Desmontamos as mentiras laborais do PP e do PSOE

Non nos colle de sorpresa que logo de toda unha lexislatura desaparecidos, os candidatos de PP e PSOE precisen algún titular co que atacar a xestión municipal do BNG nas follas dos periódicos. Nin tampouco que despois de catro anos nos que só presentaron dúas ou tres mocións entre os dous partidos da oposición, a meses das eleccións estén dispostos a recurrir á mentira para lograr desesperadamente atención. A última ocurrencia deles foi afirmar que a redución de plantilla desenvolta polo goberno local para axustar o personal municipal á realidade económica e poboacional do municipio custou ás arcas de Carnota varios centos de miles de euros, unhas cifras absolutamente disparatadas que non podemos nin explicar de onde as sacan.

O BNG de Carnota publica para coñecemento de toda a veciñanza o resumo das cifras reais do aforro que supuxo a medida de redución do personal, concretando cal foi o custe real para o concello da opción finalmente executada (cifras salientadas en negriña), con respecto á outra opción das posíbeis.

	1. Cese	2. Readmisión (Continuidade no posto)		Diferencia
POSTO	INDEMNIZACIÓN	SALARIO DE TRÁMITE	SEG. SOCIAL
Técn. urban.	36.364,00	35.825,16		538,84
A.D.L.	31.390,00	13.357,00	10.463,55	28.496,55**
A.D.L.*	22.026,84	23.818,00		-1.791,16
Técn. inform.	13.468,34	12.217,28		1.251,06
Peón obras	19.000,00	22.845,00	7.615,00	11.460,00
Peón obras	33.000,00	25.697,00	8.566,00	1.263,00
Monitor dep.	51.000,00	31.675,00	10.558,00	-8.767,00
*Pdte. Sentenza firme do TSXG		Aforro logrado ata a data:		32.451,29 €
**Inclúe o aforro de 18.033€ no salario de trámite polo tempo que traballou noutro lugar

Asi as cousas, as cifras demostran que a día de hoxe o Concello xa conseguiu aforrar 32.500 euros coa medida, incluso nos casos en que o Xulgado invalidou a decisión extintiva. Ademais este aforro seguirá incrementándose cada mes que pasa, e servirá para que Carnota atenda os seus compromisos coa veciñanza sen que esta percibira unha merma na calidade e cantidade dos servizos que se lles presta, ao mesmo tempo que se foron saldando as débedas cos proveedores e saneando pouco a pouco a situación económica xeral. Será iso o que lles amola a PP e PSOE, que hoxe Carnota cumpre coa veciñanza e coas empresas, que en vez de escapar do Concello desexan traballar con nós.

Resposta ao "conseguidor" Suso Campos

Novo Parque de Canedo financiado pola Deputación (autor)

Máis humor merece a nosa resposta á recente intervención radiofónica de Xesús Campos, do PSOE, que acusou ao alcalde Ramón Noceda de non ter pedido subvencións á Deputación da Coruña (onde Campos ocupa un cargo accidental) e mesmo asegurou poder mediar de "ponte" para que Carnota obteña cartos da Deputación.

O primeiro é falso, de feito vense de inaugurar un fermoso parque infantil en Canedo financiado pola Deputación, por nomear un proxecto destacado. Sobre o segundo, non imos valorar sequera o tufo caciquil da "oferta", pois o edil está presumindo abertamente de que pode conseguir uns cartos públicos que só poden proceder dun concurso público, legal e regulado. Pero Suso Campos esquece que ningunha subvención cubre o cen por cen dun investimento, senón máis ben unha mínima parte do mesmo, e sobre todo esquece que a unanimidade da Corporación (e el mesmo) aprobaron a principios de mandato un Plan de Axuste que prohibia expresamente ao Concello solicitar subvencións excepto se cubren o 100% do investimento. A medida pretende evitar que ningún goberno se dedique a pedir todo tipo de subvencións que non cubran nin de lonxe os investimentos que obriga a realizar, e logo deixe no caixón a débeda que non pode afrontar, ata que outro se ocupe.

O BNG de Carnota lamenta que todo o interese de Suso Campos en Carnota, alén de apoios plenarios puntuais, se limite a este tipo de desbarres mediáticos que afean a longa traxectoria do PSOE neste municipio. Se tan interesado estaba en axudar ao seu pobo natal podía ter presentado algunha moción (só trouxo aquel proxecto faraónico de CarnotaFit), e se é tan influinte na Deputación como di ser, ben podería terse mobilizado en apoio das diversas asociacións veciñais do noso municipio que pediron axudas á Deputación durante estes anos, pois viñeron rexeitadas unha e outra vez sen explicación algunha, cercenando deste xeito importantes e interesantes proxectos veciñais no noso Municipio. Polo que se ve iso non merece a crítica dos deputados do PP e PSOE, será que non lles resulta tan mediático axudar a unha asociación veciñal a lograr os seus obxectivos.

Novas relacionadas

• [31/08/13] A situación de emerxencia obriga a prescindir de 6 empregados municipais. Voceiro local monográfico explicando a redución de plantilla desenvolvida polo goberno de Carnota.
• [05/09/13] O ex-alcalde de Carnota José Oreiro, imputado por prevaricación nas súas contratacións laborais
• [03/05/14] O fiscal apreza “indicios racionais de criminalidade” nas actuacións da deputada Marisol Piñeiro e o ex-alcalde José Oreiro e a xuíza eleva o caso ao TSXG