AD (728x60)

Slider Section

Submenu Section

31/05/2007

Graciñas, Carnota

Comparte e opina:
Logo duns días de necesario descanso polo duro traballo realizado durante a campaña, o BNG de Carnota xa está a traballar para organizármonos na oposición tras a perda da alcaldía que tivo lugar tras a xornada eleitoral do pasado 27 de maio, quedando o goberno do noso concello en mans do popular José Oreiro, como sen dúbida xa sabedes.

Foi esta unha campaña durante a que o BNG de Carnota fixo un esforzo humano e material sen precedentes, pero sempre centrados nunha actitude construtiva, didáctica, dialogante e tentando fuxir da acritude que desde certos sectores da vida política local se tratou de impoñer mesmo agresivamente. De feito, se algo percibiron os veciños que acudiron aos nosos mitins ou leron o noso material editado, foi a nosa idea de seguir avanzando no desenvolvemento dun municipio próximo á cidadanía e atento ás súas problemáticas, próspero economicamente, xerador de emprego e substentábel medioambiental e urbanisticamente. Presentamos un programa de proxectos consistentes e viábeis para o futuro do noso concello, un equipo de persoas moi preparadas para levalos a cabo... e nin unha soa promesa faraónica ideada cos pés postos nas nubes e coa mente posta unicamente nas eleicións do 27 de maio.

Centos de veciños acudiron a escoitar o noso candidato e as nosas propostas aos mitins que celebramos no Pindo, Caldebarcos, Lira, Lariño, Carnota e San Mamede, ás xuntanzas veciñais que organizamos en Mallou, Pedrafigueira, Lariño e Quilmas, ou aos encontros sectoriais que celebramos con todo tipo de asociacións con actividade no noso municipio. Editamos e difundimos o noso voceiro local A Moa (que xa suma 23 edicións ao longo de 11 anos), o noso programa de futuro para Carnota e un díptico-resumo das nosas propostas. Informamos de todas as actividades nas nosas páxinas web que sumaron un total de 3.617 visitas únicas só durante os quince días de campaña, o que supón unha media de 241 visitas diarias. Mesmo celebramos unha festa fin de campaña no Pindo con sardiñada e queimada popular, concursos, contacontos, teatro, actuacións folk e rock, agasallos...

Non obstante, e se ben a diferencia final foi ínfima (menos de corenta votos), foi suficiente para impedir a reedición do goberno de progreso de Carnota liderado polo BNG que a cidadanía respaldara durante os últimos 8 anos, quedando a alcaldía en mans do PP sen sequera teren feito programa eleitoral, tras catro anos sen actividade política local e cunha campaña baseada no merchandising e en pedir o voto apelando "á confianza" para facer cousas que só eles saben, e das que se negaron a falarnos.

Tempo teremos para analisar en frío e con rigor os resultados, mais agora é o momento de asumir os compromisos adquiridos coa cidadanía de Carnota organizando unha oposición dinámica e construtiva e poñendo a nosa idea de concello non só ao servizo das case novecentas persoas que respaldaron ao BNG nas urnas, senón na defensa deste fermoso municipio que é de todos e cada un dos veciños. Ese é o noso compromiso: traballo, seriedade, proxectos, propostas, diálogo, e ilusión total en isto porque nós realmente cremos en Carnota, e non o imos abandonar á súa sorte durante catro anos como antes fixeron outros por non obter nas urnas os resultados desexados.

Moitísimas grazas polo apoio amosado ao proxecto de concello liderado polo BNG, pola maré de ánimo que recibiu o novo candidato Tomé Freire e o seu renovado equipo. Vós facedes que o enorme esforzo e ilusión que puxemos nesta campaña vála realmente a pena.

Etiquetas: ,

Hai 3 opinións.

  1. Nada, que nin dando empanadas e sardiñas!!!!!!!!

    A xente de Carnota o que quere e ter que comer o resto do ano, traballo e futuro e eso está visto que o bng de carnota foi incapaz de facelo durante moito tempo.

    ResponderExcluir
  2. Onde nos metemos!06/06/2007 19:35

    Xa lle gustaría ao PP poder facer a campaña que fixo o bloque, co presuposto que tivo o bloque.

    Os peperos gastan millóns de pesetas postos polos do ladrillo e meten dúas orquestas cutres que non conocen nin seus pais, catro globos e unha pantalla xigante co careto do coxo, e ala, a xente na camiña as 12. Por certo, dise por aí que cando o coxo saiu a dar o mitin (si, señores, era unha "festa" de fin de campaña con mitin e todo) empezou a chamarlle de todo os seus opoñentes nas urnas, e polo que oín quedaron sós el e mais os catro borregos lambecús que ten con el.


    Os bloqueiros, con bastante menos de un kilo para toda a campaña, meten teatro, contacontos, sardiñada, empanada, queimada e concertos de folk e rock, e ala, festa armada ata a madrugada.




    Por certo, nunca traballou tanta xente en Carnota como nestes catro últimos anos, con Manolo, si. O coxo, polo contrario, disque xa anda decindo que vai ter que "prescindir" de traballadores.

    Por certo tamen, o equipo de goberno do BNG en funcións acaba de aprobar os obradoiros de emprego que darán traballo e formación durante un ano a 45 persoas do noso concello.
    A ver canto tarda o señor diputado ese que non ven por Carnota en catro anos en decir que eses traballos se crean gracias a el.
    Xa o veredes, poño a man no lume, porque se de algo pode presumir ese home é de ter a cara máis ancha que o capó do Mercedes novo que acaba de comprar.

    ResponderExcluir
  3. Unha pena que, a pesar da boa campaña que fixéstedes perdérades a alcaldía por unha mancheada de votos que se poden deber xa ó simple feito do cambio de candidato.
    Tomás demostrou sobradamente nesta campaña que era a mellor opción para a alcaldía de Carnota, e seguro que dentro de catro anos os veciños non terán ningunha duda.
    Non te desanimes Tomás, o pobo está contigo!

    ResponderExcluir

 

Artigos máis lidos

Artigos máis recentes

  • CEIP de Carnota
  • CEIP O Pindo
  • Asociación Cultural Canle de Lira
  • Asociación Veciñal Insua de Lariño
  • IES Lamas de Castelo
  • Asociación Monte Pindo Parque Natural
  • Plataforma Salvemos o Faro de Lariño
  • Cooperativa de Agricultura Ecolóxica Rainha Lupa de Quilmas
  • Asociación Veciñal Relámpago de San Mamede
  • Asociación Cultural Deportiva Recreativa O Patín de Carnota
  • Asociación Cultural Deportiva Recreativa Pedramar do Pindo
  • Asociación Veciñal Pedras da Area de Mallou e Maceiras
  • Asociación Veciñal Xurde Caldebarcos

Visitas

Na memoria de Antón do Corenteno e Euloxio Franco

Páxina web da Asemblea local do BNG de Carnota. Todos os contidos desta páxina distribúense baixo licenza Creative Commons 2.5 menos onde se exprese o contrario. Isto é un traballo de Connosco baseado en Templateism.com. Séguenos nas nosas redes sociais: