector.

Por todo iso pídolle urxentemente que restitúa o sistema de vixianza das Reservas Pesqueiras mencionadas, para evitalo furtivismo e permitir que perdure un exemplo de coxestión que tan bós resultados está a dar.

Atentamente,
O teu nome

NOVAS RELACIONADAS
Quen é quen no conflito das xaulas de salmón?
O BNG esíxelle ao alcalde de Carnota que aclare se estuda instalar xaulas de salmón nas nosas costas
A Reserva é Vida! Non deixemos que morra!
O PP ameaza agora a Reserva Mariña de Lira, un exemplo para o mundo

Quen é quen no conflito das xaulas de salmón?

2011-03-16T22:46:00.008+01:00

Moito deu que falar a última bombeirada do alcalde de Carnota, tras postular as augas do noso municipio como posíbel destino das xaulas de cría en cautividade de salmón que foron rexeitando concello tras concello no noso entorno. Mais poucos se pararon a explicar que son estas xaulas, por que son nocivas e, sobre todo, quen son os (i)responsábeis que tentan crear estas instalacións que cada día teñen máis inimigos. O BNG de Carnota segue adiante co seu compromiso informativo coa veciñanza con este humilde pero esperamos clarificador artigo.

Quen creou este conflicto?

Carmen Gallego, ex-conselleira de Pesca

O conflito das xaulas xurde nos últimos compases do anterior goberno da Xunta, despois de que a daquela conselleira de Pesca Carmen Gallego autorizara a instalación de xaulas no polígono Ribeira C da Ría de Arousa.

Xa daquela o proxecto merecera severas críticas tanto polo BNG como polo PP. A estas críticas axiña se sumaron as de confrarías, armadores, mariñeiros, mariscadores... En definitiva, todo o mundo parecía coincidir no mesmo: o noso litoral non é sitio para estas instalacións. Vendo a que se estaba armando coas eleccións galegas do 2009 á porta, o PSOE cambiou a súa postura afirmando que as xaulas tiñan que abandonar a ría de Arousa, e comezou a barallar ubicacións alternativas (Ons, Muros-Noia,…).

E a empresa ficou impasíbel?

Non. A empresa tiña unha concesión da consellería de Pesca e xa se di que vai reclamar arredor dun millón de euros como indemnización, que sairán dos petos de todos os galegos.

Cal foi a resposta do PP ante estas xaulas?

Depende do momento. En novembro de 2008, aínda na oposición, o PP opoñíase rotundamente a través do seu voceiro de pesca, José Manuel Balseiro Orol. Este reclamou unha explicación da Xunta "ante a confirmación de que unha empresa privada está a introducir salmón para o seu cultivo en cautividade no polígono Ribeira C da Ría de Arousa".

En xaneiro de 2009, a poucos meses das eleccións, o PP séguese amosando abertamente contrario a estes proxectos: O mesmo voceiro declarou que poñía en perigo o peixe e o marisco, mentres engadía: “na Consellería de Pesca son totalmente conscientes, malia que o oculten, que a cría de salmón nas nosas rías é inviable e desaconsellable pola súa evidente perniciosidade”. Os últimos días antes das eleccións, o PP chegou a esixir que as xaulas desapareceran de Galiza.

Cando pasou o PP a defender as xaulas?

O PP defende na Xunta o que atacou como oposición

Despois de 2 anos criticándoas, xusto ao acceder ao goberno da Xunta, o PP comeza a atopar pegas á retirada das xaulas que esixiran tan efusivamente desde a oposición. Malia todo, seguiron criticando o proxecto, pero máis por motivos técnicos que por outra cousa.

De feito, o director xeral de Competitividade e Innovación Tecnolóxica, Juan Carlos Maneiro (PP), afirmou no Parlamento que a Xunta non está a favor delas porque “a súa colocación foi realizada de xeito precipitado e sen unha análise firme sobre a viabilidade ambiental, económica e social, prexudicando ao sector produtor que xa estaba traballando”. Maneiro tamén cuestionaba a súa viabilidade, “incompleta con menos de 20 xaulas”. Noutras palabras, o PP pasou de pedir que desapareceran, a pedir que se puxeran como Dios manda.

Agora, o cambio radical dos "populares" lévaos a defender as xaulas a capa e espada coa excusa dos postos de traballo, nega que sexan perxudiciais e xa non ven necesaria a retirada das xaulas. Incluso a Consellería do Mar de Rosa Quintana acábase de reunir con alcaldes do PP para tentar convencelos de que acollan no seu concello as xaulas que absolutamente ninguén quere. Só picou José Oreiro, alcalde de Carnota polo PP, ofrecendo as augas do noso concello para estas instalacións tan dañinas.

Por que dicides que son dañinas?

As xaulas de cría de salmón xenéticamente modificado (transxénico) son un inmenso foco de contaminación por saturación de materias orgánicas e inorgánicas, e pola emisión a mar aberto de produtos contaminantes para as costas, para os fondos e para a fauna salvaxe:

Contaminación por nitróxeno e fósforo como consecuencia da sobrecarga de alimento, feces e elementos de excreción dos salmóns.
Contaminación por cobre debido ás operacións de limpeza, pinturas antifúnxicas das balsas-gaiolas e alimento sobrante.
Propagación de enfermidades á poboación nativa e reprodución cos animais silvestrados cos conseguinte contaminación xenética, como consecuencia de eventuais escapes de salmóns.
Uso de antibióticos (para diminuir a mortandade dos salmóns) que provocan resistencia na flora bacteriana e enfermidades nos peixes silvestres.

Estes perigos ninguén os negou nunca, nin sequera o PSOE e o PP, sempre e cando non tiveran responsabilidade directa sobre a súa instalación: cando o PSOE gobernaba defendiunas, e o PP na oposición criticounas, e viceversa: despois do cambio de goberno, os papeis tamén se invertiron.

Pero xera postos de traballo?

Non está nada claro cantos postos de traballo podería xerar, iso depende das dimensións das instalacións e do seu número, asi como da vontade da empresa concesionaria, que non ten ningunha obriga real de manter un número de empregos. Por poñer un exemplo, piscifactorías que prometeran xerar centos de postos de traballo abriron as portas cunha ducia de prazas de aparcamento nas súas instalacións, asi como inmensas canteiras que desfán montes enteiros mantéñense cun ou dous empregados... A excusa dos postos de traballo para autorizar explotacións contaminantes irreversíbeis é tan previsíbel que abre a porta á desconfiaza.

Pero ademais, cantos postos de traballo se destrúen en Carnota se esta ameaza biolóxica e ambiental se convirte en realidade e a contaminación das xaulas acaban afectando ao entorno? Falamos de arriscar un sector primario enteiro, o pesqueiro/marisqueiro, que da substento a centos de familias de Carnota. Falamos de acabar definitivamente coa Reserva Mariña de Lira e con toda a labor a prol do desenvolvemento substentábel da costa que viña caracterizando as nosas confrarías nos últimos anos. Falamos da posíbel contaminación bioloxica do prestixioso abano de peixes e mariscos das nosas costas. Non é xustificábel desde ningún punto de vista.

E o BNG, que posición mantivo en cada momento?

Bieito Lobeira (BNG) trasladou o conflito ao Parlamento

O BNG mantivo e mantén unha única postura: sempre estivo do lado dos afectados, eclaramente posicionado en contra da instalación destas xaulas. Foi a única forza política en trasladar este debate ao Parlamento Galego, primeiro da man de Bieito Lobeira xa en novembro de 2009 e de novo da man de Ana Pontón e de Bieito Lobeira en decembro de 2010. Foi a primeira forza política (e en moitos casos a única) que apoiou a oposición veciñal e sectorial en cada localidade, a última onte mesmo en Muros, con goberno nacionalista apoiado polo PP.

O BNG esixe que a Xunta deixe de experimentar con este cultivo acuícola de consecuencias imprevisíbeis para a pesca tradicional e se poña a traballar en fórmulas que creen postos de traballo sen poñer en perigo os xa existentes, moito menos nun campo tan delicado como son pesquerías e bancos marisqueiros galegos, e moitísimo menos nas inmediacións dunha Reserva Mariña exemplar e estudada no mundo enteiro, como pareceu defender José Oreiro.

Se o PP quere axudar as traballadoras e traballadores do noso mar, que comece por garantir a vixilancia da Reserva Mariña dos Miñarzos en Lira. Se o PP quere apoiar o sector, que repoña as axudas de 557 euros ás mexilloeiras con máis de 65 anos que non cotizaron dabondo para cobrar a xubilación, que acaban de suprimir. Se o PP quere mellorar as condicións de vida dos nosos mariñeiros, que fagan como o BNG e comecen por poñerse a traballar da man das confrarías, que son os que máis saben do mar, antes de sacarse da chistera proxectos de bombeiro que producen máis dano, malestar e problemas que beneficios.

En definitiva, se o PP quere falar de mar contando cos afectados (mariñeiros e mariscadores), pode contar co BNG ao seu carón. Agora ben, se o PP pretende gobernar a golpe de arroutada poñendo en risco o futuro da nosa pesca e marisqueo, vai contar co BNG xusto en fronte.

Novas relacionadas

O BNG esíxelle ao alcalde de Carnota que aclare se estuda instalar xaulas de salmón nas nosas costas

2011-03-16T16:41:00.009+01:00

Cartel do BNG en defensa da Reserva

Poucos días despois de sabermos que a Reserva Mariña de Lira estaba a piques de desaparecer debido á falta de interese das institucións implicadas por conservar o servizo de vixilancia, agora o alcalde de Carnota acaba de abrir unha enorme polémica ao asegurar nun acto partidario da Xunta que estaría disposto a que Carnota acollera nas súas augas as famosas xaulas de cultivo de salmón que ningunha outra localidade aceptou nas súas, mesmo algunhas gobernadas por alcaldes do seu mesmo partido.

Segundo se explica nos medios de comunicación, diversos portavoces populares entrevistáronse recentemente coa actual conselleira do Mar, Rosa Quintana, para trasladarlle a súa preocupación polas posíbeis consecuencias nocivas deste tipo de instalacións nos seus concellos e sobre todo o sentir absolutamente contrario entre as veciñanzas e confrarías.

Foi durante esta xuntanza cando, nunha aparente arroutada mediática, o alcalde de Carnota José Oreiro levantou a voz para facer xusto o contrario aos seus homónimos, postulando Carnota para acoller nas súas augas estas instalacións que non quere máis ninguén

Trátese dunha intención real ou un simple afán de notoriedade mediática do alcalde, o BNG adianta a súa oposición frontal a este tipo de instalacións, completamente incompatíbeis e contrarias co espírito das reservas mariñas que, ademais, están xa en perigo pola propia desidia da Xunta.

Ademais o BNG de Carnota anuncia que vai esixir por escrito a convocatoria urxente dun Pleno da corporación municipal, para que o alcalde explique estas desafortunadas declaracións, pois no caso de pretender sementar as nosas costas destas instalacións consideradas altamente contaminantes, pode irse preparando para recibir unha forte e multitudinaria resposta da veciñanza e de todos os sectores implicados.

O PP négase a apoiar o Parque Natural, e ás poucas semanas da luz verde a tres parques eólicos na zona; o PP deixa morrer a Reserva Mariña de Lira, e aos poucos días ofrece as augas de Carnota para a piscicultura altamente contaminante. Casualidade?

Novas relacionadas

A Reserva é Vida! Non deixemos que morra!

2011-03-15T17:06:00.000+01:00

Ven á presentación da nosa candidatura!

2011-03-11T09:52:00.011+01:00

O BNG de Carnota convídate a participar na Cea-presentación da nosa candidatura, que terá lugar o sábado 19 de marzo en Caldebarcos.

Lobeira é deputado desde 1995

No acto, onde nos acompañará o deputado Bieito Lobeira, presentaremos as mulleres e homes que van formar parte da lista do BNG nas vindeiras eleccións municipais de Carnota, asi como das liñas xerais do noso programa, para o que contamos cunha importantísima participación veciñal, o que nos da plena confianza en que as nosas ideas van respostar ás necesidades reais de cada lugar e parroquia.

Con este acto tamén queremos agradecer a enorme colaboración e entusiasmo amosado polos veciños e as veciñas do noso concello con este proxecto para que o 22 de maio poidamos, despois de catro anos, devolver a ilusión e a esperanza a toda a cidadanía.

Vinde e participade con nós!

Sábado 19 de marzo a partir das 20:00 horas
Lugar: Restaurante O Feitizo (Caldebarcos)
Prezo da cea: 20 € por asistente
Podes confirmar a túa asistencia aquí, no local do BNG de Carnota ou nos números de teléfono 617306669 ou 625382644

O PP ameaza agora a Reserva Mariña de Lira, un exemplo para o mundo

2011-03-10T13:23:00.001+01:00

O BNG de Carnota súmase á preocupación amosada pola Confraría de Pescadores de Lira tras a supresión da vixiancia na Reserva Mariña dos Miñarzos, o que na práctica pode supoñer a súa sentenza de morte por deixar completamente desamparado un proxecto que foi noticia en todo o mundo e mesmo se está a exportar a outras latitudes.

Algunhas voces xa califican a idea de reservas sen vixiancia como reservas de papel, posto que ao carecer de efectivos para facer respectar as limitacións nestes espazos protexidos estas pasan a ser pouco menos que un brindis ao sol desde o 16 de marzo, cando finaliza o contrato que mantén o servizo de vixilancia ata agora financiado pola Unión Europea a través do Fondo Europeo de Pesca. A Xunta segue sen dar sinais de vida.

O BNG de Carnota denuncia que unha iniciativa pioneira que partiu de Lira, Carnota e Galiza para o mundo non mereza o máis mínimo interese por parte dos gobernos "populares" de Carnota e de Galiza, que cada vez están máis alleados do interese xeral da cidadanía, e van a deixar morrer un proxecto que converteu as nosas costas nun verxel de especies de sumo interese científico, supuxo un revulsivo para o noso xa maltratado sector pesqueiro e converteu as nosas costas nunha fonte de interese internacional.

Anunciamos asi que apoiaremos as reivindicacións da Confraría de Pescadores de Lira, que agrupa os intereses de todo un sector de primordial importancia para as pequenas poboacións costeiras coma a nosa, e que van ser unha vez máis os que paguen as culpas dunhas políticas nefastas, fronte ás cales deben existir forzas coma o BNG que se posicionen inequívocamente ao lado dos intereses da xente.

Mulleres: o motor deste País! Sábado 12 en Lira, acto público polo Día Internacional da Muller Traballadora!

2011-03-09T12:51:00.001+01:00

Esta semana celebramos o Día Internacional das Mulleres, que ten lugar no medio dunha importante ofensiva regresiva en canto ás políticas de igualdade imprescindíbeis para avanzar cara a unha sociedade máis democrática, que artelle medidas que atendan ás demandas das mulleres e loiten contra a discriminación de xénero.

Un bo exemplo desta política regresiva de recortes é a eliminación das axudas ás mariscadoras e tamén das axudas para as mulleres que sofren violencia de xénero. Unhas decisións que, baixo a excusa dos axustes debidos á crise, agravan a situación das mulleres galegas e sobre todo no rural.

Tampouco en Carnota somos alleos ás consecuencias dunhas políticas equivocadas para afrontar os problemas das mulleres. Todo o paquete de medidas sociais postas en marcha polo anterior goberno municipal, impulsadas pola concelleira do BNG Merche Díaz, foron suprimidas en canto o PP accedeu ao goberno: Asistencia a domicilio, cursos de alfabetización, idiomas ou informática, asi como actividades formativas, de lecer e sensibilización dedicadas en exclusiva aos colectivos feminino, da terceira idade ou diabéticos, só por poñer uns exemplos, desapareceron da axenda do goberno municipal, máis partidario das iniciativas de bombo e pandereta que daquelas que poden supoñer unha axuda real aos sectores da nosa sociedade máis desatendidos.

Para dar a coñecer a perspectiva e as problemáticas das mulleres traballadoras na Costa da Morte, Galiza Nova está a preparar unha interesante xornada que se vai desenvolver o próximo sábado en Lira baixo o título "As mulleres traballadoras na Costa da Morte", coa seguinte axenda:

ACTO PÚBLICO: A MULLER TRABALLADORA NA COSTA DA MORTE
Sábado 12 de marzo a partir das 19:00h no Bar Pedra Pas (Lira)

Presentan:
Zaira Trillo. Responsábel de Mulleres Galiza Nova Costa da Morte
Belén Campos. Responsábel local do BNG de Carnota
Intervirán:
Merche Díaz. Concelleira e ex responsábel de servizos sociais, familia e muller do Concello de Carnota
Pepita Fernández. Mariscadora
Rosa Pedrosa. Moza empresaria
Iria Aboi. Secretaria Xeral de Galiza Nova
Ao remate haberá uns pinchos. Non faltedes!
(Aqui podedes confirmar a asistencia en Facebook)

Un experto do BNG explica en video a Lei de Augas

2011-03-02T21:35:00.002+01:00

Gonzalo Castro, asesor xurídico do BNG, explica o contido da Lei de Augas de Galiza, unha norma aprobada en solitario polo PP no Parlamento Galego que mesmo triplicará o que a xente ten que pagar pola auga. A lei é especialmente inxusta para a xente do rural galego, pero para que resulte máis "dixeríbel" o PP prevé aplicala en toda a súa dimensión só unha vez pasadas as eleccións municipais, para intentar minimizar o previsibel desgaste para os seus candidatos en vilas e cidades.

Convidámosvos a velo, nomeadamente a aquelas e aqueles que non tivérades a oportunidade de asistir ás charlas informativas que desenvolviu nas últimas semanas o BNG de Carnota no Pindo, Carnota, Lariño, San Mamede, Caldebarcos ou Mallou., durante os que explicamos a Lei polo miúdo, respostamos todas as vosas dúbidas e distribuimos copias da nova normativa aprobada polo PP entre as comunicades de augas e tamén quen no-la solicitara.

Novas relacionadas

A xustiza lexitima as reivindicacións do BNG e dos traballadores de Servia

2011-02-25T22:47:00.008+01:00

A folga de novembro puxo luz e taquígrafos sobre a total incompetencia do PP para resolver os problemas dos carnotáns

Despois de meses cos gobernos de Carnota e Ames sementando sospeitas sobre a lexitimidade da folga indefinida na recollida do lixo de novembro, a Xustiza finalmente ditaminou que a mobilización foi totalmente legal.

Euloxio Franco denunciou en outubro os impagos do PP

A sentencia vén a recoñecer de xeito póstumo que Euloxio Franco non se equivocaba nas súas advertencias nin na súa defensa decidida dos traballadores de Servia, malia que durante aqueles días parecía que só o BNG estaba da parte da xente. Como ben explican desde o Comité de Empresa en declaracións á prensa, «agora a Lei danos a razón, os que mentían eran outros que agora teñen que tragarse as súas palabras», deixando en evidencia os executivos de Carnota e Ames (PP, PSOE), que intentaron desviar a atención dos multimillonarios impagos do servizo e culpando a traballadoras e traballadores aos que só lles preocupaba poder cobrar a fin de mes.

Se ben o efecto da folga fora case nulo en Carnota polo civismo dos traballadores á hora de respeitar os servizos mínimos, a mobilización deixara ao descuberto a incompetencia do PP para xestionar este concello. A pesar de que o BNG levaba meses advertindo do que finalmente acabou pasando, o PP de Carnota non fixo absolutamente nada antes, durante nin despois do conflicto. Ata o punto que tivo que ser a Xunta de Feijóo quen retivo as contas de Carnota para conseguir que pagara e Ames quen finalmente conseguiu que se desconvocara a folga.

Os impagos do PP levaron a Carnota a ser a primeira deudora do servizo por habitante, cunha débeda que segundo as nosas estimacións ascende a preto dun millón de euros. Nos últimos meses, os únicos pagos que o goberno de Carnota desembolsou polo lixo son os que lle retén pola forza a Xunta de Núñez Feijóo, 71.000 € mensuais procedentes dos fondos de cooperación local.

O BNG de Carnota denuncia que o PP intenta tapar os furados que provoca a súa propia mala xestión e os seus inxentes salarios políticos con cartos que deberían ser destinados a mellorar os servizos e as infraestructuras do noso concello, mentras que os cartos que os veciños pagan por ese servizo non aparecen. E é que os veciños de Carnota seguimos sen resposta á pregunta que Euloxio Franco, tristemente falecido o pasado domingo, lle dirixiu en outubro ao goberno municipal: onde están os cartos dos veciños?

Novas relacionadas

Falece Euloxio Franco

2011-02-20T15:17:00.000+01:00

Carnota amenceu hoxe consternada pola morte dun dos seus veciños máis queridos e socialmente activos, o concelleiro do BNG de Carnota, Euloxio Franco Barba, con só 55 anos.

Hai poucos anos Euloxio viña de instalarse de novo en Carnota coa súa familia, despois dunha longa etapa emigrado en Euskadi, onde participou moi activamente no Centro Galego de Barakaldo e tamén mantivo unha activa vida política, cultural e sindical, a través da asemblea do BNG na emigración basca e chegando a presidir o sindicato de transportes de Euskadi.

Cando por fin viu a ocasión de retornar a Carnota, Euloxio estabeleceu axiña contacto co BNG da localidade, destacándose en pouco tempo como un dos militantes máis comprometidos e activos non só coa causa nacionalista senón con calquera causa social e incluso deportiva, mantendo unha intensa participación no tecido asociativo e máis recentemente, incorporándose á directiva da Asociación Monte Pindo Parque Natural.

No político, Euloxio foi elixido no 2007 para encabezar a candidatura do BNG de Carnota na terceira praza, e que alcanzou abondo respaldo veciñal para obter a acta de concelleiro, que vén desempregando con moita notoriedade e humildade en diversos temas de moita relevancia veciñal, pois o que máis inquedaba a Euloxio eran as preocupacións primeiras da veciñanza de Carnota, que o levou a manter un intenso e permanente contacto directo coa sociedade. Por iso mereceu renovar a confianza da Asemblea local do BNG, que o acababa de designar para recuncar na 3ª praza da candidatura nacionalista, obxectivo que desgrazadamente se acaba de ver truncado.

Euloxio deixounos esta mañá de xeito repentino, despois dun tempo aqueixado de problemas de saúde que en ningún caso o fixeron desistir do seu compromiso coa sociedade carnotá e con Galiza en xeral. Máis ao contrario, a difícil situación do concello levárao a plantexarse as vindeiras eleccións municipais coa maior das ilusións polo cambio político en clave de País que sempre defendeu que precisaba Carnota.

Euloxio deixa muller, dous fillos, e acababa de ver nacer o seu primeiro neto, pero tamén lega a súa enerxía e gañas de transformar a sociedade aos seus compañeiros, nos que caiu como un auténtico varapao a desgrazada nova do seu pasamento.

O corpo de Euloxio morriu hoxe, pero a súa forza seguirá por sempre viva na súa familia, nos seus compañeiros e nos seus veciños, que xa o botamos terribelmente de menos. Descansa en paz, compañeiro.

Sábado 12, charla sobre a Lei de Augas no colexio do Pindo

2011-02-10T16:55:00.000+01:00

O BNG de Carnota continúa co seu compromiso informativo para que os veciños tomen conciencia dos contidos e repercusión da lei de Augas que a Xunta de Galiza pretende impoñer á cidadanía supoñendo un novo golpe tributario ás súas economías.

Tras Carnota, Lariño, San Mamede, Caldebarcos e Mallou, serán agora os veciños de Panchés, A Curra, Quilmas e O Pindo os que poderán asistir á charla informativa terá lugar o próximo sábado 12 de febreiro no Colexio do Pindo, a partir das 6 da tarde.

Novas relacionadas

Carnota acolle unha nova charla sobre a Lei de Augas

2011-01-31T14:11:00.002+01:00

Tras o burdo intento do PP no goberno de Carnota por desinformar a veciñanza mentindo e restándolle importancia a contidos e repercusión da Lei de Augas pola cal a Xunta pretende colarnos despois das eleccións municipais gravames por toda utilización da auga, para incluso obrigarnos a pagar traídas veciñais e pozos particulares, o BNG renova o seu compromiso informativo con toda a veciñanza para que esta poida coñecer coa lei na man o alcance real desta medida que vai supor un tremendo golpe ás economías familiares.

Asi, Carnota será a localidade que continúe a xira de charlas informativas que xa celebramos en Lariño, San Mamede, Caldebarcos e Mallou.

A charla informativa terá lugar o próximo sábado 5 de febreiro no Salón de Actos do Concello, a partir das 6:30 da tarde.

A charla centrarase nas poboacións de Carnota a Pedrafigueira, incluíndo Vilar, Nóutigos, Insua, Lagareiros, Pedramarrada...Convidamos a toda esta veciñanza a asistir, en especial aos membros de comisións de augas. Asi mesmo, a quen o desexe entregaránselle copias da lei.

Novas relacionadas

O BNG de Carnota inaugura esta fin de semana o seu local

2011-01-19T21:15:00.002+01:00

A Asemblea local de Carnota do BNG vai inaugurar este sábado 22 ás 18:30 da tarde as súas novas instalacións, sitas no nº 8 das Breas (a carón da ferretería e en fronte do estanco), en pleno centro de Carnota. Contan co valor engadido de ser o primeiro local do frentismo carnotán na súa historia.

O novo local non só aspira a mellorar o funcionamento e coordinación do BNG, senón que pretende converterse axiña nun punto de encontro de toda a poboación, que poderán obter aquí máis información sobre o proxecto nacionalista pero sobre todo poderán transmitirlle á primeira forza da oposición carnotá todas as súas inquedanzas, asi como as súas ideas para ir facendo entre todos que o noso municipio sexa un pouco mellor cada día.

Para acadalo, o local xestionarase dun xeito dinámico, como se dun servizo público se tratase, e estará tamén a disposición do puxante tecido asociativo do noso concello, que desgrazadamente case en ningún caso conta cun lugar en condicións no que reunirse para preparar as súas actividades.

Toda a veciñanza está convidada a coñecer e usar o novo local desde este sábado a partir das 18:30, cando ofreceremos uns petiscos.

Os veciños de Lariño poderán achegarse ao seu local veciñal a coñecer a Lei de Augas

2011-01-11T20:35:00.000+01:00

Continuando coa xeira de charlas informativas que xa se celebraron en San Mamede, Caldebarcos e Mallou, será agora Lariño quen acolla unha nova charla informativa do BNG sobre a Lei de Augas mediante cal a Xunta do PP pretende estabelecer pasadas as eleccións gravames por toda utilización da auga por parte dos veciños, incluso os pozos particulares e as traídas veciñais.

A charla informativa terá lugar no local veciñal de Lariño (a carón do cemiterio) o sábado 15 de xaneiro, ás 6 da tarde.

Como vén sendo habitual, facemos extensivo o convite a toda a veciñanza.

Novas relacionadas

Mallou acollerá a vindeira charla explicativa sobre a Lei de Augas

2010-12-22T14:15:00.002+01:00

Logo do éxito das celebradas en San Mamede e Caldebarcos, o BNG de Carnota continúa agora en Mallou a súa campaña informativa porta a porta sobre a Lei de Augas pola cal a Xunta pretende estabelecer gravames por toda utilización da auga por parte dos veciños, incluso os pozos particulares e as traídas veciñais.

A charla informativa terá lugar no local veciñal de Mallou o xoves 23 de decembro, ás 8 da tarde.

Convidamos a toda a veciñanza a asistir para conseguir que estas charlas sigan sendo tan participativas e resolutivas como o foron ata agora, e que a ninguén lle queden dúbidas sobre o alcance real desta Lei, que o Partido Popular na Xunta de Galicia pretende aplicar estratéxicamente só unha vez pasadas as eleccións municipais.

Novas relacionadas

O BNG explicaralle este domingo a Lei de Augas aos veciños de Caldebarcos

2010-12-17T16:51:00.004+01:00

Ducias de veciños achegáronse o pasado domingo ao Viso

Tras o éxito da charla desenvolvida a semana pasada en San Mamede, o BNG de Carnota prosegue coa súa labor informativa explicando porta por porta as consecuencias da Lei de Augas, da que canto máis vamos sabendo máis prexuízos detectamos para as economías familiares da nosa veciñanza, nuns tempos particularmente difíciles.

Ramón Noceda e Antón Beiro

Asi, a nova cita será este domingo 19 de decembro para os veciños e as veciñas de Caldebarcos e Panchés, comezando puntualmente ás 12:00 da mañá nas Escolas de Caldebarcos. Se queredes coñecer como vos afecta a Lei de Augas na vosa situación (como persoa usuaria ou asociada ás diferentes comisións veciñais de augas) non dubidedes en achegarvos a Caldebarcos pois poderedes preguntar todas as dúbidas e expresar a vosa opinión.

Tamén podedes consultar os contidos da Lei de Augas na seguinte ligazón.

Novas relacionadas

O BNG vai explicar a Lei de Augas en todas as parroquias, comezando este domingo no Viso

2010-12-10T19:06:00.000+01:00

O BNG de Carnota vai comezar desde este mesmo domingo 12 de decembro, ás 17:00 horas no Campo do Viso (San Mamede), a explicar por todas as parroquias do municipio as consecuencias da Lei de Augas impulsada polo Partido Popular na Xunta de Galicia, que suporá cambios como que se pasarán a tarificar a auga de traídas e pozos particulares ao mesmo custo que o do servizo municipal.

O BNG denuncia que esta medida ten unha clara motivación recadatoria e vai ser enormemente regresiva para as economías familiares, pois ademais de cobrarlles o seu propio abastecemento de auga obrigará a que a veciñanza asuma os custos dun contador homologado, baixo ameaza de multas de ata 30.000 euros de non facelo. Asi mesmo desaparecen as exencións existentes para os núcleos por debaixo de 2.000 habitantes, que son sen ir máis lonxe todos os de Carnota. Ademais entende o BNG que desde as institucións, especialmente naquelas gobernadas polo PP, estase a ocultar a verdadeira dimensión desta medida.

A esta acción social e informativa do BNG unirase a acción institucional, mediante unha Moción presentada no Concello de Carnota no sentido de que a Corporación inste á Xunta a retirar un cánon que vai supoñer, unha vez máis, un duro golpe ao noso territorio, e dentro del, aos colectivos máis desfavorecidos.

Moncho Noceda será o candidato do BNG á alcaldía de Carnota

2010-11-29T11:55:00.000+01:00

A militancia do BNG decidiu o pasado sábado que Ramón Noceda Caamaño (Lariño, 1954) sexa o novo candidato do BNG á alcaldía de Carnota.

A decisión adoptouse durante a última Asemblea Local que rexistrou a participación do 85% da militancia, e que tamén serviu para nomear as persoas que completarán os postos de saída da candidatura nacionalista nas vindeiras Eleccións Municipais, e que estará caracterizada pola profunda renovación, pola importantísima presenza de mulleres e por verse nela representadas todas as parroquias do municipio.

“Traballamos”, adianta Ramón Noceda, “para presentarlle á veciñanza un equipo ilusionante, formado por persoas moi válidas e tamén moi coñecidas e queridas polos seus veciños, que deben ser quen de sacar o concello de Carnota adiante”.

A respecto da actual situación en Carnota, afirma que “A crise fainos dano, pero non máis que a calquera concello da redonda; en cambio nós temos máis débeda, máis emigración e máis destrución de emprego e servizos. Fronte a esta actitude, cremos que o BNG é a única forza con capacidade para reconducir esta situación”.

O xesto do concello de Ames fai desconvocar a folga do lixo en Carnota

2010-11-22T16:22:00.005+01:00

A pesar de que o Concello de Carnota deu as espaldas ás demandas dos traballadores de recollida do lixo, o que levou á folga indefinida neste servizo, finalmente puido producirse un achegamento entre as partes despois de que a corporación do Concello de Ames aprobara a moción dos traballadores de Servia, coa unanimidade dos votos de PP, BNG, e PSOE, adquirindo o compromiso de facerlle fronte aos pagos, cousa á que Carnota se negara días antes.

Asi a folga foi inmediatamente desconvocada e sen traer consigo males maiores: os servizos mínimos e a propia responsabilidade dos traballadores posibilitou que no caso de Carnota apenas se notase un empeoramento do servizo e que case non se produciran os temidos episodios de amoreamentos de bolsas de lixo nas rúas do noso municipio.

Afortunadamente a folga da recollida do lixo xa é historia, mais a actitude do goberno municipal segue a preocuparlle e moito aos veciños: En lugar de buscar solucións a un problema de tal transcendencia, o executivo de José Oreiro só se preocupou de difamar aos traballadores de Servia e reiterar a súa negativa a aboar a inmensa débeda que o seu goberno vén acumulando desde que accedeu ao poder. Igual que ante a perda das oficinas da Caixa Galicia en Lira e O Pindo, este goberno de Carnota volveu poñer en práctica a táctica do avestruz: agochar a cabeza e agardar que os problemas se arranxen sós.

Moito nos tememos que isto non só se deba á cobardía política, senón que en realidade se trate dunha estratexia para dilatar ata o final da lexislatura os impagos, de xeito que sexa o próximo goberno de Carnota quen teña que asumir unha débeda que estimamos que alcanzará daquela o millón de euros, mentras tanto os cartos que os veciños aboan polo servizo son desviados a outras áreas.

Novas relacionadas

Folga indefinida na recollida do lixo de Carnota

Folga indefinida na recollida do lixo de Carnota

2010-11-12T14:59:00.001+01:00

A insensibilidade e os continuos impagos do goberno municipal levaron aos 150 traballadores da planta de tratamento de residuos de Servia (Lousame) a votar onte a favor da folga indefinida da recollida do lixo no concello de Carnota, pois a súa débeda, que se estima que ascenderá a un millón de euros a finais da lexislatura, ameaza seriamente a continuidade desta planta, considerada das máis limpas e eficientes do estado español. E todo a pesar dos intentos por evitalo do actual presidente da mancomunidade e alcalde de Muros, o nacionalista Domingos Dosil.

Xa a finais de outubro Euloxio Franco, concelleiro do BNG de Carnota, advertira seriamente de que ou o goberno municipal se poñía as pilas ou "só será cousa de tempo ver por primeira vez en Carnota imaxes de bolsas de basura amoreadas na rúa durante meses". En vez de facerlle caso ás advertencias do BNG e atender as demandas destes traballadores (varios deles veciños de Carnota), o goberno preferiu ignorar o problema e nin fixo frente ás súas obrigas nin se dignou a apoiar a moción que os traballadores da recollida levaron ao Pleno, aprobándoa tan só despois de meterlle a tesoira xustamente naqueles aspectos que supoñían un compromiso real na procura de solucións.

Despois deste irrespectuoso xesto, finalmente fixéronse realidade os peores dos presaxios: ante a actitude do alcalde de Carnota os traballadores de Servia non ven máis saída que a mobilización social, mediante unha folga indefinida que deixará en poucos días en Carnota imaxes como a que acompaña este artigo.

O BNG non entende como o goberno de Carnota puido permitir que se chegara a esta situación límite e esíxelle ao PP que se poña por unha vez do lado dos veciños. E non é moito pedir, pois os veciños si están pagando a factura do lixo; o unico que ten que facer o goberno de Carnota é deixarse de excusas e empregar eses cartos no que debe, en vez de destinalos a outras cousas.

Novas relacionadas

[20/10/10] A ruina do concello de Carnota pon en perigo o servizo de recollida de lixo

Crean unha asociación para promover o Parque Natural do Monte Pindo

2010-11-01T01:12:00.003+01:00

A asociación Monte Pindo Parque Natural botou a andar para reclamar desde a veciñanza o que a clase política non tivo a habilidade de liderar, que é nin máis nin menos que a causa en favor da declaración de parque natural para o Monte Pindo, símbolo deste municipio e tamén de toda a Costa da Morte.

Xilberto Caamaño, recén elixido presidente, xa afirmaba na web da asociación que «ningún galego entendería que a Catedral de Santiago estivese abandonada, ou queimara cada dez anos; pois o Monte Pindo é a nosa catedral». Boa mostra do que di é que nos seus primeiros pasos a causa xa suma arredor de 1.500 apoios por Internet, onde está presente en varias plataformas sociais, e avanza cara o medio centenar de socias e socios de todas as procedencias, segundo afirman desde a asociación, que inclúe na súa directiva a unha persoa de cada localidade, en total 11 vogalías territoriais, co que buscan garantir a pluralidade e a proximidade á veciñanza.

O BNG de Carnota saúda esta idea á que expresa o seu apoio decidido, como xa fixera no seu momento, e pídelle ás demais forzas políticas con presenza na Corporación que reconsideren as súas posturas iniciais sobre esta iniciativa que só pode supoñer vantaxes para o noso municipio e o seu futuro.

Quen teña interese pode visitar a páxina de Monte Pindo Parque Natural, onde existe abondosa información sobre a organización, e incluso sumarse á noble causa da defensa do noso medio e do desenvolvemento substentábel de Carnota e o seu entorno.

A ruina do concello de Carnota pon en perigo o servizo de recollida de lixo

2010-10-20T11:35:00.011+02:00

As débedas de varios concellos, destacando os 725 mil euros do executivo carnotán, sitúan ao borde do abismo a planta de tratamento de residuos máis eficiente do estado español

Representantes do BNG dos nove concellos que integran a mancomunidade Serra do Barbanza (Ames, Brión, Carnota, Lousame, Muros, Noia, Pontecesures, Porto do Son e Rois) reuníronse en Noia para reivindicar a viabilidade económica e ambiental do planta de Lousame, así como a súa aposta decidida polos sistemas de compostaxe para a xestión dos lixos, cuxo excelente funcionamento no caso de Servia o levou a obter diversos recoñecementos.

De feito, todas as comparativas deixan en moi mal lugar a SOGAMA, o buque-insignia do modelo de xestión de residuos do PP: Servia é un 30% máis barato, contamina menos, recicla máis e mellor e tamén xera máis postos de traballo. Tal vez isto explique o empeño do PP en tratar de dificultar a súa supervivencia, sexa a nivel Xunta ou concellos: Servia é a demostración de que a súa política de xestión de residuos é un rotundo fracaso.

Os nacionalistas pedíronlles aos concellos que teñen débedas contraídas coa mancomunidade que as paguen canto antes para non pór en perigo a viabilidade da planta, tras o que sinalaron os gobernos de Ames e Carnota como os principais culpábeis do problema.

Ademais, o BNG amosou todo o seu apoio ós 150 traballadores da planta, que onte emprenderon unha marcha hacia Santiago para defender a continuidade da planta e pedir que a Xunta se implique.

Euloxio Franco pregúntalle ao PP "onde están os cartos dos veciños"

O caso de Carnota é espeluznante, pois a pesar de ser o segundo municipio máis adebedado con 725 mil euros, duplica ao primeiro, Ames, en débeda por habitante. A este ritmo, calculamos que o Concello de Carnota adebedará a final de lexislatura un millón de euros.

O concelleiro do BNG de Carnota Euloxio Franco afirmou que os veciños de Carnota pagamos relixiosamente a taxa do lixo, o problema é que eses cartos nunca chegan ao seu destino, polo que lle pregunta ao alcalde "onde están os cartos dos veciños", e avisa que "antes ou despois, queiran ou non, vaise saber que fixo o PP de Carnota con 120 millóns das antigas pesetas que os veciños pagaron pensando que ían para a recollida do lixo".

O edil nacionalista advirte de que, de seguir asi, "só será cousa de tempo ver por primeira vez en Carnota imaxes de bolsas de basura amoreadas na rúa durante días". "Creo que dentro de poucos meses os veciños de Carnota imos ter moito que varrer, en todos os sentidos", sentenciou, ironizando sobre a proximidade das eleccións.

Novas relacionadas

[27/02/10] A Xunta vai reter as contas do concello de Carnota por impagos

O PP de Carnota está en contra de que Monte Pindo sexa parque natural; ao PSOE "nin lle vai nin lle vén"

2010-10-05T20:31:00.014+02:00

Só o BNG votou no Pleno a favor dunha moción que significaría o apoio expreso do Concello de Carnota á declaración de Parque Natural

A moción, presentada o 10 de setembro pola asociación xuvenil Galiza Nova (que leva semanas desenvolvendo unha intensa campaña de divulgación e apoio), solicitaba tres acordos fundamentais da corporación: manifestar o apoio expreso á iniciativa, pedir que a Xunta reúna o Observatorio Galego da Biodiversidade para tratar esta cuestión, e finalmente declarar o Monte Pindo Espazo Natural de Interese Local, máximo xesto posíbel da administración local e que amosaría o seu compromiso claro coa protección e desenvolvemento do Monte Pindo.

Sorprendentemente, a Orde do día só incorporaba nun principio varias mocións do PP e do PSOE, mentras que outras dúas mocións quedaban no tinteiro (a citada de Galiza Nova e outra do BNG polo novo canon da auga), sumándose a outras 13 (todas do BNG) que o goberno de Carnota ten no caixón desde hai meses. Finalmente, despois da protesta da bancada nacionalista, o alcalde aceptou incorporar a moción relativa ao Monte Pindo, pola vía de urxencia.

Por desgraza este xesto foi de cara a galería. O PP de Carnota, co alcalde José Oreiro ao frente, negouse a apoiar a declaración do parque natural para o Monte Pindo, asegurando que "convertiría a Carnota nunha reserva india". Esta absoluta aberración, que só pode ser froito da ignorancia ou do afán de terxiversar e confundir á veciñanza, dista totalmente da realidade, tal e como se lle replicou desde a oposición con sobrados argumentos. Mais iso non variou un milímetro a posición inicial do PP, que acabou votando en contra da moción, seguida pola abstención do PSOE nunha nova mostra de seguidismo e falta de criterio, pois estes nin sequera demostraron ter argumentos propios; continúan como se o que pasa en Carnota non fora con eles. Ao final só o BNG demostrou estar ao lado da veciñanza e dos axentes sociais votando a favor da moción.

Malia o lamentábel desta decisión do goberno municipal, e o ridículo dos seus "argumentos" en contra, sen pretendelo José Oreiro evidenciou o verdadeiro motivo polo que o PP de Carnota non podía apoiar a proposta, ao insinuar que os autores da proposta "non falaran co concello"... Desde aqui queremos dicilo moi claro: o único motivo que ten o PP de Carnota para negarse a apoiar a declaración de Parque Natural para o Monte Pindo é político: a "idea" non é súa, polo tanto o día que o Monte Pindo sexa declarado parque natural, o alcalde non poderá colgarse a medalla, e punto.

Semellante irresponsabilidade non parece digna dun mandatario que se debe aos intereses do pobo que o elixiu, e que ben ao contrario pretende usar o pobo en favor dos seus propios intereses. Afortunadamente, o visto no Pleno non ten maior transcendencia que a de saber que o PP de Carnota estaría disposto a vetar o que posibelmente sexa o proxecto máis ilusionante da historia de Carnota. Porque con ou sen apoio deste goberno municipal, que cada día sintoniza menos cos intereses veciñais, o amplo número de entidades que xa respaldamos a proposta de ADEGA imos seguir adiante grazas ao apoio entusiasta que nos demostran cada día os veciños, polo ben do aproveitamento sostíbel dos nosos recursos, e porque queremos un futuro digno para os habitantes de Carnota, da Costa da Morte e de Galiza.

Se "O Gherreiro" falara...

A charla "Monte Pindo, parque natural!" amosa o entusiasmo de veciñanza e axentes sociais ante a iniciativa

2010-09-20T20:35:00.025+02:00

A charla informativa aberta, organizada por Galiza Nova, congregou o pasado sábado no colexio do Pindo a máis de medio cento de veciños chegados desde todos os puntos do noso municipio e tamén de concellos limítrofes, que puideron descubrir a iniciativa na boca dos seus autores, tomar a palabra e tamén resolver todas as dúbidas.

Abriu a charla Mario Maceiras, responsábel comarcal de Galiza Nova, que tras agradecer a importante asistencia ao acto desmentiu rotundamente que a proposta de declaración de Parque Natural non proceda da veciñanza, como se vén insistindo desde o Concello, pois xurdiu dunha dilatada serie de conversas de veciños adscritos a diversos colectivos cos membros de ADEGA. Asi mesmo, lamentou que o alcalde de Carnota non deixara claro o seu apoio ao parque natural, sementando así dúbidas sobre un proxecto que só pode achegar beneficios non só ao Monte Pindo e a Carnota senón a toda a Costa da Morte, en contraposición ao actual estado de abandono deste espazo. A continuación enumerou as actividades que Galiza Nova vai desenvolver en breve para seguir divulgando e reivindicando a iniciativa, e anunciou que o BNG vai trasladala ao Parlamento Galego.

De seguido tomou a palabra Martiño-Fiz López Lindoso, relator da proposta, biólogo e representante de ADEGA no Observatorio Galego da Biodiversidade, que expuxo detalladamente os aspectos técnicos que xustifican a declaración, e tamén as innumerábeis vantaxes que suporía a nivel ambiental e socio-económico para Carnota e o seu entorno, polo que pediu que o Monte Pindo sexa declarado parque natural, pois considera que non só é a figura de protección e desenvolvemento máis acaída senón que reuniría o 100% dos requisitos para selo. Tal vez foi a súa intervención a que subscitou a anécdota do día, pois ao mencionar o dato da presenza do gato montés no Monte Pindo sóubose que ningún dos asistentes o coñecía, salvo un veciño de Quilmas que o vira nunha ocasión, atropelado.

Por último, Fins Eirexas Santamaria, xeólogo e secretario executivo de ADEGA, repasou as connotacións dun parque natural e relatou experiencias similares en Galiza e tamén no estado español, para rematar salientando que é necesario o consenso de todos, veciños e axentes implicados, para lograr que a Xunta tome a determinación de iniciar os trámites que rematen convertindo o Monte Pindo no séptimo parque natural galego.

Ao rematar as ponencias, outorgouse a palabra ao público, o que posibilitou un animado debate con multitude de intervencións, que ademais de despexar moitas dúbidas demostrou que a resposta veciñal ante o proxecto só se pode calificar de entusiasta, xa que apenas produciu contrariedade. Poñendo a guinda ao acto, a organización regalou camisetas a todos os asistentes.

Quen non quixeron quedar á marxe foron os representantes dunha multitude de colectivos, destacando a ACDR Pedramar do Pindo, a Confraría de Pescadores do Pindo, a Comunidade de Montes de Caldebarcos, a AC Canle de Lira, a Cooperativa Rainha Lupa de Quilmas, a AAVV Xurde Caldebarcos, a Comunidade de Montes de Lira, a Plataforma pola defensa de Quilmas, a Plataforma pola defensa do Río Xallas... asi coma unha ampla representación do BNG, a única formación política que quixo asistir.

Galiza Nova organiza unha charla informativa aberta no Pindo sobre a proposta de Parque Natural

2010-09-14T19:02:00.005+02:00

Galiza Nova organiza o sábado 18 de setembro, ás 18:00 horas no Colexio Público do Pindo, unha charla informativa aberta co título Monte Pindo, parque natural! á que traerán aos propios artífices da iniciativa para explicar en que consiste, e que a veciñanza poida formularlle as súas dúbidas.

No acto, presentado pola flamante responsábel local de Galiza Nova, Nuria Pampín, intervirán o responsábel comarcal de Galiza Nova da Costa da Morte, Mario Maceiras, o relator da iniciativa pola declaración do Monte Pindo como Parque Natural, Martiño-Fiz López, e o secretario executivo de ADEGA, Fins Eirexas (non se descarta que se sumen á palestra outros expertos).

Convidamos a toda a veciñanza (e tamén asociacións de todo tipo) a asistir, pois este acto servirá de presentación oficial da iniciativa no noso concello, e ademais nunha localización tan apropiada como é esta, aos pes do mesmísimo Monte Pindo.

Esta actividade está encadrada na campaña en apoio da declaración do Monte Pindo como Parque Natural, e que xa repartiu de máis de 200 carteles polo concello (e mesmo fóra del e aos Centros Galegos na emigración). Outras actividades divulgativas e reivindicativas xa están sendo perfiladas, e delas iremos informando.

Novas relacionadas

Grupo oficial de apoio na rede social Facebook

Convocatoria da charla en Facebook

Galiza Nova apoia a iniciativa

A campaña de represión política do alcalde de Carnota alcanza agora a concelleiros do BNG

2010-09-13T15:09:00.013+02:00

Despois de ameazar, expedientar e mesmo despedir a varios traballadores do Concello de Carnota ao longo deste mandato por causa da súa implicación política, o alcalde de Carnota decidiu emprendela agora cun concelleiro e membro do BNG, Euloxio Franco Barba, mediante unha absurda carta de ameaza que damos a coñecer á veciñanza, asi como a contestación que lle mereceu o escrito ao afectado.

Escrito de José Oreiro

Resposta de Euloxio Franco

As mostras de indignación entre os veciños de Euloxio Franco non se fixeron esperar; a inmensa maioría deles xa expresaron a súa solidariedade co noso compañeiro e mesmo a súa disposición a testificar no seu favor onde sexa preciso para negar as ridículas acusacións do señor Oreiro. Ademais, na noite do venres apareceron varias pintadas anónimas no centro de Carnota esixindo a "fin da persecución política a Euloxio". Por outra parte, moitos centos de copias do escrito ameazante asinado por José Oreiro e da correspondente resposta foron distribuidas por todas as parroquias do noso concello.

O BNG de Carnota vese obrigado nunha nova ocasión (e que de seguro non será a última) a esixirlle ao señor alcalde e ao goberno do PP de Carnota que cesen de inmediato co acoso aos veciños por mor da súa militancia ou simple simpatía política, e que se ocupen dunha vez das cousas que realmente inquedan aos veciños, como a caída demográfica, o desemprego, a situación desastrosa na que se atopan as nosas infraestructuras, e por suposto a ineficacia e parálise do actual goberno para responder ás problemáticas veciñais, pois ata agora non estiveron á altura dese reto.

O BNG de Carnota apoia a declaración de Parque Natural para o Monte Pindo

2010-09-08T16:29:00.007+02:00

A proposta de ADEGA, apoiada polos maiores expertos galegos en medioambiente, atraerá importantes vantaxes económicas e sociais para os veciños da zona

Profesores universitarios galegos, investigadores e representantes ecoloxistas veñen de presentar ante o Observatorio Galego da Biodiversidade un documento que recopila o enorme interés científico e ambiental da área natural do Monte Pindo e solicitan a creación dun novo Parque Natural, que sería o séptimo existente en Galiza.

O documento salienta a importancia biolóxica, xeolóxica, patrimonial e histórica deste lugar privilexiado que Otero Pedrayo denominou como “Olimpo Celta”, e que na actualidade se atopa enormemente abandonado e infrautilizado por veciños e visitantes.

A figura de Parque Natural contempla destacadas inversións turísticas e ambientais e mesmo sociais non só no seu territorio senón tamén na zona, o que xunto coa facilidade da promoción turística dun parque natural tan destacado suporá, no caso de facerse, un autéctico revulsivo económico na zona. Como exemplo máis cercano, debemos citar o Parque Natural de Corrubedo que xa é dos máis visitados de Galiza e supòn unha das principais fontes de riqueza para os habitantes desa zona.

O BNG de Carnota valora moi positivamente a proposta de ADEGA, amplamente respaldada polos maiores expertos galegos en materia ambiental, por entendermos que a declaración de Parque Natural será moi beneficioso non só para o medioambiente senón para os habitantes do noso concello. Por iso anunciamos que en breve imos iniciar unha campaña reivindicativa, informativa e de sensibilización entre a veciñanza arredor desta cuestión.

O BNG aproveita para facer un chamamento a todos os axentes sociais de Carnota (empresas, veciños, asociacións...) e tamén ás demais forzas políticas representadas no noso concello para apoiar este proxecto de futuro e ilusionante, coa sincera convicción de que grazas á unidade de todos os veciños só será cuestión de tempo que a Xunta decida reunir o Observatorio Galego da Biodiversidade (xa que se atopa inactivo desde a entrada do PP no goberno galego), abrindo asi un camiño que só debe ter un final: A declaración do Monte Pindo como Parque Natural.

O BNG de Carnota presenta alegacións ao POL e convida aos afectados a facer as súas

2010-08-19T21:52:00.006+02:00

Tal e como anunciara recentemente, o BNG fai hoxe público as súas alegacións de carácter xeral que vai presentar en breve ao novo proxecto do Plan de Ordenación do Litoral que vén de presentar a Xunta de Galiza.

Estas alegacións fundaméntanse nos aspectos que pasamos a explicar para o coñecemento de todas e todos os veciños.

O concello de Carnota xa está moi restrinxido urbanísticamente, por verse afectado na práctica totalidade da súa superficie por figuras de protección coma a Rede Natura 2000 ou a Lei de Costas (debendo ter en consideración que o noso concello exténdese por 40 quilómetros de litoral). Aínda entendendo como altamente beneficiosas estas proteccións, que conseguiron atallar a lacra da especulación inmobiliaria na súa etapa máis salvaxe, o BNG defende que a veciñanza si debe contar con zonas para un certo desenvolvemento urbano (regulado e planificado, claro está) asi como para mellorar as construcións xa existentes, o que todos coñecemos como desenvolvemento substentábel do noso entorno.

Por outra banda, o BNG considera demasiado artificioso que en Carnota se xeralice a estrada C-550 como zona límite da edificabilidade entre o interior e a liña de costa, como fai o proxecto actual, e pide que salvo no caso de espazos de interese ambiental se estabeleza unha franxa de 20 metros entre a estrada e a costa no que si se permita a edificabilidade. Asi mesmo, reclama que as liñas que delimitan os espazos de mellora se deseñen cun criterio racional e organizado, e non coas liñas sinuosas e crebadas sen motivo algún que son características no proxecto actual.

Estas alegacións tamén pretenden atallar un dos aspectos que máis demostran a falta de coñecemento sobre o terreo á hora de deseñar este POL, pois establece unhas restriccións paisaxísticas que abranguen por norma xeral territorios ata os 7 metros de altura sobre o nivel dos ríos. No noso concello nin sequera existe ningún río importante (exceptuando o Xallas que o delimita polo norte) senón pequenos regatos que nacen e morren no noso concello, que en ningún caso superan os 3 quilómetros (no máis dos casos apenas chegan ao quilómetro), malia o que se lles aplica a mesma norma que aos grandes ríos de Galiza. Isto, unido á pouca variación de nivel que caracteriza a zona costeira da nosa xeografía, supón que un pequeno regato pode conlevar unha restricción de miles de metros á redonda que afecta e moito aos habitantes desas zonas. O BNG reclama que, no caso concreto de Carnota, esta zona de protección paisaxística se reduza a dous metros de altura sobre o nivel do río.

En definitiva, o BNG de Carnota segue a valorar como positivas as medidas adoptadas para mellorar o Plan orixinal, como xa anunciamos no seu momento. Malia iso, os aspectos citados seguen a ser moi mellorábeis e ademais moitos cidadáns de Carnota seguen a estar afectados pola normativa, e o BNG como organización política ao servizo dos veciños ofrécelles respaldo á hora de recoller e presentar as súas inquedanzas, facéndonos chegar o modelo de alegacións que podedes descargar, imprimir e cubrir (nos formatos PDF ou Word) ata o 30 de setembro deste ano.

Unha vez cubertas, podédesnos facérnolas chegar ao enderezo electrónico carnota@bng-galiza.org, ou por correo ordinario: Asemblea local do BNG de Carnota, CP 15293, Carnota (A Coruña). Tamén podedes chamar ao 696 12 17 58.

Para información engadida sobre o novo proxecto do Plan de Ordenación do Litoral, tamén podedes consultar nas ligazóns orixinais á web da Xunta (na coluna dereita desta páxina).

O PP recúa ante a presión veciñal e modifica o Plan de Ordenación do Litoral

2010-08-06T17:41:00.000+02:00

Ábrese o prazo para que os veciños poidan presentar alegacións

Despois da reacción que o Plan de Ordenación do Litoral viñera a subscitar nas poboacións costeiras de Galiza, a Xunta de Feijóo viuse obrigada a recuar e modificar a práctica integridade do proxecto.

Sen dúbida, esta inesperada marcha atrás tivo moito que ver coa preocupación dos afectados, e tamén coa resposta política que o BNG deu ao Plan ao longo da costa galega. No caso de Carnota, de feito, o BNG foi a única formación que se ocupou de dar a coñecer o Plan entre os afectados, mentras o PSOE calou e o PP tratou de restarlle importancia e só se preocupou polos intereses dos grandes especuladores urbanísticos, tal e como demostrou o polémico escrito de "observacións" presentado polo Concello de Carnota no que só mentaba ese tipo de propiedades e ningunha dos veciños nin das veciñas.

Para poder explicar con fidelidade o Plan á veciñanza, primeiro mantivemos unha reunión co experto en materia urbanística César Mosquera. Unha vez que entendemos a verdadeira relevancia do POL, o BNG de Carnota lanzou unha rolda informativa por todas as parroquias do noso concello, con charlas informativas en Caldebarcos, Quilmas-Curra e Panchés, O Pindo, Lira, Lariño, Carnota e Mallou-Maceiras. Estas xuntanzas contaron cunha notábel participación veciñal, que nos fixeron saber o seu total descoñecemento e preocupación sobre o proxecto, e provocaron -como era de esperar- unha airada reacción do goberno do PP de Carnota, en especial do alcalde José Oreiro, ata o extremo de intentar impedir estas charlas, cousa que só conseguiron no caso da prevista en San Mamede, localidade natal do rexedor. Malia todo, o BNG cumpriu o seu obxectivo e a veciñanza de Carnota puido saber como lle afectaba un Plan de Ordenación do Litoral que supoñía a restricción de edificar e mesmo rehabilitar vivendas en máis do 90% da superficie do municipio.

Agora, afortunadamente a Xunta lanzou unha nova proposta, completamente redeseñada, na que se teñen en conta boa parte das propostas do BNG e dos veciños para poder compatibilizar o respecto ao medio ambiente co desenvolvemento urbanístico substentábel de Carnota, superando unha das maiores eivas que detectáramos no Plan orixinal: Os máis perxudicados eran aqueles que residen en Carnota todo o ano.

O cambio é tan substancial que pasou de afectar nun principio á metade de vivendas do noso concello a apenas unhas ducias delas. Malia o importante logro, o BNG anuncia que vai seguir adiante coas alegacións previstas para que tamén estes afectados poidan dispoñer do respaldo da nosa organización e poder subsanar as eivas que segue habendo. Para iso, o BNG vai distribuir por todas as parroquias planos detallados sobre como quedou o novo Plan de Ordenación do Litoral, poñéndonos á disposición dos afectados para aclarar todas as súas dúbidas e integrar as súas reclamacións no escrito que xa estamos a preparar. Podes poñerte en contacto co BNG de Carnota no teléfono 696 121 758 ou no correo-e carnota@bng-galiza.org. O prazo para formular alegacións remata o 30 de setembro de 2010.

Revista A Moa nº 32 - Verán de 2010

2010-08-05T14:49:00.004+02:00

Edición nº 32 correspondente ao verán de 2010 deste Voceiro local do BNG de Carnota.

Sumario:

Carnota é o concello de Galiza máis gravemente afectado polo Plan de Ordenación do Litoral*
En breve abrirase o prazo para que os veciños poidan alegar*
A Corporación municipal aproba unha iniciativa do BNG para mellorar Correos
O BNG rexeita os orzamentos locais porque son insolidarios e non resolven os problemas de Carnota
O BNG propón que a corporación carnotá se una para pedir a retirada do abusivo «canon da auga»
Fracasa a xestión do Plan E en Carnota, que se converte xa no terceiro concello máis endebedado da provincia
O goberno de Carnota endebedado pola súa política represora dos traballadores e traballadoras
Un Estatuto de Nación para unha Galiza de Primeira

*Actualización: A raíz dos cambios de última hora no Plan de Ordenación do Litoral, decidimos incluír unha separata cos seguintes artigos:

O PP recúa ante a presión veciñal e modifica o Plan de Ordenación do Litoral
Nuria Pampín, nova responsábel local de Galiza Nova

Edicións anteriores

A Moa nº 31 (Primavera do 2010)

A Moa nº 30 (Outono do 2010)

A Moa nº 29 (Especial Eleccións Galegas 1-M)

Ver todas as edicións dispoñíbeis

Nuria Pampín, elexida nova responsábel local de Galiza Nova de Carnota

2010-08-02T20:00:00.004+02:00

A militancia de Galiza Nova elixiu o pasado domingo e por unanimidade a Nuria Pampín Rei como nova responsábel en Carnota. Esta moza de 22 anos, veciña de Lira, toma o testigo no cargo de Mario Maceiras, co obxectivo de continuar cun traballo humilde pero constante ao servizo da mocidade e de Carnota, e tamén co claro reto de dar a coñecer o proxecto nacionalista tamén entre os máis novos.

Na reunión, á que asistiu tamén a responsábel local do BNG, Belén Campos, a militancia carnotá decidiu sobre as liñas de traballo para os próximos meses, co obxectivo de continuar a ser a organización xuvenil referencial na localidade, mais sen perder de vista o duro traballo político que vai esixir a cita coas eleccións municipais, que xa se albisca no horizonte.

Neste senso, Galiza Nova non pode máis que avaliar de "rotundo fracaso" esta lexislatura do goberno municipal do PP, pois "só se ocupou de frear os avances que se conseguiran co anterior goberno nacionalista, pagar favores aos seus sicarios e saír na prensa culpando aos demais do fracaso estrepitoso do seu propio proxecto".

Casos paradigmáticos, denuncia Galiza Nova, foron que o executivo local suprimira as exitosas escolas de idiomas e informática, que rexeitara construír a Galescola cando só restaba adxudicar os traballos, que os postos de traballo dos sucesivos Obradoiros de Emprego estén restrinxidos "para os amigos do PP que nunca xamáis van poñer en práctica esas aprendizaxes", que o edificio público construído polo anterior executivo en Lira para finalidades sociais e veciñais leve 3 anos "sen abrir nin para ventilar", asi como que "despilfarrara" 1,5 millóns de euros do Plan E dándollos íntegros a unha empresa que só creou tres empregos durante catro meses. Para a mocidade nacionalista, esta bagaxe de resultados ilustra "3 anos de oportunidades perdidas para Carnota". Pola contra, Galiza Nova ironizou preguntándolle ao alcalde "cantos postos de traballo vai crear Lady Gaga no noso concello".

Como consecuencia destas políticas, para Galiza Nova "a mocidade de Carnota só foi a menos nestes 4 anos: fomos a menos en emprego, fomos a menos en opcións de formación e de lecer, e o que é peor, nós mesmos (a mocidade) cada vez imos sendo menos". Fronte a este modelo, Galiza Nova ve unha clara alternativa no nacionalismo representado polo BNG, xa que "é a única formación que antepón os intereses de todos os carnotáns aos intereses económicos duns poucos, e tamén aos intereses personais dos que só lles preocupa sentar o cu en Santiago ou Madrid", en clara alusión aos políticos de Carnota que ao longo dos últimos tempos foron desfilando polas institucións galegas e central con máis pena que gloria.

Para vencer esta inactividade que "deixou Carnota en parón indefinido", Galiza Nova chama á mocidade a implicarse e autoorganizarse para "descubrir que iso de que a política é cousa dos políticos simplemente é política mal entendida". Para Nuria Pampín "as rapazas e rapaces teñen que entender que a política é a que nos permite expresar as nosas ideas, os nosos soños para o noso país" e para iso "debemos traballar unidos".

Ligazóns relacionadas

Web nacional de Galiza Nova

A web do BNG consolídase como referente internacional sobre Carnota

2010-07-03T19:42:00.009+02:00

Desde que puxemos este espazo a andar arredor do ano 2005, as cifras de visitantes a esta web non deixan de sorprendernos. O que foi en principio unha páxina concebida para dar a coñecer dun xeito áxil os posicionamentos políticos do BNG aos veciños, e tamén a recoller as súas inquedanzas, agora sérvelle a miles de persoas de todo o mundo para poder manter -aínda que sexa de xeito virtual- un pe no noso concello e saber o que pasa nel.

Só no primeiro semestre deste ano, algo máis de 2.300 persoas accederon a esta páxina. Esa é, probabelmente, unha cifra moi superior a todos os habitantes de Carnota con acceso á "rede de redes". Pero é que ademais, estas visitas prodúcense ao longo e ancho do globo terráqueo. Asi, se ben as visitas proceden amplamente de Carnota e das sete grandes cidades galegas, moitas visitas veñen de lugares tan dispares como España, Catalunya, Euskadi, Canarias, Reino Unido (cunha sorprendente profusión de visitas irlandesas) e outros destinos europeos tradicionais da emigración carnotá: Suiza, Alemaña ou Francia.

Mais os aficionados á actualidade de Carnota non rematan nas fronteiras comunitarias: En lugares como Estados Unidos (sobre todo en Nova York e Nova Jersey, onde se concentran numerosísimos carnotáns emigrados), Canadá, Mexico, Arxentina, Uruguay, Venezuela ou mesmo Colombia, Chile, Perú e Brasil, moitos amigos visítannos con regularidade. En menor medida, pero tamén sorprendentes, son as visitas desde lugares tan exóticos como Rusia, Tailandia, Xapón, Malasia, Australia, India, Nova Zelanda, Arabia ou China... en total 52 países de todos os continentes.

A todos eles vai dedicada esta entrada, pois léveos onde os leve a vida, demostran que seguen tendo un sitio no seu corazón para o seu municipio, cuxas fronteiras chegan aló onde un carnotán se viu obrigado a emigrar para buscar o seu futuro.

Coa forza que nos dan os que están aquí e dos que desgrazadamente xa non poden estar, o BNG vai seguir traballando para transformar Carnota nun sitio do que poidan volver a sentirse orgullosos, e tamén, quen sabe, un sitio ao que poder retornar algún día.

Porque vós tamén sodes de aquí, e merecédelo, grazas.

O BNG propón que a corporación carnotá se una para pedir a retirada do abusivo «canon da auga»

2010-06-30T09:46:00.007+02:00

O BNG vai presentar ao Pleno municipal unha moción contra o «canon da auga» que o goberno de Feijóo pretende impoñer co Proxecto de Lei de Augas de Galiza. Esta norma vai supoñer aínda máis cargas impositivas sobre quen peor o está pasando nestes tempos, as familias e particulares, ao encarecer as taxas e suprimir exencións que xa existían. O claro obxectivo desta medida do PP é duplicar a recadación a conta do consumo de auga das galegas e dos galegos.

Asi, unha persoa que viva soa e que consuma uns 3 m³ de auga ao mes, verá como a carga tributaria do seu recibo da auga se incrementa en máis dun 363%; con ese mesmo consumo unha familia de tres membros soportará un incremento do 171%.

O proxecto tamén suprimirá as exencións tributarias existentes na actualidade para os núcleos de menos de 2.000 habitantes (todos os do noso concello), prexudicando especialmente aos veciños e veciñas do rural, que a partir de agora terán que pagar impostos incluso por usar a auga dos seus propios pozos ou das traídas veciñais, non importanto que teñan ou non acceso a auga ou saneamento públicos.

Esta é unha lei elaborada sen consultar aos concellos galegos, sen discusión previa, obviando a realidade local e a grave situación económica que se sofre no país e nos concellos. E o que é máis grave, non comprende nin unha soa medida que incentive o aforro de auga, máis alá da subida de prezos e da ameaza de fortes sancións económicas a quen, por exemplo, non instale un contador homologado no seu propio depósito de auga.

Por iso o BNG de Carnota propón que a corporación municipal de Carnota esixa a retirada do Proxecto de lei de Augas de Galiza e elaborar un novo proxecto de Lei que si sexa sometido a consulta pública. A continuación, con só pinchar no seguinte documento, poderedes ver o contido íntegro da Moción:

O BNG celebrou onte en Carnota o seu 7º acto informativo sobre o POL

2010-06-21T17:17:00.006+02:00

Onte domingo 20 de xuño o BNG de Carnota reuniuse con veciños de Carnota para explicarlles as consecuencias do POL sobre a localidade na que xa é a séptima reunión desta campaña informativa do BNG sobre o Plan de Ordenación do Litoral, que ten o obxectivo de superar o total obscurantismo das diferentes institucións de goberno sobre este paquete de medidas.

Nesta ocasión tivo a xentileza de acompañarnos o concelleiro de urbanismo de Pontevedra e gran coñecedor do POL, César Mosquera, que xa estivera con nós na primeira charla sobre a cuestión.

Axenda de actos

CARNOTA
Día: Domingo 20 de xuño
Hora: 20:00 h.
Lugar: Colexio Público de Carnota
>Descargar cartel do acto

Novas relacionadas

Carnota é o concello de Galiza máis gravemente afectado polo Plan de Ordenación do Litoral

Grupo en Facebook anima a apadriñar unha "fochanca" da estrada C-550 en San Mamede

2010-06-12T21:24:00.000+02:00

As posibilidades que nos proporcionan as novas tecnoloxías non paran de sorprendernos. A coñecida rede social Facebook, na que xa contan con perfil centos de millóns de persoas en todo o mundo (e como non, tamén centos de veciñas e veciños do noso concello), ve nacer agora unha iniciativa para denunciar dunha forma moi divertida a desfeita da estrada comarcal C-550 ao seu paso pola parroquia de San Mamede de Carnota.

E é que a páxina titúlase "Apadriña unha fochanca da C-550 ao seu paso por San Mamede de Carnota", pola cal "á espera de que as autoridades competentes se decidan a arranxar esta estrada con aspecto de corredoira, bota a andar esta iniciativa solidaria de apadriñamento de fochancas", segundo proclaman os autores da denuncia anónima.

A orixinal iniciativa, que xa conta con máis de 250 padriños, conta cunha ilustrativa galería de imaxes onde se pode observar o aspecto lamentábel da estrada, que non só da unha imaxe terceiromundista do noso concello senón que pon en serio risco a integridade física das persoas que circulan pola principal vía de comunicación do noso municipio.

A veciñanza fai súa a petición de que as autoridades se poñan a traballar dunha vez por todas para solucionar este problema que cada día vai a peor. Mentras tanto, toca apadriñar fochancas.

O BNG continúa coa axenda de actos informativos sobre o POL en Caldebarcos, Lira e O Pindo

2010-06-10T23:48:00.014+02:00

Logo do éxito dos actos que o BNG desenvolveu a pasada fin de semana en Quilmas, Lariño e Mallou sobre o Plan de Ordenación do Litoral (POL), o BNG continúa explicando as súas consecuencias aos veciños de Lira, Caldebarcos e O Pindo* en cadansúa reunión aberta. A continuación podedes ver a axenda para esta fin de semana.

*Nota: O acto do Pindo será ás 20:00 h. (estaba convocado para as 18:00 h.)

Axenda de actos

CALDEBARCOS
Día: Venres 11 de xuño
Hora: 20:00 h.
Lugar: Albergue Municipal de Caldebarcos (antiga escola)
>Descargar cartel do acto

O PINDO
Día: Sábado 12 de xuño
Hora: 20:00 h.
Lugar: Colexio público do Pindo
>Descargar cartel do acto

LIRA
Día: Domingo 13 de xuño
Hora: 17:00 h.
Lugar: Casa do Mar de Lira
>Descargar cartel do acto

Novas relacionadas

Carnota é o concello de Galiza máis gravemente afectado polo Plan de Ordenación do Litoral

O incumprimento de 3 leis leva ao BNG a solicitar a nulidade dos novos Orzamentos Municipais

2010-06-08T23:26:00.011+02:00

Logo de analisar polo miúdo os novos Orzamentos Municipais presentados polo executivo municipal de Oreiro, o BNG de Carnota decidiu presentar alegacións aos graves incumprimentos da lexislación vixente que detectou na súa redacción.

Esta reclamación fundaméntase en tres bloques que pasamos a explicar.

1. O PP desafía o clima xeral de contención dos salarios políticos, que en Carnota aínda medran
A crise económica e social está forzando a numerosas administracións públicas a aplicar unha política -e mesmo a deseñar leis- de recurtes e contención salariais, nomeadamente para os máis gañan, neste caso a clase política. Sen embargo en Carnota o goberno fai oídos xordos a este xeito de moderar o gasto público, e non só: os gastos por este concepto aínda volven medrar.

A reclamación do BNG pretende que alcalde, tenente de alcalde e persoal de confianza do PP de Carnota apliquen unha redución dos seus salarios como medida de solidariedade co colectivos de funcionarios e pensionistas afectados polo decreto do goberno do Estado, axeitándose asi á normativa legal e destinando o que se aforre coa medida ao gasto social.

2. O saneamento de Lariño, inexistente
Outra das alegacións refírese á obriga do goberno local do PP de contemplar nos Orzamentos rematar a rede primaria de saneamento con obras en Lariño, e completar a totalidade da rede secundaria de saneamento no territorio do concello.

Isto incumpre outra das leis a ter en conta á hora de redactar este documento, pois sendo o Concello o obrigado a facilitar este servizo aos veciños e veciñas, e non existindo partida suficiente que permita resolver estas carencias, é necesario que os Orzamentos recollan unha suficiente dotación económica.

A situación actual xa non é que esta partida para o saneamento sexa insuficiente, senón que nin sequera existe.

3. A maior parte dos ingresos, sen xustificar
Dúas supostas partidas de ingresos provintes da Xunta de Galiza e da Deputación da Coruña, cada unha por contías que rondan o millón e medio de euros, están sen xustificar: o documento non acredita que eses ingresos vaian realizarse nin tampouco que finalidade terían. Este incumprimento da lei constitúe por si mesmo un motivo de nulidade dos Orzamentos.

Dase a circunstancia de que, ademais, estas cantidades supoñen a maior parte do apartado de ingresos destes Orzamentos, como xa denunciamos no seu día.

O BNG de Carnota solicita que o goberno elabore un novo documento máis acorde coa realidade e a legalidade

Todos estes incumprimentos motivaron que o BNG presentara as alegacións que podedes ver no documento anexo, e aconsellan que o goberno municipal revogue os Orzamentos aprobados inicialmente para adecualos á legalidade vixente.

Asi mesmo, este paréntese debe servir para refacer aspectos fundamentais para afrontar con garantías os tempos que se aveciñan, axeitando os ingresos á realidade para impedir unha situación de falta de liquidez e tesoureiría, para poder pagarlle a provedores, e evitar as débedas e situacións negativas na economía do Concello de Carnota que levamos meses vendo.

Documento para descargar

Alegacións do BNG de Carnota aos Orzamentos Municipais 2010

O BNG de Carnota vai explicar o POL por todas as parroquias

2010-06-01T09:52:00.014+02:00

Ante a total desinformación veciñal sobre as consecuencias do Plan de Ordenación do Litoral (POL) no noso municipio, o BNG de Carnota vai iniciar esta fin de semana unha serie de actos para explicarllo a todos os veciños e recoller as súas inquedanzas.

Axenda de actos

(Iremos actualizando a axenda segundo vaiamos confirmando os actos)

A CURRA, QUILMAS E PANCHÉS
Día: Xoves 3 de xuño
Hora: 21:00 h.
Lugar: Local veciñal de Quilmas
> Descargar cartel do acto

MALLOU E MACEIRAS
Día: Venres 4 de xuño
Hora: 20:00 h.
Lugar: Local veciñal de Mallou
> Descargar cartel do acto

LARIÑO
Día: Domingo 6 de xuño
Hora: 11:00 h.
Lugar: Local veciñal de Lariño
> Descargar cartel do acto

Novas relacionadas

Carnota é o concello de Galiza máis gravemente afectado polo Plan de Ordenación do Litoral

Carnota é o concello de Galiza máis gravemente afectado polo Plan de Ordenación do Litoral

2010-05-25T12:23:00.020+02:00

Silencio escandaloso do goberno municipal do PP ao respecto

O pasado sábado o BNG de Carnota e varios portavoces veciñais reuníronse no Pindo co deputado nacionalista na Deputación de Pontevedra e experto na materia César Mosquera, para analisar os prexuízos extremos que implicará o novo Plan de Ordenación Litoral (POL) para os e as residentes no noso concello e as súas propiedades.

A análise da reunión serviunos tamén para descubrir o oscurantismo co que o PP está a tramitar a norma, alcanzando no noso concello dimensións de silencio escandaloso, xa que nin alcalde nin outro membro do goberno fixeron unha soa alusión pública ao proxecto, malia ser Carnota o concello galego máis afectado pola nova norma.

Máis de mil vivendas das veciñas e veciños de Carnota, arredor da metade das existentes, van quedar gravemente afectadas, asi como o 90% do chan urbanizábel, se chega a aprobarse este Plan nos termos previstos na actualidade.

Sobre as consecuencias desta normativa sobre esas vivendas, pódese resumir explicando que o POL é tan restrictivo como a xa coñecida Lei de Costas: porá impedimentos á hora de facer calquera tipo de reforma (nin sequera consintirá obras de rehabilitación e mellora) e o que é máis grave, impedirá totalmente a nova construcción nas zonas afectadas.

Con carácter xeral quedará prohibida toda nova edificación entre a estrada C-550 e a liña de costa, asi como da mesma estrada cara o interior, alí onde o POL non recoñeza a existencia dun núcleo consolidado; isto só acontece en casos excepcionais, ao non terse en conta en moitos casos sequera a antigüidade secular de moitas edificacións nin tampouco que respectaran as disposicións legais do momento da súa construción.

A maiores de tales restricións estabelécense sobre o mapa corredores ecolóxicos e "zonas forestais" que atravesan literalmente núcleos habitados desde hai centos de anos, e que pasarían a ter a mesma afectación urbanística que zonas afectadas por Costas, xerando un incertidume veciñal imperdoábel, asi coma a ameaza de futuras expropiacións ou demolicións nos centos de vivendas e propiedades que van quedar afectadas.

Todo indica que este Plan, como xa ten pasado en recurrentes ocasións en temas como pesca, medioambiente ou obras, volve a pecar de estar deseñado desde os despachos da cidade e de espaldas á realidade veciñal. E o que é máis grave, que se está tramitando "polo baixo" e sen proxección mediática ou política de ningún tipo.

A continuación podedes ver o documento, e descargar ao voso ordenador o POL por zonas.

Lenda: En marrón, as edificacións que se respectarán. En laranxa, as dubidosas. En gris claro, aquelas que quedan afectadas. En gris escuro, as afectadas cun tratamento especial.

Documentos descargábeis

Plan de Ordenación do Litoral (Documentación)

POR ZONAS:

Zona AV03: Ézaro - O Pindo (Norte)

Zona AW02: O Pindo - Panchés (Costa)

Zona AW03: Monte Pindo - San Cibrán (Interior)

Zona AX02: Caldebarcos (Costa)

Zona AX03: Bahía de Carnota (Norte) - San Mamede

Zona AY02: Punta dos Remedios - Portocubelo (Lira)

Zona AY03: Bahía de Carnota (Sur) - Lira

Zona AZ03: Lariño

Os orzamentos deixan claro que o goberno de Carnota négase a reconducir unha situación cada vez máis crítica

2010-05-19T18:39:00.024+02:00

Non podemos comezar a valorar o que aconteceu no Pleno Extraordinario do pasado venres 14 de maio sen salientar que é a primeira vez na historia de Carnota que unha cuestión tan importante para o futuro dun concello como son os seus Orzamentos se trata á hora de xantar; moi premonitorio. E é que logo de ver o documento que presentaron, vai parecendo máis lóxico que traten de escondelo dos veciños, da prensa e da oposición: trátanse duns Orzamentos de récord en todos os sentidos, pero desgrazadamente todos son negativos.

Carnota xa duplica o maior déficit que tivera na súa historia
En primeiro lugar cabe destacar o desequilibrado das contas que se presentaron: Cuns ingresos (supostos, como logo veremos) de 6.346.010,52 euros e uns gastos de 5.071.270,42 euros, deixan unha diferencia de 1.284.740,10 euros... que coincide co remanente negativo do exercicio precedente; duplicouse o maior déficit financieiro que se rexistrara en toda a historia de Carnota: todo un récord.

Os salarios políticos do PP de Carnota volven facer historia
Nunca na historia de Carnota os gastos políticos foran tantos e tan elevados, un novo récord negativo da xestión do PP de Carnota.

Alcalde: 51.708,02 euros
Tenente Alcalde: 30.893,80 euros
Contratada política: 38.261,16 euros
Seguridade Social: 32.081,00 euros
Gastos protocolarios, dietas e outros: 35.000,00 euros
TOTAL: 187.943,98 euros

Case 188 mil euros das arcas públicas (uns 313 millóns das antigas pesetas) para tres privilexiados; delirante. O máximo gasto en conceptos políticos que se rexistrara durante todo o mandato anterior (coalición BNG-PSOE) ascendera a 95 mil euros, a metade do que os veciños de Carnota van gastar este ano nos seus políticos, coincidindo coa que seguramente sexa a peor crise económica mundial en 80 anos. Está claro que en Carnota non todos pasan a crise do mesmo xeito.

Nunca se lle debeu tanto aos proveedores
Tan so á empresa concesionaria do lixo débenselle 720.000 euros. Á concesionaria da auga e o saneamento adebédaselle "outro tanto", segundo asegurou o propio alcalde. Por non dicir o resto dos proveedores do concello, cantidades que se ben individualmente non son tan espectaculares, en conxunto si resultan máis que preocupantes, pois estase poñendo contra as cordas a moitas pequenas e medianas empresas do noso entorno, e por tanto asestando un duro golpe á única fonte de ingresos de moitos traballadores, no peor momento.

Máis operacións de tesourería e por máis cartos que nunca
Este exercicio foi o primeiro na historia durante o que se chegou en operacións de tesoureria aos 600.000 euros, unha débeda que multiplica por 10 a que o anterior goberno municipal deixara por este concepto: 60.000 euros.

Os investimentos en proxectos e obras volven a tocar fondo
O investimento do concello é de 637.000 euros, dos cales 271.000 saen exclusivamente do erario municipal. Lembramos que no ano 2007, co BNG aínda no goberno, o investimento previsto foi de 3.760.000 euros, no 2008 foi de 1.929.000 euros (xa gobernando o PP, aínda que aproveitando o rebufo da anterior lexislatura), e no 2009 caeu dramaticamente ata os 660.000 euros; pois este ano aínda van a menos. Unha espantosa caída en picado do investimento (e polo tanto, das obras e proxectos) desde que o PP accedeu ao goberno de Carnota, e que choca claramente coa subida dos soldos dos cargos políticos e a subida de impostos que exporemos a continuación.

Un goberno ao só lle faltou cobrarnos polo aire que respiramos
Outro récord deste mandato foi o de creación de novos impostos, e aumento dos xa existentes. Implantaron a taxa de 400 euros polo enganche ao saneamento (obrigatoria mesmo para parroquias nas que literalmente non existe rede de saneamento á que engancharse). Tamén pasaron a cobrar os seguintes servizos, antes gratuitos: Asistencia a domicilio a colectivos desfavorecidos, 8.000 euros; Expedición de documentos e compulsas, 6.000 euros; Clases de inglés, informática e outros, 8.000 euros; Uso das instalacións deportivas, 8.000 euros. Estas cifras, por suposto, responden ao que o goberno de Carnota prevé recadar con estes servizos. Porque co PP o que importa xa non é a calidade dos servizos que se prestan, senón se se pode cobrar por eles, e a canto.

Por certo, ollo coas présas ou con onde aparcades, teñen pensado recadar 12.000 euros en multas de tráfico.

Maquillaxe de partidas e manipulación das cifras de ingresos
Como non son capaces de facer cadrar os orzamentos, inclúen nas partida dos ingresos a cantidade de 1.868.000 euros de Transferencias corrientes da Xunta e 1.362.000 euros de Transferencias corrientes da Deputación. O sorprendente é que o goberno municipal non soubo xustificar a súa procedencia, evitando responder ás preguntas claras e concretas do BNG sobre o tema.

Polo que se viu, existe a seria posibilidade de que eses ingresos non sexan tales, senón unha operación de camuflaxe dun inxente déficit económico que quedaría moi feo nos titulares de prensa. Porque, se vos fixades, o único que andan publicitando na prensa destes Orzamentos é precisamente iso, o saldo positivo entre gastos e ingresos.

De ser certo que o PP introduciu nos Orzamentos inxentes cantidades ficticias como "ingresos" para ocultar un déficit galopante, abriríase un panorama aínda máis preocupante que todas as desfeitas e calamidades que o goberno de Carnota leva feitas ata agora. Un déficit de caixa soamente se pode cubrir con aforro no gasto ou ben aumento dos ingresos. E como quedou claro que se negan a aforrar aló onde si poden facelo (por exemplo nos seus soldos e os dos seus sicarios), todo indicaría que nos atopamos na antesala dunha suba de impostos.

Conclusión: Os Orzamentos baten todos os récords negativos e non aportan nin unha soa medida concreta ante a crise
A esperanza de que nestes Orzamentos viñera recollida algunha medida plausíbel para aliviar a dramática situación de desemprego e falta de ingresos de centos de familias do noso municipio esfumouse en minutos. Só o BNG parece acordarse de que nos atopamos ante a máis grave crise económica e social da historia recente de Carnota, pedindo no Pleno que se creara urxentemente un Plan de Emprego Municipal a consensuar entre todos os axentes políticos e sociais, asi coma o deseño dun Plan Director de Infraestructuras Municipal a consensuar coa oposición e cos axentes económicos co fin de priorizar os investimentos nas necesidades máis apremiantes, aumentar a participación social e acoutar o descontrol e a desestructuración municipal que estamos sufrindo.

O goberno e a oposición están para buscar solucións aos problemas veciñais
A veciñanza entende que na situación tan dramática na que nos atopamos é imprescindíbel o traballo e a imaxinación de todos os grupos políticos representados en Carnota, levando aos organismos que todos eliximos democraticamente as ideas e propostas que cada sensibilidade vexa positivas, para alí tratalas e desenvolvelas entre todos.

Por desgraza, o PP non só segue deixando pasar o tempo sen plantexar nada senón que nin sequera aceptan debater as propostas que si fai o BNG. E cando un goberno antepón o seu orgullo e interese partidario ao interese de todos os veciños e veciñas, significa que perdeu definitivamente o contacto coa realidade e a consciencia da labor que a cidadanía lle ten encomendada.

Decenas de miles de persoas abarrotan o Obradoiro en defensa da lingua galega

2010-05-17T19:11:00.004+02:00

A plataforma Queremos Galego, que engloba unhas 700 asociacións, conseguiu hoxe que a súa convocatoria coincidente co Día das Letras Galegas abarrotara a praza do Obradoiro de Compostela, grazas a decenas de miles de persoas chegadas desde todos os puntos da nosa xeografía desafiando o sol abrasador e a xornada non laboral nin lectiva.

O inmenso continxente humano partía ás 12 da Alameda compostelá detrás dunha faixa co lema "O galego, a forza do noso amor", frase de Uxío Novoneyra, o escritor homenaxeado con motivo desta xornada de reivindicación das nosas letras. A xornada transcorreu nun ambiente cordial e festivo durante a que non houbo que lamentar ningún incidente, e no medio dun forte descontento pola substitución das políticas lingüisticas consensuadas por todos os axentes sociais e políticos por un novo decreto que, no caso de ir adiante, sería co único apoio do PP e de colectivos marxinais abertamente contrarios á utilización normal do galego na nosa sociedade.

Máis difícil é afinar o número de manifestantes que se citaron hoxe en defensa dos nosos dereitos, mais é moi rechamante o feito de que dúas horas despois de partir a cabeceira seguía saíndo xente da Alameda, a pesar do longo percorrido da manifestación polas rúas da capital galega. Esta circunstancia obrigou á organización a ler por segunda vez o comunicado para as miles de persoas que non conseguiran acceder aínda a unha praza do Obradoiro xa ateigada.

As imaxes da maré humana que nos deixou esta xornada non deben senón facer recapacitar ao PP e á Xunta de Galiza, e máis aínda despois de que o Consello Consultivo tachara o decreto que pretende levar adiante o PP de "ilegal e inconstitucional", asegurando que se atopa fóra de ordenamento xurídico. E xa fóra do aspecto formal, é un clamor da cidadanía e do tecido asociativo a esixencia de que Feijóo rectifique dunha vez a que con seguridade resulta ser a política máis belixerante contra o noso idioma durante a democracia.

No medio dunha forte controversia, o pleno de mañá dirimirá os derradeiros orzamentos desta lexislatura

2010-05-13T13:59:00.010+02:00

Informamos a toda a veciñanza da convocatoria dun pleno extraordinario no Concello de Carnota, que vai ter lugar mañá 14 de maio ás 13:30 horas, e como único punto na orde do dia o da a aprobación dos últimos Orzamentos deste mandato municipal.

No medio de numerosos despidos de traballadores municipais, da nefasta xestión de proxectos e recursos, cun endebedamento histórico do Concello malia o cal segue a manter os seus estratosféricos salarios de carácter político, o goberno municipal volve a tratar de neutralizar a presenza veciñal e dos medios convocando o pleno a uns horarios absurdos, en canto os plenos nos que se debaten cuestións menores si os convoca a uns horarios máis asequíbeis.

En todo caso, desde o BNG pedímoslle á veciñanza que faga un esforzo por asistir a esta sesión.

Orixinal iniciativa a prol do transporte público na Costa da Morte

2010-05-07T10:21:00.009+02:00

Un problema endémico na nosa comarca como é o do transporte público, do que tanto se fala nas tribunas políticas pero polo que tan pouco se leva feito, acaba de ver nacer unha das máis interesantes iniciativas ao respecto dos últimos anos; e o máis curioso é que non procede das institucións que mantemos entre todos os cidadáns para atallar as nosas problemáticas.

A idea xurde dunha colaboración entre o diario dixital Que pasa na Costa e a empresa Galinus; consiste nun intenso estudo durante 2 anos das liñas de autobuses en toda a nosa comarca, e que se ve agora reflectido en carteis ou paneis informativos que os responsábeis da iniciativa xa están a distribuir por Carnota e por toda a comarca, nos cales se representan desde liñas, paradas e tempos de viaxe ata deficiencias e irregularidades detectadas; como anécdota máis que ilustrativa, esa nota ao pe de certos roteiros da compañía Monbús, pois "os autobuses non adoitan saír".

Este proxecto orixinal e reivindicativo merece o agradecemento e os parabéns da veciñanza de Carnota, despois de 3 anos escoitando tan só palabras baleiras por parte do goberno municipal, e en especial da tenente-alcalde Marisol Piñeiro, suposta abandeirada durante este mandato dunha grave problemática na que nada se mellorou, e da que se deixou de falar desde que o PP de Alberto Núñez Feijóo accedeu á Xunta de Galiza, converténdose por certo a propia Marisol Piñeiro en deputada pola nosa comarca.

Con esta desidia por parte dos gobernantes, non pode extrañarnos o que aseguran os propios responsábeis do proxecto: cando os veciños os "cachan" instalando os carteles, comentan a súa sorpresa porque "teñades que ser vós os que poñades os horarios".

Nesta enlace está á vosa disposición o cartel (PDF, 4 MB) para que quen o desexe poida imprimilo para usar ou difundir.

Charlas do BNG contra a crise na Costa da Morte

2010-05-05T16:08:00.003+02:00

Desde o BNG de Carnota convidámoste a coñecer o punto de vista no nacionalismo galego sobre a crise económica e a nosa alternativa para afrontala con garantes e sen prexuízos para o emprego ou os servizos públicos, asistindo á serie de charlas co título "Propostas do BNG para saír da Crise" que vai desenvolver o BNG na nosa comarca coa seguinte programación:

FISTERRA
Venres 7 de maio ás 20:30 h. no restaurante Fin do Camiño
Coa intervención de Carlos Aymerich, portavoz parlamentario do BNG

CAMARIÑAS
Sábado 8 de maio ás 12:00 h. na Casa da pedra
Coas intervencións de Bieito Lobeira, deputado e responsábel de pesca do BNG, e Xabier Aboi, secretario xeral de CIG-Mar

Aló esperamos verte.

Fracasa a xestión do Plan E en Carnota, que se converte xa no 3º concello máis endebedado da provincia

2010-05-04T10:13:00.017+02:00

Cos 13,3 millóns de euros que o Plan E vai deixar no noso entorno, e que segundo as estimacións dos diferentes concellos da redonda suporán a creación dun total de 438 empregos directos, o goberno de Carnota asegurou nos medios ter creado 16 novos postos de traballo.

Se este dato xa resulta pírrico por si mesmo, o peor é que nin sequera é certo. Despois de ser preguntado polo BNG no último pleno a respecto do número exacto de postos de traballo xerados en Carnota grazas ao Plan E, o alcalde de Carnota José Oreiro saiu pola tanxente cun escueto "cumprirase a legalidade vixente".

A realidade é que entre os requisitos do Plan E non figuraba crear un número determinado de empregos. Teatral forma de dicir que o goberno de Carnota non xerou un só posto de emprego a conta do segundo Plan E, despois de gastar máis de medio millón de euros en obras. E tampouco nos sorprende: o primeiro Plan E, que significou 900.000 euros en obras, só supuxo 3 contratacións de 4 meses de duración.

En definitiva, un gasto total de case un millón e medio de euros para manter 3 traballos durante 4 meses. Non cabe dúbida de que a aplicación do Plan E no noso municipio só pode considerarse un novo e monumental fracaso de xestión do PP de Carnota, que resta e segue.

Por outra parte, vimos de saber que Carnota xa é o terceiro concello máis adebedado de toda a provincia da Coruña, rozando xa a cifra de dous millóns de euros; 392 euros de débeda por habitante.

Á vista dos datos, a veciñanza non se explica por que o goberno municipal se segue negando a retornar os seus salarios a unhas cifras normais e similares ás percibidas por alcalde e tenente de alcalde no ano 2007. En tres anos converteron Carnota, antes modélico en opinión do Consello de Contas, no terceiro concello máis endebedado da provincia, no que os despidos son pan de cada día, a perda de servizos e investimentos unha constante, e no que as obras se reduciron xa a pouco máis que a poñer algo de piche e tapar unhas humidades dunha igrexa. Sen embargo, os veciños de Carnota teñen que pagar cada ano uns 145.000 € en soldos dos políticos, porque catro privilexiados do PP parecen empeñados en vivir de costas á realidade. E isto tampouco é culpa de ningunha crise.

O goberno de Carnota, acurralado economicamente pola súa propia política represora dos traballadores

2010-04-27T12:24:00.014+02:00

"Cando o PP falaba de recortes, referíase a isto?"

A política laboral desaprensiva do actual goberno municipal de Carnota xa lle supuxo ao noso municipio máis de 50.000 euros en despidos de traballadores municipais.

Entre eles figura o traballador da brigada de obras despedido de xeito improcedente e co que chegaron a un acordo na mesma porta do xulgado para que renunciara a seguir adiante co procedemento. Este acordo supúxolle ás arcas municipais 10.000 euros e máis os custos xudiciais, como menor dos males.

Noutro caso, o despedido foi o conductor do tractor municipal ao que tiveron que readmir, co conseguinte custo e perda de servizo.

Á traballadora de limpeza do Centro de Saúde do Pindo percibeu este mesmo mes máis de 9.000 euros dos que aínda quedan pendentes os intereses-, e o Concello tamén tivo que asumir os custos xudiciais. A situación chega ao extremo de que a esta traballadora xa é a segunda vez que a despiden e indemnizan os mesmos actores; a primeira vez foi na anterior etapa na que o PP obstentou a alcaldía de Carnota (1995-1999), grazas á pinza cunha efémera agrupación "independente".

A responsábel de actividades culturais e consumo do Concello tamén tivo que ser indemnizada con máis de 17.000 euros -pendentes tamén quedan o cobro dos intereses- despois de gañar o xuízo e tras ser rexeitado un recurso do goberno municipal. Tal foi a situación de acoso e derribo a esta traballadora que mesmo rexeitou pular xudicialmente porque lle recoñeceran o despido nulo, que conlevaría a readmisión inmediata e o abono dos salarios deixados de percibir desde a data do despido. Tamén neste caso o goberno de Carnota foi condenado ao pago dos custos xudiciais.

Esta persecución laboral supón un novo ataque a profesionais de demostrada capacidade ao servizo dos seus veciños; pero sobre todo é un duro golpe ás finanzas municipais, e como consecuencia aos petos da veciñanza de Carnota, no momento social e económico menos oportuno.

Novas relacionadas

Os despidos políticos de Carnota pagámolos todos e todas (A Moa nº 30)

O goberno de Carnota responde á crise dilapidando personal e recursos

Carta aberta de Carmen Mendoza á veciñanza de Carnota

A plana maior do PP chega a Carnota para vender fume

2010-04-20T23:16:00.008+02:00

Pírricos, por non dicir de risa. Só asi poden calificar os veciños e as veciñas de Carnota o "paquete de investimentos" que o PP galego anunciou recentemente para o noso municipio, e que tentaron vender na prensa a bombo e platillo.

O máis rechamante, o arranxo da estrada de Muros a Cee, que se ben é necesario, non parece precisamente algo digno de considerar investimento estrela dunha lexislatura municipal á que, por certo, lle resta un ano para rematar. Tampouco parece moi intelixente anunciar como logro do PP nun municipio o asfaltado dunha estrada, que ademais pasa por catro concellos gobernados por catro partidos políticos diferentes: outro síntoma de que viñeron a Carnota facer o paripé, a ver se colaba. Algún aínda debe seguir pensando que as eleccións se gañan botando un pouco de piche.

É máis, todos os demais investimentos no noso concello resúmense a "estudios" para uns arranxos nos portos de Lira e do Pindo, asi como "melloras" na Igrexa do Pindo. As restantes mencións parecen unicamente destinadas a encher o párrafo da nota de prensa: "axudas" contra o furtivismo ou mesmo para material escolar (despois de que nada máis acceder á Xunta o PP eliminara a gratuidade universal dos libros de texto, estabelecida polo anterior goberno autonómico). Como guinda, o PP menciona de novo a Casa da Cultura (que xa figuraba no programa electoral do BNG no 2007), para a cal non se recolleu nin unha soa dotación nos Orzamentos deste goberno, que xa son os definitivos para esta lexislatura municipal.

As veciñas e veciños de Carnota só poden sentir decepción polo chasco que supuxo esta representación mediática, e especialmente despois de utilizar o noso concello como escenario. O propio Carlos Negreira (eterno aspirante frustrado do PP á alcaldía coruñesa) asegurou que se trata de cuestións "menores en contía inversora"; unha afirmación que resulta un pouco chocante despois de desprazar a Carnota toda a súa parafernalia mediática: o presidente provincial do PP, o novo dirixente de Portos de Galicia, dous deputados autonómicos e case todos os alcaldes do PP do entorno. Se para vender un pouco de asfalto, un moito de fume e ningunha cifra precisan tantos comerciais, que traerán o día que teñan algún proxecto relevante... van saltar os quitamedos ao seu paso.

A todo isto, algo interesante si se presentou nesta reunión: a construción en Muros dun porto deportivo cifrado (esta vez si) en 4,6 millones de euros de investimento. Muros, concello veciño gobernado polo BNG.

O BNG de Carnota seguirá a esixir proxectos serios para revitalizar o noso concello, como é un Plan Director de Infraestructuras que sirva para priorizar os investimentos nas necesidades máis apremiantes da nosa veciñanza, asi como substituir a estratexia caciquil de colocación por un Plano de Emprego consensuado que atalle o drama do paro, despoboamento e emigración que volve estar tan vixente hoxe como estivo en etapas que críamos superadas. Asi mesmo, non se pode entender que un concello de apenas 5.000 habitantes (e descendendo) manteña uns salarios desorbitados ata a 3 políticos do PP, nun contexto de crise global e coas contas do concello retidas polos impagos. Podémolo dicir máis alto, pero non máis claro: a que esperan no PP de Carnota para poñer os pes no chan?

Revista A Moa nº 31 - Primavera de 2010

2010-03-31T00:01:00.000+02:00

Edición nº 31 correspondente ao primavera de 2010 deste Voceiro local do BNG de Carnota.

Sumario:

O escándalo das dietas tamén chega a Carnota
O goberno local contrata un técnico de urbanismo: necesidade ou compromiso político?
A Xunta vai reter as contas do Concello de Carnota por impagos
A Corporación municipal aproba unha iniciativa do BNG para mellorar Correos
Xa van tres anos de mandato do PP en Carnota, pero veciños e veciñas non ven goberno algún
O BNG, en sintonía coa sociedade, pide a retirada do decreto do galego
Lobeira: “Poden volver tempos de mestres e mestras expedientadas”

Ademais, para determinadas localidades incluímos unha separata con información específica:

Caldebarcos

O PP expulsa aos veciños da escola de Caldebarcos para favorecer a un empresario de fóra do concello
Caldebarcos segue sen un só investimento en 3 anos

Pindo

O PP de Marisol exclúe O Pindo dos investimentos municipais
O BNG ofrece alternativas ao abandono
3 anos de desgoberno "popular", en resumo

Lariño

O PP investiu en Lariño 40 veces menos que o anterior goberno
En resumo: 3 anos de desgoberno "popular"

Por primeira vez todas estas informacións publicaranse na nosa web como artigos individuais en canto se lance publicamente o voceiro, ao contrario das últimas versións. Ademais, pouco a pouco iremos colgando as noticias recollidas nas anteriores edicións e que ata agora só se viran publicadas na propia Moa. Rogámosvos paciencia neste arduo proceso.

Novas relacionadas

A Moa nº 30 (Outono do 2010)

A Moa nº 29 (Especial Eleccións Galegas 1-M)

Ver todas as edicións dispoñíbeis

A Xunta vai reter as contas do concello de Carnota por impagos

2010-02-27T13:11:00.013+01:00

Dos concellos integrados na Mancomunidade Serra do Barbanza, que xestiona a planta de Servia (Lousame) na que se trata o lixo de numerosos concellos da nosa zona, Carnota vai ser un nos que, xa de xeito oficial, vai intervir a Xunta de Galiza para garantir os pagamentos á entidade.

O anuncio chegou hoxe mesmo de man do seu presidente, Santiago Freire, que anunciou que as inxentes cantidades adebedadas por varios concellos -entre os que cita a Carnota en lugar destacado- o obrigaron a pedir a mediación do goberno galego, pois de seguir nesta dinámica «a mancomunidade acabará asfixiada» e mesmo estaría en perigo a súa viabilidade.

Esta drástica medida, que se aplicará desde este mesmo momento, implicará que cada trimestre a Xunta reterá directamente do erario do concello de Carnota determinadas contías, para ir asi facendo fronte á débeda acumulada, que se situaba a mediados de xaneiro en arredor de medio millón de euros.

O BNG de Carnota quere amosar a súa total preocupación pola inercia que tomou o concello de Carnota, que segue afanado exclusivamente en inflar os soldos dos políticos e sicarios do PP, xusto nun momento económico e social crítico que esixe desesperadamente adoptar medidas de contención, comezando por recobrar a cordura e retornar a retribucións salariais similares ás que o goberno de Carnota percibía no ano 2007, coas pertinentes actualizacións anuais. Do contrario, unha medida tan drástica coma a anunciada hoxe soará a broma con respecto do que pode vir a continuación.

O PP debe tomar dunha vez a determinación de comezar a gobernar, pois o único ao que se limitou en case tres anos de mandato foi pedir créditos, executar algúns dos proxectos que o BNG deixara xestionados e, por suposto, apañar inxentes cantidades de euros -e medrando- para eles e para o pago de favores aos seus sicarios políticos. E se ben isto xa é reprobábel nunha situación normalizada, na situación crítica que vivimos tórnase suicida.

Ligazóns relacionadas

[La Voz de Galicia, 27/02/10] La Xunta retendrá fondos a cuatro concellos por no pagar la basura

O alcalde insinúa sen probas que a oposición está detrás dunhas pintadas aparecidas na Casa do Concello

2010-02-25T15:54:00.023+01:00

En busca do protagonismo perdido, o PP de Carnota recurre agora ao vitimismo e ás inxurias para adquirir un novo titular na prensa.

Unhas pintadas son agora o motivo de que o concello de Carnota volva á palestra mediática, lamentabelmente. Asi, unhas pintadas alusivas ao desgoberno de Carnota aparecidas na noite do 16 convertéronse, tras pasar pola factoría de demagoxia do PP, en mostra da "falta de alternativa" dos grupos da oposición. Delirante.

O peor de todo non é que a falta de proxecto o PP precise inventar algo do que falar, senón que o seu círculo de sicarios políticos -en concreto un dos grandes favorecidos polo escándalo dos sobresoldos a colaboradores do PP- sinalou con nome e apelidos un veciño do noso concello, militante do BNG, ao que tamén se lle acusou duns desperfectos nas instalacións deportivas da UD Carnota, que presuntamente tiveron lugar case unha semana despois.

Precisamente foi un dirixente desta entidade deportiva o que se puxo en contacto vía telefónica co militante nacionalista para recriminarlle os danos producidos nas instalacións do clube de fútbol, e de paso advertirlle que as gravacións rexistradas polas cámaras de seguridade da policía municipal o identificaran como autor das polémicas pintadas, segundo soubera por fontes do Concello.

Ante a gravidade destas acusacións, o compañeiro do BNG, que paradoxalmente leva varias semanas desprazado de Carnota por motivos laborais, púxose en contacto coa policía local para verificar estas afirmacións, sendo un axente o que o informou de que non só non tiñan ningún cargo na súa contra senón que os verdadeiros autores dos feitos denunciados non estaban identificados en absoluto.

Pois ben; malia carecer de probas, o alcalde de Carnota non desperdiciou a oportunidade de mentirlle á prensa e a toda a veciñanza asegurando literalmente que "temos perfectamente identificados aos autores" asi como "se esta é a alternativa ao goberno local que propoñen, boas nos esperan", insinuando deste xeito unha autoría por parte dos partidos da oposición.

Lamentamos que o desnorte político do PP chegue ata os extremos de incriminar a persoas inocentes, e queremos transmitirlle ao goberno municipal que se pensan que dous garavatos nunha fachada os van librar do inmenso descontento veciñal pola desfeita que están causando no Concello, boa lles espera.

Ligazóns relacionadas

[La Voz de Galicia, 17/02/10] Un grupo de enmascarados realizaron pintadas na fachada da casa consistorial de Carnota

O BNG denuncia o abandono do Pindo e Lariño dos investimentos municipais

2010-02-02T12:02:00.002+01:00

O BNG de Carnota quer poñer en coñecemento da veciñanza a situación de agresión continuada aos veciños do Pindo, nomeadamente na cuestión do saneamento da dita localidade. A última materializouse o pasado 28 de xaneiro ao aprobar o novo Plan E (Fondo Estatal para o Emprego e a Sostibilidade Local). O Concello xa leva recoñecidos 1,5 millóns de euros deste Plan dos que non investiu nin un só euro no Pindo (nin tampouco do resto dos fondos).

No Pindo, ademais, estase a producir unha situación absurda: os veciños levan case 3 anos pagando unha taxa polo saneamento sen disfrutar deste servizo. O BNG xa denunciou esta situación en canto se lle empezou a notificar aos veciños o importe das cotas, a finais do verán de 2007. Tamén presentamos unha moción datada a 20 de novembro de 2008 para que o saneamento do Pindo fora recollido dentro do Plan Estratéxico de Infraestructuras do Medio Rural. Tamén presentamos unha moción o 10 de decembro para o Fondo Estatal de Inversión Local. O BNG tamén tentou tratar esta cuestión no pleno do 28 de xaneiro de 2010, onde se aprobou o novo Plan Estatal de Inversión Local. En outros moitos plenos fixemos rogos e preguntas ao respecto. Pero sorprendentemente o goberno local nunca atendeu esta demanda nin tratou as nosas mocións.

Lariño, outro tanto do mesmo

Igualmente está a pasar no caso de Lariño cunha pequena particularidade: no novo Plan E foi incluída unha pequena obra de saneamento. Mais lembremos que esta é a única parroquia do Concello que non ten a rede primaria de saneamento, e polo tanto facería falla un investimento 10 veces superior. A disculpa que puxo o alcalde no Pleno do 28 de xaneiro foi que estaban «xestionando o sistema de depuración». Dito doutro xeito, onde se necesitan investimentos faise o paripé e onde se precisa tempo e esforzo perdéronse tres anos e leva camiño de perder outros tantos.

Ante o desleixo, o BNG pide solucións e ofrece alternativas

Vistas estas cuestións, e tendo en conta que o novo Plan E foi aprobado en Carnota por vía de urxencia (cando na realidade tiveron tres meses para facelo) o BNG plantexou a elaboración dun Plano Director de Infraestructuras de Carnota, no cal se delimiten as obras a realizar e as prioridades, de xeito consensuado con todos os grupos políticos.

Do mesmo xeito, plantexamos a realización dun Plano de Emprego para Carnota, a realizar entre todos, que contribúa a revitalizar a economía e o mercado laboral no municipio, e poña fin á irresponsabilidade manifesta que caracterizou neste eido ao goberno municipal ata o momento: Lembramos que todas obras do primeiro Plan E foron concedidas a unha única empresa de fóra do concello de Carnota e que non xerou apenas ningún posto de traballo. Por non falar do escándalo do Obradoiro de Emprego.

Novas relacionadas

Non se atopou ningunha nova relacionada.

O alcalde recoñece que o 80% dos contratados no Obradoiro de Emprego «son do PP»

2009-12-28T21:47:00.005+01:00

Hoxe 28 de decembro, Día dos Inocentes, tivo lugar en Carnota un pleno extraordinario, forzado pola oposición para que o goberno explicara os criterios do proceso de selección dun Obradoiro de Emprego que alcanzou entre as veciñas e veciños de Carnota proporcións de verdadeiro escándalo. Por desgraza, a súa xustificación do proceso non foi unha broma propia de tan sinalado día, senón unha mostra máis dun goberno municipal que hai moitos meses pareceu perder o rumbo.

No transcurso do pleno monográfico, como era previsíbel, o alcalde eludiu asumir responsabilidades directas sobre as contratacións, culpando a unha Comisión constituída a tal efecto, conformada por dous membros da Xunta e outros dous do Concello, coa que él non tería «nada que ver», como tampouco cos criterios escollidos e mesmo chegando a simular a súa sorpresa por que desde a oposición se lle esixira celebrar este pleno.

O portavoz municipal do BNG tomou a palabra para criticar que unha cuestión que subscitara tal polémica veciñal non fora levada ao pleno polo propio goberno, senón que tivera que ser o BNG quen o promoviu a petición da veciñanza. Asi mesmo, denunciou que o alcalde recoñecera implícitamente o disparate nas contratacións pero pretendendo «escorrer o vulto», xa que se non puidesen existir dúbidas fundadas sobre a limpeza do proceso «o alcalde non tería ningún problema en recoñecer a responsabilidade sobre as contratacións», xa que foi a persoa que asinou, suponse que con pleno coñecemento de causa, todos e cada un dos contratos do Obradoiro.

Desde as bancadas do BNG pasouse a salientar a absoluta falta de transparencia no proceso, ao terse negado o goberno a facilitar criterios de selección, puntuacións, listado de admitidos e non admitidos... mesmo despois de serlle solicitada toda esa información por escrito, cando estes datos teñen que ser públicos. O portavoz do BNG ve nesta opacidade unha «ocultación de información» propia de quen «ten algo que agochar».

A seguinte parte da intervención do BNG centrouse en denunciar o despropósito que en si mesmo supuxera a selección: listaxes de candidatábeis paseando de man en man de persoas afíns, contratados de fóra do concello, familiares directos e sicarios políticos... Para o BNG o proceso deixa claro que non se tiveron apenas en conta criterios sociais e vulnerouse toda igualdade de oportunidades polo que «houbo unha inxustiza, dilapidouse unha oportunidade única para formar a aquelas persoas con dificultades para incorporarse ao mundo laboral e que o necesitan de forma imperiosa» nestes tempos de crise.

Rematou o portavoz nacionalista instando ao alcalde a «pedir disculpas aos veciños afectados» asi como que no futuro «nesas comisións de contratación tomen parte todas as formacións políticas, para non volver a incidir neste tipo de erros: as contratacións en función dunha única cor política».

Despois do contundente alegato do BNG, seguida pola intervención dun portavoz do PSOE que ratificou estas afirmacións, o alcalde de Carnota José Oreiro non titubeou á hora e espetar, diante de toda a corporación e de dúas ducias de veciñas e veciños presentes no Salón de Plenos: «Non son todos do PP, soamente o 80%, ou vós que creíades?».

Como vén sendo habitual, o alcalde negounos a posibilidade de intervir de novo, pero dada a gravidade destas palabras, pouco máis podería engadir o BNG a esta réplica, que demostra sen lugar a dúbidas cales foron os criterios reais de contratación, xa que o goberno mesmo tiña calculadas as porcentaxes de contratadas e contratados en función da afinidade política, e asi mesmo bota por terra calquera xustificación da limpeza e neutralidade do proceso de contratación.

O BNG quere amosar o apoio decidido aos veciños perxudicados por estes feitos avergonzantes, e anunciar que seguirá substentando as medidas de protesta que emprenda a veciñanza, pois cada día demostran ser máis lexítimas, como se está vendo.

Novas relacionadas

O BNG únese ás voces que claman xustiza na selección de persoal do Obradoiro de Emprego

O BNG únese ás voces que claman xustiza na selección de persoal do Obradoiro de Emprego

2009-12-18T20:08:00.002+01:00

Denuncia que “non se respectou a igualdade de oportunidades e meten a traballar a familiares e amigos do alcalde e concelleiros do PP”

O BNG denunciou hoxe a selección de persoal e traballadores-alumnos do Obradoiro de Emprego de Carnota por “non respectar a igualdade de oportunidades nin a transparencia no proceso de selección. Tanto é que, familiares e amigos do alcalde e concelleiros do PP, son os beneficiarios desta contratación que chegan até veciños de Louro e pasan por San Mamede, onde algunha persoa indicaba a concelleiros do PP para poder entrar no Obradoiro de Emprego”.

Os nacionalistas indican que “o proceso selectivo se revestiu de aparente legalidade para facer o paripé e contratar amigos e familiares do PP, ademais de negarlle ao BNG as bases de selección e os criterios de contratación. En calquera caso, a falta de criterios sociais e económicos, a situación de familias golpeadas pola crise, non se tiveron en conta; chegando a valorar máis unha entrevista persoal que a situación familiar da persoa demandante de emprego, e resultou notoria a falta de publicidade e a falta de explicacións do alcalde en todo o proceso”.

O portavoz nacionalista manifestou que “hai veciños e veciñas indignados polo que consideran un atropelo á dignidade das persoas e á igualdade de oportunidades nos traballos públicos, e por esta razón o BNG vai unirse ás voces que claman xustiza por este abuso de poder e vai demandar a celebración dun Pleno Extraordinario para forzar as explicacións do alcalde e do goberno local do PP e resolver esta inxustiza coa veciñanza de Carnota”.

O BNG é expulsado de novo dun pleno, esta vez por criticar un préstamo

2009-12-12T13:27:00.006+01:00

O BNG salienta que o motivo primeiro do mesmo é poder manter os estratosféricos salarios de políticos e familiares

O alcalde de Carnota José Oreiro expulsou do pleno celebrado na mañá do venres ao portavoz municipal do BNG, Tomás Freire, durante o debate dunha dunha operación de tesourería pola que o Concello subscribirá un novo crédito.

O secretario da corporación deu lectura ás propostas de dúas entidades bancarias para subscribir un préstamo. Entón, o portavoz do BNG, Tomás Freire, tomou a palabra: «Quero que todo o público presente na sala saiba que este préstamo é para facer fronte a gastos correntes, non para realizar obras, ou mellorar servizos. Entre o destino do crédito está o pagarlle seis mil euros ao alcalde e tamén o salario do concelleiro Manuel Brea».

O rexedor pediu ao nacionalista que retirase as súas acusacións, «falsas e inxuriosas» segundo asegurou, ao que se negou o edil do BNG, tras reafirmarse no dato duns salarios desorbitados que son públicos e oficiais. Entón Oreiro, sen respectar os avisos verbais necesarios para proceder deste xeito, reclamou a presenza da Policía Local e expulsou ao portavoz do BNG, ao que acompañaron os demais concelleiros desta formación. Nese momento, varios veciños e veciñas que asistían á sesión tamén abandonaron a sala, mentres algúns tachaban ao rexedor de antidemocrata.

Esta é xa a cuarta ocasión neste mandato de Oreiro na que o grupo municipal do BNG é obrigado a abandonar o pleno por exercer a súa labor de defensa dos intereses das veciñas e dos veciños do noso concello.

Novas relacionadas

Non se atopou ningunha nova relacionada.

A presión do BNG no Parlamento evitou que o PP eliminara o complemento ás pensións non contributivas

2009-11-30T23:30:00.005+01:00

O complemento de máis de 200 euros instaurado polo anterior goberno da Xunta, cando o BNG ostentaba a responsabilidade dos Servizos Sociais e o Benestar, fora calificado polo señor Feijóo, na súa etapa de xefe da oposición, de “cicateiro”, e o seu partido mesmo introducira unha emenda para elevar a súa contía a 570 euros. Pois ben, unha vez no goberno, non só non cumpriron coa esixencia que lle formularan ao anterior goberno da Xunta, senón que tentaron suprimir o complemento na súa totalidade. Esta medida xustificábase por dirixirse -segundo o PP- a "optimizar a atención aos pensionistas".

Non casualmente, foi o nacionalismo galego coa súa xestión quen introduciu este complemento na pasada lexislatura logo de dar -e gañar- unha dura batalla ideolóxica contra aqueles que xa daquela quixeran dinamitar a proposta alegando a súa suposta inconstitucionalidade. Pois ben, xa con Feijóo no poder, de novo tivo que ser grazas á presión exercida polo BNG que o PP se viu obrigado a recuar en última instancia ante o clamor social que se lle estaba vindo enriba; só así decidiron manter o complemento, despois dun dantesco festival de contradicións de Feijóo na prensa.

Volve a quedar claro que a única medida social que comprende o PP de Feijóo é a de recurtar os servizos públicos para favorecer aos catro empresarios de toda a vida. E tamén que mentres o BNG siga ocupando a primeira liña no Parlamento de Galiza, vanse topar coa nosa actuación cada vez que alguén tente vender á empresa privada o sistema de servizos públicos do que tantos anos nos custou dotarnos a todos os galegos e galegas.

Novas relacionadas

Non se atopou ningunha nova relacionada.

Revista A Moa nº 30 - Outono do 2009

2009-10-01T15:00:00.006+02:00

Edición nº 30 correspondente ao outono de 2009 deste Voceiro local do BNG de Carnota.

Sumario:

Os fillos do alcalde súmanse ao saqueo
Os despidos políticos de Carnota pagámolos todos e todas
O PP, cómplice do peche da Caixa Galicia en Lira
Só o BNG actuou ante o peche da Caixa do Pindo
Case 3 anos de pasotismo e ineficacia municipal afogan aos veciños e veciñas de Carnota
Novas breves
O nacionalismo reforza o veto da Xunta para que as caixas galegas non sexan absorbidas por nengunha entidade foránea

Novas relacionadas

A Moa nº 29 (Especial Eleccións Galegas 1-M)

A Moa nº 28 (inverno do 2008)

Ver todas as edicións dispoñíbeis

Web recolle 14.000 casos de vítimas do franquismo, 24 deles en Carnota

2009-08-23T21:21:00.013+02:00

O traballo de investigación conxunto da USC, UDC e UVIGO acaba de traducirse en Nomes e voces, unha páxina web na que poderedes consultar información sobre represaliadas e represaliados polo alzamento fascista dirixido por Francisco Franco contra o goberno republicano no ano 1936. Así presentan o proxecto na súa web:

O Proxecto de Investigación "Nomes e Voces" naceu en 2006, a través dun convenio das tres universidades galegas coa Consellería de Cultura da Xunta de Galicia, co obxectivo de estudar a represión en Galicia durante a guerra civil e o franquismo, recompilar información e ofrecer datos relativos ás vítimas. Abórdase, pois, unha investigación histórica que parte do golpe de estado de 1936, a guerra e os inicios da ditadura, e pretende un estudo profundo e completo deses procesos.

Estarrecedor é atopar xa a día de hoxe 14.000 casos en toda Galiza, con nomes, apelidos e outra información persoal. Pero máis aínda, se cabe, saber que en Carnota xa rexistran ata 24 casos documentados de represaliados polas armas dos militares golpistas, na súa maioría por deserción ou pola desaparición da lancha "As", na que se presume tentaron fuxir numerosos veciños de Carnota do asedio dos falanxistas.

Entre as procedencias que nos constan destes veciños, 13 serían do Pindo, 3 de Lira e 3 máis en Caldebarcos, Lariño e Louredo. Moi rechamantes son os casos de Andrea Caamaño Martínez, unha veciña de Lira de 64 anos, traballadora do fogar, que chegou a ser procesada en Compostela co resultado de sobreseemento, ou Jesús Chouza Figueiras, natural de Carnota que fora elixido concelleiro en Cee, que non correu a mesma sorte e foi fusilado pola súa involucración política. Porén, a maioría dos perseguidos eran tan só rapaces menores de 25 anos, mariñeiros case todos eles, pero tamén algún labrego, panadeiro, fogoneiro ou follalateiro.

Percorrer todos estes casos constitúe unha experiencia certamente estarrecedora, mais tamén imprescindíbel, pois como dicía a cita, «Aquel que non lembra o pasado está condeado a repetilo». Sirva esta entrada de humilde recoñecemento póstumo a eses centos de veciños perseguidos e fusilados polo «delito» de crer que outro mundo é posíbel.

Por suposto, estes casos só recollen unha pequena parte do drama social vivido no noso concello e en toda Galiza polo alzamento e posterior dictadura franquista, pois aínda se botan en falta casos soados de carnotáns represaliados, co que presumibelmente o funesto listado irá aumentando, e isto sen sumar o macabro drama dos nenos roubados polo réxime. Para iso, os historiadores solicitan a colaboración de todos para iren ampliar a información sobre estes e outros posíbeis casos de vítimas.

Ligazóns relacionadas

O PP revélase cómplice do peche de Caixa Galicia en Lira

2009-06-29T22:53:00.003+02:00

O BNG compareceu no pleno do pasado 29 de xuño, como anunciáramos, agardando a unión dos 3 grupos que conforman a corporación municipal, e tras ter presentado a moción redactada polos veciños contra o peche da Caixa Galicia en Lira, á que se sumou tamén o PSOE. Esta moción recollía literalmente todos os argumentos e as reivindicacións xa presentadas pola Plataforma veciñal aos máximos responsábeis da Caixa Galicia: o problema do envellecemento poboacional de Lira e Lariño, o problema do transporte a Carnota e Muros, o desenvolvemento dun turismo mariñeiro (1, 2) e hostelería nacente, a pesca, comercio e industria local que se verían notoriamente afectados polo peche da oficina... daquela con obxectivo de sensibilizar á dirección da entidade sobre unha problemática que transcende os simples prexuízos económicos.

Se ben o guión do Pleno apuntaba a recoller o debate e aprobación de dito escrito veciñal coas achegas que puideran acordarse, cal sería a nosa sorpresa cando, nada máis comezar o pleno e ante o salón cheo de veciños, o alcalde decidiu levar o asunto por outros derroteiros, propoñendo sacar adiante un novo manifesto para o que pediu o apoio dos 3 grupos, aínda sen explicar cal sería o seu hipotético contido nin en que punto do mesmo se tería en conta a opinión dos veciños.

Nun novo acto de incongruencia, o alcalde José Oreiro inquiriu sucesivamente aos portavoces da oposición «as súas posicións» ao respecto da polémica, ao que Tomás Freire respostou que «a postura do BNG xa estaba perfectamente recollida na proposta de moción redactada polos veciños». Esta contestación arrancou aplausos de boa parte dos presentes na Sala de Plenos, o que alporizou esaxeradamente ao alcalde, que rematou expulsando a varios integrantes do público.

Continuando coa intervención do noso portavoz, este manifestou a súa perplexidade porque o alcalde pretendera zanxar unha cuestión tan transcendental para a vida dos nosos veciños cun simple manifesto político da corporación, aínda por crear, en lugar de asumir (ou en todo caso debatir) os compromisos reais xa recollidos na moción veciñal xa presentada, o que para o BNG só se pode interpretar coma «un brindis ao sol» co único obxectivo de «eludir toda responsabilidade do goberno municipal» asi como «evitar adoptar compromisos reais» a respecto do peche. Ademais, Tomás Freire manifestou que esta actitude, e sobre todo como se convocou este pleno, era unha clara falta de respecto co movemento veciñal creado en torno ao peche de Caixa Galicia, ao non ter en conta en ningún momento a opinión dos veciños, e rematou afirmando que «eu como alcalde nunca terei a actitude que tivo vostede cos veciños; eu estarei ao fronte deles». Logo Tomás Freire pasou a expoñer as propostas do BNG:

Adherirse sen cortapisas á Plataforma veciñal, nas accións reivindicativas que leven a cabo.
Facultar ao alcalde para que lidere as xestións oportunas cos responsábeis de Caixa Galicia e con obxectivo de evitar o peche.
Comunicarlle á Caixa Galicia de Carnota que en adiante o Concello pasaría a traballar coa Caixa Galicia de Lira, e no caso de esta pechar, que optaría por comezar a traballar con outra entidade financieira.

Tras esta exposición en positivo (a pesar das continuas interrupcións por parte do alcalde), Tomás Freire cedeu a palabra ao PP para que puideran achegar as súas propias propostas e así debatilas en conxunto, con posterioridade. Inexplicabelmente, o señor José Oreiro rachou a baralla espetándolle literalmente que «non se ía dar ningún debate, pois a oposición non ía ter máis intervencións». Ante a estupefacción dos presentes e as protestas do noso portavoz por esta actitude antidemocrática, José Oreiro, visibelmente nervoso e desencaixado, ordenou á policía municipal por terceira vez en menos de dous meses que expulsara a Tomás Freire do Pleno, ao que lle seguiron os restantes concelleiros nacionalistas Euloxio Franco e Merche Díaz, os representantes do PSOE (esta vez si), asi como a maior parte dos veciños presentes na Sala de Pleno, en mostra de solidariedade co noso compañeiro.

O BNG lamenta que non fose posíbel chegar a un acordo positivo para os nosos veciños, a pesar dos nosos intentos porque a cuestión non derivara nunha nova batalla política senón cun compromiso real con centos de veciños perxudicados polo peche da Caixa Galicia en Lira. Pero ao mesmo tempo, a actitude coercitiva e hostil do alcalde con todo debate produtivo, ao que desgrazadamente xa nos ten tan afeitos, lévanos a deducir que o problema non era a lectura política que se puidera facer do ritmo dos acontecementos deste conflito, senón cunha máis que probábel connivencia do alcalde e do PP de Carnota co peche da Caixa Galicia de Lira: cónstanos que o goberno do PP coñeceu antes que ninguén as intencións de pechar as sucursais da Caixa Galicia en Lira e O Pindo, a pesar do cal nin tan sequera informou aos veciños, tendo estes que enterarse de rebote. Tampouco o PP de Carnota solicitou a mediación do representante municipal en Caixa Galicia, tamén alcalde na Costa da Morte e compañeiro seu de partido.

Pese a dispoñer de ditas «cartas na manga», tanto no caso do peche no Pindo como no de Lira o alcalde limitouse a excusar a súa falta de implicación, alegando no caso do Pindo que «non é comptencia súa» e no de Lira que «tiña cousas máis importantes que facer», só reaccionando tímidamente neste último peche ao ver a masiva reacción dos veciños de Lira e Lariño.

E dicimos isto coa inmensa tristeza ver que hoxe en dia o goberno de Carnota demostra moita máis comprensión cos intereses espúreos dunha empresa privada que coas lexítimas reivindicacións dos nosos veciños ante unha problemática dun calado terríbel para as súas vidas.

Hoxe en día, o Concello de Carnota vive de costas á veciñanza. E recapitulando sobre todo o que leva pasado desde o 27 de maio do 2007, ese é o auténtico drama de Carnota, que tampouco ten visos de mudar salvo que se produza canto antes un auténtico golpe de timón na política local. O BNG vai seguir loitando por iso, pois por moito que traten de silenciar a tres concelleiros do BNG, o PP nunca vai poder silenciar ao conxunto dunha cidadanía que cada vez está máis farta.

Nota: Este artigo publicouse unha semana despois do Pleno para evitar que a postura do BNG fose difundida nos medios de comunicación antes que a dos veciños, como xa aconteceu nunha ocasión.

Novas relacionadas

Formulario dixital de recollida de sinaturas.

Grupo de apoio na rede social Facebook: "Non ó peche da Caixa Galicia de Lira"

Artigo anterior: Caixa Galicia dálle definitivamente a espalda aos veciños de Lira

Artigo anterior: As protestas dos veciños de Lira chegan á Coruña

Artigo anterior: Caixa Galicia pecha en Lira mentres o alcalde mira para outro lado

Caixa Galicia dálle definitivamente a espalda aos veciños de Lira

2009-06-25T00:21:00.020+02:00

Finalmente, e salvo un inesperado xiro dos acontecementos, Caixa Galicia vai pechar definitivamente a súa sucursal de Lira, deixando asi a centos de veciños sen os servizos que a única entidade entre Muros e Carnota viña prestando. A noticia foi confirmada na mañá de onte polos portavoces veciñais, tras unha reunión co delegado de zona de Caixa Galicia, Xoán Carneiro.

Facendo balanzo de todo o acontecido durante esta semana e media, só podemos quitarnos o sombreiro ante a capacidade de resposta da veciñanza, que demostrou unha madurez e unha seriedade exemplar ante unha situación inxusta: Varias concentracións (unha delas nas portas da sede central de Caixa Galicia na Coruña), unha recollida de sinaturas virtual e en papel con máis de mil apoios recabados, e mesmo un activo e nutrido grupo de apoio na rede social Facebook, aínda que nada foi dabondo para influír nunha decisión que parecía levar tempo tomada.

Porén, non debemos caer no erro de pensar que tanto esforzo non valeu para nada. Toda iniciativa veciñal é sempre útil sempre que se faga con unión e convicción, e estas dúas máximas marcaron toda a resposta veciñal, o que nos demostrou a memorábel imaxe de ver xente con diferentes ideoloxías mobilizadas debaixo da mesma bandeira: a dos intereses veciñais.

Pola contra, a nivel político só podemos lamentar a feble reacción do PSOE, e máis aínda -cando non inexistente- a do PP, e sobre todo do Concello de Carnota, cuxas reticencias a involucrarse nun movemento veciñal sinceiro os deixaron fóra de xogo, e a só insinuar tímidos xestos de apoio tarde, mal e arrastro e con consecuencias xa case irrelevantes. De feito, cando máis falta facía só recibimos por parte do alcalde mostras de desinterese ou desconfianza. Só onte o alcalde decidiu convocar á oposición a unha reunión para convocar outra reunión. Onte, que o ultimatum de 48 horas dado pola Caixa Galicia expiraba deixándonos a sentencia de morte da sucursal de Lira.

Continuamos apoiando as medidas de protesta
Desde o BNG tivemos claro desde o principio que lonxe das lecturas políticas que puideran tentarse facer do movemento veciñal (e intentos de intoxicalo non faltaron), a nosa obriga era estar ao seu lado para todo o que puideran necesitarnos, e así o fixemos poñéndonos á súa disposición e mesmo ofrecéndolle a nosa modesta capacidade de mediación por se puidera ser útil para o interese veciñal, pois ese é o noso obxectivo.

Deste xeito, o BNG de Carnota vai apoiar a retirada veciñal dos fondos da entidade Caixa Galicia, pois quedou constatado que a súa única "función social" foi rabuñar unhas milésimas máis de beneficios a conta do noso rural, para abandonalo á súa sorte cando os cartos xa non chegan en carretillas. Isto contravén os propios estatutos da entidade, aínda que a ningunha autoridade pareza importarlle.

Por suposto, estamos abertos a calquera outra proposta dos veciños, dos restantes grupos políticos e tamén do Concello. Agardamos que por fin poidamos ver unha unión de todas as forzas políticas con representación no noso concello, pois desde o BNG entendemos que na defensa dos veciños non pode haber fisuras.

Rematamos amosando a nosa solidariedade co amigo Tino, ata hoxe director "da nosa caixa", como din os veciños, e felicitando a estes pola súa determinación, pois na defensa dos interese comúns este é o camiño bo.

Novas relacionadas

Formulario dixital de recollida de sinaturas.

Grupo de apoio na rede social Facebook: "Non ó peche da Caixa Galicia de Lira"

Artigo anterior: Caixa Galicia pecha en Lira mentres o alcalde mira para outro lado

Artigo anterior: As protestas dos veciños de Lira chegan á Coruña

As protestas dos veciños de Lira chegan á Coruña

2009-06-22T13:25:00.013+02:00

Esta mañá un cento de veciños achegáronse en autobuses ata a central da Caixa Galicia na cidade da Coruña (rúa Nova con San Andrés). O obxectivo era elevar ata a mesmísima sede da entidade bancaria a contrariedade dos veciños de Lira e Lariño pola decisión de clausurar a sucursal de Lira, cos graves prexuízos que suporá a todos os veciños o feito de ter que desprazarse ata outras sucursais, as máis próximas situadas en Carnota e Muros.

Os portavoces dos veciños Pedro Balayo Caamaño e Antón Xoubanova Yermo foron recibidos arredor das 11:00 horas polo director xeral adxunto da sede central ao que lle entregaron máis de mil firmas dos veciños, tras o que lle explicaron as repercusións desta medida sobre a vida de centos -cando non miles- de veciños de Carnota, criticaron que a decisión se adoptase dunha semana para outra e pediron que non se eliminara este servizo de Lira.

Á saída da reunión, Pedro Balayo explicoulle aos veciños que se conseguira o compromiso de resposta oficial de Caixa Galicia en 48 horas e que parecía abrirse unha espectativa de diálogo, polo que á espera desa resposta disolviuse a concentración, xa preto das 12 horas.

Antón Xoubanova falou para o BNG de Carnota laiándose por que un consello de administración dunha entidade coma a Caixa Galicia puidera adoptar unha decisión tan extrema "en menos dunha semana, sen pensar nas consecuencias", porque ademais das operacións sobre nóminas, pensións, caixeiro... que a sucursal viña prestando, "non se valora a función fundamental da mesma: a obra social; veciños e sobre todo maiores con problemas de lectura que ían á caixa á que lle leran as cartas, os asesoraran a respecto das súas contas e operacións financieiras, ou lles explicaran como facer esta ou aqueloutra tramitación".

Anunciou asi mesmo que a de hoxe, lonxe de ser a última medida coma o peche, vai supoñer "o inicio dunha campaña de mobilización de todos os veciños", sempre e cando a dirección de Caixa Galicia non atenda ás peticións veciñais. Tamén lamentou que despois de convocar a todos os medios de comunicación só aparecera El Ideal Gallego para cubrir a reivindicación.

Tampouco faltaron mostras de solidariedade e agradecemento co director da sucursal de Lira, Faustino J. Rivadulla Carracedo, máis coñecido como Tino e moi querido e respectado polos veciños.

Como non podía ser doutro xeito, o BNG participou no acto reivindicativo dos veciños de Lira, coa presenza e varios militantes e membros do Grupo Municipal.
Posibelmente a nota máis agradábel da xornada foi un grupo de nenas vestidas co traxe tradicional, que se achegaron ás veciñas e aos veciños de Lira para regalarlles caraveles, xesto que espertou non poucos sorrisos.

Desde o BNG de Carnota temos pouco máis que dicir que animar aos veciños a seguir adiante coa súa causa xusta, pois a unión fai a forza.

Por certo, entramos na segunda semana de mobilizacións e o alcalde de Carnota segue desaparecido en combate.

Galería de imaxes

Novas relacionadas