Sen ter recibido a información en tempo e forma, o BNG tivo que asistir "a cegas" ao pleno convocado onte polo goberno municipal.

Logo dun fugaz sorteo dos compoñentes das mesas electorais para as vindeiras eleccións europeas (tan atropelado que nin sequera comunicaron os nomes resultantes), o alcalde José Oreiro deu paso a un dos espectáculos políticos máis vergonzosos que se lembren en Carnota: A reprimenda do PP ao BNG por ter difundido os desorbitados salarios que o goberno do PP de Carnota vai a percibir segundo recollen os orzamentos que acaban de presentar e aprobar en solitario.

Tras unha intervención monológuica do alcalde e dos seus números 2 e 3, repleta de ataques contra o BNG e negándolle aos nosos concelleiros toda posibilidade de intervir ou defenderse por moito que a pediran, o alcalde, visibelmente alterado, rematou ordenando á policía municipal que expulsara da sesión aos concelleiros do BNG.

Desde o BNG manifestamos que o PP acaba de cruzar a delicada barreira politica que todos críamos superada hai máis de trinta anos, ao tratar de censurar a nosa voz, os nosos "panfletos", e sobre todo o noso dereito de informar á veciñanza sobre uns datos que son públicos e que se atopan recollidos literalmente nos orzamentos municipais, a disposición de todo veciño que queira consultalos.

Sobre eses datos, reiteramos o que xa dixemos no seu momento: Un concello coma Carnota non pode permitirse custear 145.000€ anuais a catro políticos do PP, é financieiramente suicida e mesmo obsceno para todos os veciños que as pasan canutas para chegar a fin de mes. Volvemos esixir que supriman cando menos dous deses salarios e reduzan o salario do alcalde a uns niveis coherentes coa solvencia financieira do noso concello no momento de crise actual, que desgrazadamente está moi lonxe de permitirnos asumir as 715 mil das antigas pesetas que o señor Oreiro quere cobrar cada mes.

A pesar das ameazas e os insultos desta clase política do PP metida a clase represora, no BNG sabemos que existe algo chamado liberdade de expresión, polo que anunciamos que ata que se cumpra a nosa demanda imos seguir informando a toda a veciñanza sobre a cuestión dos salarios abusivos do PP, e nunca por un afán de revanchismo ou vinganza, senón porque (1) son datos oficiais e (2) forma parte do noso compromiso ineludíbel cos veciños de Carnota, que hai dous anos decidiron democraticamente que nós debíamos liderar a oposición.

Por último, o compañeiro e concelleiro Euloxio Franco Barba desexa aproveitar estas liñas para referirse aos berros lanzados desde algúns sectores reaccionarios presentes entre o público do pleno, que aludiron de xeito despectivo á súa condición de emigrante retornado de Euskadi. Euloxio manifesta que esta condición, lonxe de resultarlle avergonzante, éncheo de satisfacción e agradecemento pola nación que o acolleu cos brazos abertos cando el e a súa familia o precisaron, por non poder vivir dignamente en Galiza no tardofranquismo que agora algúns parecen botar de menos.

Novas relacionadas

• Documento dos Orzamentos Municipais 2009 (PDF)


• O alcalde súmase ao saqueo do concello


• Descarga o Boletín en baixa calidade (para mandar por e-mail)


• Descarga o Boletín en alta calidade (para imprimir)


• Descarga o Boletín en formato de imaxe